Як паведамляе пракуратура, з лютага гэтага года маці аднагадовай дзяўчынкі і двухгадовага хлопчыка сістэматычна сыходзіла з дому, пакідаючы дзяцей на бабулю. Акрамя таго, за супрацьпраўныя паводзіны гора-маці прыцягвалася да адміністрацыйнай адказнасці. Бацька больш за год сумесна з сям’ёй не пражывае, удзелу ў выхаванні і ўтрыманні дзяцей не прымае, працяглы час не працуе і жыве за кошт выпадковых заробкаў.

Яшчэ раней, з траўня 2024 года па люты 2025 года дзеці прызнаваліся як такія, што знаходзяцца ў сацыяльна небяспечным становішчы, паколькі бацькі не выконвалі важныя для іх медыцынскія рэкамендацыі.

Праца з сям’ёй вынікаў не дала. Ужо ў жніўні дзяцей зноў прызналі такімі, што знаходзяцца ў сацыяльна небяспечным становішчы, з-за амаральнага ладу жыцця бацькоў, злоўжывання імі сваімі правамі і жорсткага абыходжання з дзецьмі. Акрамя таго, было ўстаноўлена неналежнае расходаванне дапамогі па доглядзе за дзецьмі.

Паколькі бацька і маці высноў для сябе не зрабілі, то бабуля малалетніх прасіла абараніць правы і законныя інтарэсы дзяцей, у тым ліку шляхам прыняцця выключнай меры – пазбаўлення бацькоў бацькоўскіх правоў.

У выніку ў суд звярнулася пракуратура Горацкага раёна і непуцёвых дарослых пазбавілі бацькоўскіх правоў. Рашэнне пакуль у законную сілу не ўступіла.

Фотаздымак: пракуратура Горацкага раёна

The post У Горацкім раёне бабуля папрасіла пазбавіць бацькоўскіх правоў дачку і зяця appeared first on Магілёў.media.

Паміж фірмай, дзе працавала жанчына, і арганізацыяй-пастаўшчыком у сакавіку 2024 года быў заключаны дагавор пастаўкі. Пры гэтым доўгі час ён не рэалізоўваўся. Тады знаёмы жанчыны, ён жа дырэктар фірмы-пастаўшчыка, у ліпені 2025 года дамовіўся аб пастаўцы з 5%-ым адкатам ёй. Так і было зроблена – тавар быў пастаўлены, аплочаны, а жанчына 12 жніўня атрымала хабар у 100 рублёў.

Усё было б ціха і спакойна, але дырэктар пайшоў у міліцыю і заявіў на сваю знаёмую, паведаміўшы пра хабар. Ужо ў верасні, пры правядзенні міліцэйскіх мерапрыемсваў, ён зноў перадаў ёй 250 рублёў за тыя ж паслугі – праўда, грошы былі мечаныя і выданыя спецыяльна для таго, каб затрымаць хабарніцу.

На працэсе ў судзе Ленінскага раёна Магілёва жанчына сваю віну прызнала, раскаялася. Ёй прысудзілі два з паловай гады “хатняй хіміі”, штраф у 14 700 рублёў і забарону цягам пяці гадоў займаць кіраўнічыя пасады. Прысуд пакуль у законную сілу не ўступіў.

Фотаздымак з адкрытых крыніц

The post У Магілёве дырэктар даў хабар партнёру і паведаміў у міліцыю appeared first on Магілёў.media.

Дэпутатаў-дэлегатаў, што ехалі на ВНС з плошчы Леніна ў Магілёве, набілася ажно тры аўтобусы. Перад ад’ездам самапрызначаныя дэлегаты ўжо каторы раз распавялі пра свае надзеі на ўласнае лепшае жыццё, якое ім дасць зборышча падхалімаў Лукашэнкі.

Праслаўленне з’езда пачалося задоўга да яго пачатку. Дэлегаты з захапленнем распавядалі пра лёсавызначальныя рашэнні, якія будуць прыняты, у кожным адпаведным і неадпаведным месцы.

Сама адпраўка ў дарогу з плошчы Леніна выглядала даволі камічна. Многія дэлегаты з’явіліся з аб’ёмнымі чамаданамі: ехаць жа цэлых дзве гадзіны і вяртацца не хутка, таму без зменнай бялізны і варанай курыцы, загорнутай у прамаслены нумар “Магілёўскіх ведамасцей”, ніяк не абысціся.  

Віталіся так, быццам не сядзелі разам яшчэ днём у кабінетах аблвыканкама, а сустрэліся пасля доўгага расстання.

Фальшывая радасць у чаканні сустрэчы з Лукашэнкам магла б спаборнічаць па ўзроўні пастановачнасці са знакамітай сцэнай адыходу цеплахода “Міхаіл Святлоў”. 

Хто ведае, што за лікаванне іх яшчэ чакае, калі дэлегаты вернуцца ў Магілёў, падзарадзіўшыся энергіяй ад састарэлага кіраўніка.

Фота: “Магілёўскія ведамасці”

The post Дэлегаты з Магілёва выбылі на “хурал” – з поўнымі чамаданамі і трапяткімі сэрцамі appeared first on Магілёў.media.

Першы ролік з новага турэмнага серыяла Мікалая Дзядка называецца “Помста каракулевых шапак”. Своеасаблівасці расповедам Дзядка надае той факт, што некалькі гадоў таму ён выпусціў сваю першую серыю ролікаў, у якіх падрабязна распавядаў пра магілёўскую “крытую” турму №4, у якой блогер адсядзеў два з паловай гады ў якасці палітзняволенага ў 2012-2015 гадах. Кіраўніцтва турмы, “прадольныя” і іншыя супрацоўнікі адміністрацыі магілёўскай пенітэнцыярнай установы ўжо былі знаёмыя з матэрыяламі блогера і сустракалі яго ў сценах сваёй установы адпаведна. Пастаянныя прыцясненні, прыдзіркі, ціск і дробныя подласці, калі турэмшчыкі самі скідвалі смецце на падлогу і тут жа каралі зняволеных за дрэнную ўборку – новыя турэмныя гісторыі Мікалая Дзядка можна паслухаць па гэтай спасылцы. Усяго палітзняволены абяцае тры ролікі прысвяціць магілёўскаму СІЗА.

Гульня на смерць і сэксуальны гвалт

Папярэдняя серыя ролікаў пра магілёўскую турму налічвала дзесяць ролікаў плюс пасляслоўе. Дзядок пачаў яе ў лютым 2020 года, давёў да дзевяці выпускаў, а два апошніх відэа запісаў ужо ў 2025 годзе, пасля чарговай адсідкі за палітычную актыўнасць у 2020 годзе. 

Відэа Міколы Дзядка пра магілёўскую крытую турму збіралі па некалькі дзясяткаў тысяч праглядаў. Асабліва папулярнымі сталі ролікі пра гульню на смерць у магілёўскім СІЗА ў 2012 годзе, пра прымусовы сэкс за кратамі, альбо, напрыклад, з такой гаваркой назвай: “Как сожрать сокамерника“.

Фота: скрыншот з YouTube-канала Radix

The post Мікола Дзядок распачаў серыю ролікаў пра магілёўскае СІЗА appeared first on Магілёў.media.

Метэаралагічную станцыю ў Асіповічах пабудавалі па дзяржаўнай інвестыцыйнай праграме. 

Адкрывалі яе з пампай ганаровыя госці – старшыня райвыканкама, начальнікі рэспубліканскага і абласнога ўзроўняў, прадстаўнікі мясцовых устаноў і школьнікі – удзельнікі экалагічнага моладзевага грамадскага аб’яднання «Дзеля жыцця на Зямлі».

Сцвярджаецца, што метэастанцыя “у рэжыме рэальнага часу будзе збіраць і перадаваць даныя пра тэмпературу і вільготнасць паветра, хуткасць і напрамак ветру, атмасферны ціск, ападкі і іншыя ключавыя метэаралагічныя параметры”.

Нагадаем, што ў 2019 годзе Лукашэнка паскардзіўся, што не можа даведацца, якое надвор’е чакаецца ў бліжэйшыя некалькі дзён. У сувязі з гэтым паабяцаў прывесці ў пачуцце або разагнаць беларускіх метэаролагаў.

Змянілася з таго часу нешта ці не – невядома. Магчыма, асіповіцкая ўстаноўка дазволіць даведацца нешта новае пра надвор’е.

Фота раённай газеты.

The post У Асіповічах урачыста адкрылі метэастанцыю appeared first on Магілёў.media.

Пісьменнікі Магілёўшчыны, “чыя творчасць складае залаты фонд рэгіянальнай і нацыянальнай літаратуры”, падвялі вынікі года.

Старшыня суполкі Аляксандр Казека распавёў, што аўтары:

• вялі актыўную асветніцкую працу;
• сустракаліся з чытачамі ў гарадскіх, раённых і сельскіх школах і бібліятэках;
• удзельнічалі ў літаратурных чытаннях і памятных мерапрыемствах;
• правялі мноства прэзентацый новых кніг.

Усё правільна: калі пісьменнікаў ні многа ні мала – сорак душ, то і кніг за год павінна быць напісана не менш за дзясятак. Інакш атрымаецца нейкі творчы застой.

Дзіўна, што дакладную колькасць раманаў, што выйшлі з-пад пёраў магілёўскіх сапернікаў Айзека Азімава і Дзіна Кунца, Казека не ўдакладніў.

Затое паведаміў, што ў 2025 годзе ад Магілёўскай вобласці ў Саюз уступілі знакамітыя літаратары Віктар Кубека і Анатоль Папейка.

Дарэчы, два пісьменнікі – гэта гадавы ліміт для кожнай вобласці, устаноўлены праўладным саюзам літаратараў. 

Відавочна, ёсць асцярогі, што калі прымаць усіх ахвотных, кніжныя паліцы бібліятэк вобласці рухнуць пад цяжарам свежанапісаных жамчужын сусветнай літаратуры

Фота: “Магілёўскія ведамасці”.

The post У Магілёўскай вобласці налічылі 40 пісьменнікаў appeared first on Магілёў.media.

Падатковая інспекцыя па Асіповіцкім раёне сур’ёзна ўзялася за мясцовых таксістаў. 

Праверка ўстанавіла “парушэнні парадку прыёму сродкаў плацяжу і парушэнне парадку выкарыстання касавага абсталявання, аўтаматычных электронных апаратаў, гандлёвых аўтаматаў, плацежных тэрміналаў, выкарыстання і ўліку сродкаў кантролю, прызначаных для ўстаноўкі на касавае абсталяванне”.

Да адміністрацыйнай адказнасці прыцягнута 26 чалавек. Агульная сума штрафаў склала 10,8 тысячы рублёў.

Фота ілюстрацыйнага характару з адкрытых крыніц.

The post У Асіповічах масава аштрафавалі таксістаў appeared first on Магілёў.media.

Абвешчаны Генеральнай Асамблеяй ААН у гонар прыняцця Міжнароднай канвенцыі аб абароне правоў мігрантаў і членаў іх сем’яў.

Да нападу Расіі на Украіну кожны 35-ы зямлянін быў мігрантам. Мігранты ёсць сярод насельніцтва ўсіх краін. Па розных падліках, з Беларусі эмігравала каля 500 000 чалавек. Большасць з іх – з-за палітычнага пераследу. Гэьтая колькасць павялічваецца за кошт прымусовай дэпартацыі палітзняволеных.

Больш за 200 мільёнаў чалавек ва ўсім свеце жывуць і працуюць не ў сваёй краіне. Часта яны сутыкаюцца з сур’ёзнымі праблемамі, нягледзячы на тое, што ўзбагачаюць абшчыны, якія іх прымаюць, вопытам, ведамі і людскімі рэсурсамі. 

Штогод эмігранты пераводзяць у краіны свайго паходжання 300 мільярдаў долараў. Такія пераводы з’яўляюцца для многіх краін адной з асноўных крыніц замежнай валюты і важным складальнікам іх валавога нацыянальнага прадукту.

Міжнародны дзень арабскай мовы (International Day of the Arabic Language, з 2012 года).  

Заснаваны ААН «для святкавання шматмоўя і культурнай разнастайнасці, а таксама для садзейнічання раўнапраўнага выкарыстання ўсіх шасці афіцыйных моў Арганізацыі».

З 8 мільярдаў жыхароў Зямлі, арабская мова з’яўляецца роднай 310 мільёнам, другой мовай – яшчэ 270 мільёнам чалавек. Гэта афіцыйная мова ААН.

Дзень Савы (народны каляндар). 

Міколін бацька. «Сава мосьце, а Мікола цвікі забівае». 

Даўней на Саву надвор’е даведваліся не выходзячы з хаты: чырвоны агонь у печы ды дровы трашчаць,  на двары сцюжа лютая.

Калі дым слупам – да марозу, калі дым поцягам – да непагадзі, калі дым без ветра б’е да зямлі – чакай снягі.

З Савы ўсталёўваецца трывалы санны шлях і нельга лаяцца таму гаспадару, у каго ёсць конь.

На дзень Савы працаваць грэх, святога пакрыўдзіш.

1542 год. Памёр  Станіслаў Гаштольд. 

Вялікалітоўскі дзяржаўны дзеяч, ваявода новагародскі, троцкі.

Быў жанаты на Барбары Радзівіл, якая пазней стала жонкай караля Жыгімонта II Аўгуста.

Са смерцю Станіслава род Гаштольдаў згас. Родавыя маёнткі перайшлі да вялікіх князёў літоўскіх, на іх аснове былі створаны Трабскае, Радашковіцкае, Валожынскае і Любчанскае староствы.

Паводле М. Улашчыка, найбольш верагодны ініцыятар стварэння легендарнай гісторыі пра пачаткі ВКЛ, запісанай у беларуска-літоўскіх летапісах.

З 1636 года 18 снежня – дзень гарадскіх выбараў у Магілёве эпохі магдэбургскага права

У XVII ст. Магілёў жыў паводле магдэбургскага права. Уся факіычная ўлада ў горадзе належыла гарадскому магістрату. Паводле даследаванняў, пачынаючы з 1636 года выбары гарадской рады праходзілі ў два этапы:

• 18 снежня мяшчане выбіралі па 12 «лепшых мужоў» ад купцоў і цэхавых рамеснікаў;
• 20 снежня ужо гэтыя «лепшыя мужы» збіраліся на сесію і фармавалі склад гарадской рады.
  

1842 год. Створана Ковенская губерня. 

У яе ўвайшлі паветы Віленскай губерні з пераважна балтамоўным сялянскім насельніцтвам.  Губерня існавала да 1917 года і мела неафіцыйную назву  «Самагіція» («Жамойць», «Жмудзь»). 

Мела плошчу 40 641,36 км². У склад гэтай адзінкі ўваходзіла 7 паветаў, у тым ліку Новааляксандраўскі, які да 1836 года меў назву Браслаўскі. Зараз на частцы павета знаходзіцца Браслаўскі раён Віцебскай вобласці.

1882 год. Пачалі працаваць першыя на Беларусі тэлефонныя лініі. 

Яны  запрацавалі ў Гомелі і злучылі гомельскі маёнтак князя Ф. Паскевіча з яго палацам, фабрыкамі і фальваркамі. Гэта адбылося праз 6 гадоў пасля атрымання патэнту А. Бэлам на вынаходніцтва тэлефона (1876). 

У Мінску  першая тэлефонная станцыя пабудавана ў 1890 годзе на вуліцы Губернатарскай (зараз Леніна). Першая міжгародная сувязь з’явілася толькі ў 1908 годзе паміж Мінскам, Смалявічамі і Барысавам. 

Есць непадцверджаныя даныя, што першы телефон з’явіўся ў Магілёве ў 1878 годзе. Але, у энцыклапедычным даведніку “Магілёў” (1990) даецца дата – 1905 год.

1883 год. Нарадзіўся Мікалай Бонч-Асмалоўскі. 

Беларускі і расійскі савецкі мастак і расійскі мастак-манументаліст, жывапісец, графік.

Паходзіў са старажытнага беларускага шляхецкага роду. Аўтар жанравых, пейзажных («Мінск. Рака Свіслач»), партрэтных прац, працаваў у жанры ню. Вынаходнік запатэнтаваных новых відаў фарбаў.

Займаўся і кніжнай ілюстрацыяй. У яго афармленні выйшла некалькі твораў класікаў рускай літаратуры: «Дэман» М. Ю. Лермантава, а таксама казкі А. Пушкіна і П. Яршова. Займаўся сцэнаграфіяй.

Вядомы яго эскізы да опер А. Барадзіна, М. Рымскага-Корсакава, А. Сярова.

У 1936 годзе рэпрэсаваны НКУС. Знаходзіўся ў Сегежлагу, у сібірскай ссылцы.

Карціны мастака прадстаўлены ў Траццякоўскай галерэі, мастацкім музеі імя А. Пушкіна.

Памёр 23 жніўня 1968 года.

1904 год. Адкрыццё царкоўна-археалагічнага музея ў Магілёве

У гэты дзень у Магілёве ўрачыста адкрылі другі гарадскі музей – царкоўна-археалагічны, створаны вядомым этнографам і археолагам Еўдакімам Рамонавым разам з паплечнікамі.

У збор трапілі старажытныя іконы, рукапісныя і друкаваныя кнігі XV–XVIII стст., царкоўныя тканіны, каштоўныя літургічныя рэчы. Музей размяшчаўся ў былым бернардзінскім касцёле. Пасля 1918 г. ён быў аб’яднаны з губернскім музеем, спадкаемцам якога з’яўляецца сённяшні Магілёўскі абласны краязнаўчы музей імя Е. Р. Раманава.

1917 год. У Мінскім гарадскім тэатры распачаўся Першы Усебеларускі з’езд. 

Праходзіў 18 снежня па новым стылі, 5-га па старым. Прысутнічала 1872 дэлегаты пераважна сацыялістычнай арыентацыі ад усіх населеных беларусамі губерняў.

З’езд абвясціў права на самавызначэнне і прыняцце дэмакратычнай формы ўраду, прызнаў савецкую ўладу, рэспубліканскі лад, цэнтральны ўрад бальшавікоў у Маскве. Патрабаванняў незалежнасцi Беларусі не агучвалася.

Былі абраны Рада Кангрэсу і Выканаўчы Камітэт, утвораны Усебеларускі Савет сялянскіх, салдацкіх, рабочых дэпутатаў.

Нягледзячы на падтрымку У. Леніна і І. Сталіна, з’езд быў гвалтоўна разагнаны бальшавікамі А. Мясніковым, В. Кнорыным, К. Ландэрам.

Рада сышла ў падполле. На адным з падпольных пасяджэнняў быў выбраны Выканаўчы камітэт Рады з’езду з 17 чалавек на чале з Язэпам Варонкам. Пазней гэтыя структуры адыгралі важную ролю ў абвяшчэнні БНР.

31 студзеня 1918 года паводле дэкрэта Леніна ў Народным камісарыяце па нацыянальных справах на чале са Сталіным, стварылі Беларускі нацыянальны камісарыят, які адыграў выключную ролю ў стварэнні беларускай савецкай дзяржаўнасцці.

1928 год. Нарадзіўся Эдуард Загарульскі. 

Беларускі гісторык, археолаг, доктар гістарычных навук, прафесар. Заслужаны работнік вышэйшай школы.

Даследчык гісторыі старажытных гарадоў, замкаў і курганных магільнікаў перыяду ранняга і развітога Сярэднявечча, этнічнай гісторыі Беларусі і праблем паходжання і рассялення славян.

Працаваў у Інстытуце гісторыі АН БССР, БДУ, загадчыкам кафедры археалогіі, дэканам гістарычнага факультэта

Падчас раскопак Мінска даследаваў яго абарончыя збудаванні і забудову, зрабіў рэканструкцыю ўсходняй часткі замчышча і жылых будынкаў, даследаваў раннефеадальны замак Вішчын, пры раскопках якога выяўлены ўнікальны на тэрыторыі Беларусі грашова-рэчавы скарб XII-XIII стагоддзяў.

Аўтар звыш 100 навуковых работ, у тым ліку 10 манаграфій і брашур.

1935 год. Памёр Альбрэхт Антоні Радзівіл. 

Палітычны дзеяч, шаснаццаты нясвіжскі ардынат. Палітычны дзеяч, адзін з лідараў «віленскіх кансерватараў». Падтрымліваў БНР.

Прыхільнік беларускай нацыянальнай ідэі, выдатна ведаў беларускую мову. Сябе вызначаў як «тутэйшы».

Падчас Першай сусветнай вайны дазволіў на тэрыторыі Нясвіжскага замка размясціць шпіталь, штаб 2-й рускай арміі. Арганізатар у Нясвіжы з’езда Радзівілаў (1915), на якім было вырашана фінансаваць стварэнне польскіх вайсковых часцей у расійскай арміі.

У 1926 годзе на яго жыццё зрабіў замах з засады будучы Герой Савецкага Саюза і старшыня кіраўскага калгаса “Рассвет” Кірыл Арлоўскі.

З’яўляўся дзеячам Віленскага таварыства дабрачыннасці. Фінансава падтрымліваў школы, студэнтаў, артыстаў, касцёлы. Займаўся аднаўленнем Нясвіжскага замка

 Пахаваны ў радавой спачывальні.

У дні пахавання гатэлі Нясвіжа і замкавыя пакоі не змаглі змясціць усіх людзей, якія прыехалі развітацца з Радзівілам. Перад жалобным картэжам салдаты 27-га Нясвіжскага ўланскага палка неслі вянкі ад былога імператара Германіі Вільгельма ІІ, прэзідэнта Італіі, кіраўнікоў іншых дзяржаў.

1969 год. Памёр Пятро Глебка. 

Беларускі грамадскі дзеяч, навуковец, паэт, драматург, перакладчык. Акадэмік АН БССР. К. Чорны пісаў: “Ён самы асвечаны і культурны з усіх сённяшніх жывых беларускіх пісьменнікаў і самы большы абладальнік яснай думкі… Яго талент узбагачан думкаю, ясным розумам”. 

Узначальваў групу па складанні «Руска-беларускага слоўніка», інстытуты мовазнаўства, мастацтвазнаўства, этнаграфіі і фальклору.

2019 год. У Магілёўскай вобласці адноўлены рэкорды па плюсавых тэмпературах:  

Магілёў       +6°С (да гэтага рэкорд +5,2°С 18 снежня 1972),

Бабруйск     +6,7°С (+5,8°С, 2011 год),

Горкі       +5,3°С (+4,7°С, 1932 год),

Мсціслаў      +5,7°С (+4,2°С, 2011 год),

Слаўгарад +6,1°С (+5,4°С, 1972 год).

The post Дзень у гісторыі. 18 снежня. Дзень выбараў у магдэбургскім Магілёве appeared first on Магілёў.media.

Сёння, 17 снежня, магілёўскі клуб сярэдневяковай культуры “Барысфен” быў прызнаны Міністэрствам унутраных спраў “экстрэмісцкім фармаваннем” – паведамляе “Вясна”. Клуб «Барысфен» быў заснаваны яшчэ ў канцы 1990-х гадоў і ўваходзіць у структуру Магілёўскага гарадскога цэнтра культуры і адпачынку і мае званне Народнага калектыва. Касцюмаваныя выступленні ўдзельнікаў клуба дзесяцігоддзямі ўпрыгожвалі галоўныя гарадскія вулічныя святы і акцыі, шматлікія мерапрыемствы ў Магілёве і вобласці.

Заснавальніка і бяссменнага кіраўніка клуба Паўла Пастухова (пазней – Станкевіча) затрымалі больш за месяц таму, ён адсядзеў двойчы па 15 сутак – пісалі mogilev.media. Паводле інфармацыі ад розных крыніц, пасля адсідкі Павел быў адпушчаны на волю. Але прыкладна ў той жа самы дзень, калі дайшла інфармацыя пра тое, што ён на свабодзе, з’явілася новая – паводле якой, Паўла зноў затрымалі.

Паводле непацверджаных звестак, над ім зноў адбыўся адміністрацыйны суд. У якім статусе ён знаходзіцца зараз – невядома. Цалкам магчыма, што прызнанне рыцарскага клуба “экстрэмісцкім фармаваннем” прывядзе да крымінальнага пераследу самаго Паўла Пастухова (Станкевіча) і яго паплечнікаў. Паводле МУС, дачыненне да клуба маюць Павел Станкевіч, Павел Лішанкоў, Дзмітрый Далячка.

The post Рыцарскі клуб “Барысфен” Магілёўскага ГДК прызнаны “экстрэмісцкім фармаваннем” appeared first on Магілёў.media.

«Строммашына», калісьці была гонарам Магілёва, з 2015 года спрабавала дыверсіфікаваць вытворчасць, знайсці новыя рынкі збыту, але гэтыя спробы не прынеслі поспеху.

Санацыя прадпрыемства цягнулася з 2015 па 2023 год і… Як гэта часта бывае з лукашэнкаўскімі санацыямі, прывяла да канчатковага банкруцтва завода і продажу яго маёмасці з малатка.

Заводская прахадная, якая вывела ў людзі многіх з “моцных гаспадарнікаў”, што цяпер кіруюць Магілёўскай вобласцю, канчаткова зачынілася ў сакавіку 2023 года.

Цяпер на тэрыторыі былога завода ўлады рэалізуюць “амбіцыйны” праект, які дасць гораду новыя працоўныя месцы і новы фармат для шопінгу і сямейнага адпачынку.

Такім чынам, сем гектараў, над якімі калісьці гучаў завfдскі гудок, зноў узяты магілёўскімі чыноўнікамі пад “поўны кантроль”.

Намеснік старшыні Магілёўскага гарвыканкама Антон Бельскі сцвярджае, што зноў каардынуе працэс.

Чым заканчваюцца падобныя “каардынацыі”, мы ўжо ўбачылі на прыкладзе завода. Не-не, праект «Строммаш‑City», канечне, рэалізуюць, ён дасць магілёўцам 500 працоўных месцаў, ды і прамысловы патэнцыял “Строммашыны” захоўваюць у выглядзе магілёўскага філіяла БЕЛАЗа.

Але навошта рабіць выгляд, што ўсё добра і банкруцтва “Строммашыны” з самага пачатку было часткай геніяльнага плана банды Лукашэнкі?

Давайце цяпер падлічым, колькі яшчэ патэнцыйных пляцовак для забаў ёсць у Магілёве, і спынімся на двух асноўных.

Прыстаўка “City” выдатна падыдзе для ААТ “Магілёўліфтмаш”, якое нядаўна праваліла заданне па экспарце. І стабільна стратнае ААТ “Магілёўхімвалакно” таксама цалкам саспела для пераўтварэння ў забаўляльную пляцоўку.

Ну, а ўвесь аграпрамысловы комплекс Магілёўскай вобласці хоць цяпер аддавай пад шопінг і сямейны адпачынак. 

У калгасы пачнуць прыязджаць турысты. Яны будуць разглядаць разваленыя кароўнікі, а экскурсаводы распавядуць ім пра тое, як трыццаць гадоў неабгрунтаваных амбіцый і эканамічнай безграматнасці прывялі да таго, што краіна ператварылася ў вялікую забаўляльную пляцоўку.

Фота “Беларусь Сегодня”.

The post Перазагрузка гарадской прасторы ў Магілёве: на месцы прадпрыемства-банкрута можна будзе забаўляцца appeared first on Магілёў.media.