Category: Раёны

Наш адказ лорду Керзану – прэс для саломы робяць у Бабруйску

Навіна ад

На полі ў Бярозаўскім раёне Брэсцкай вобласці 31 ліпеня Лукашэнку паказалі доследны ўзор камбінаванага рулоннага прэс-падборшчыка. Машыну сабралі на «Бабруйскаграмашы»: тэхніка, якой у беларускім полі не хапае больш за ўсё, прыехала на брэсцкае поле з Магілёўскай вобласці.

Размова пра яе пачалася з саломы. Пралятаючы над рэгіёнам, дзед заўважыў, што значныя аб’ёмы з палёў да гэтага часу не вывезены. Араць і сеяць рапс трэба ўжо заўтра, а поле занята. Навіна так сабе – пра беларускі прэс-падборшчык Лукашэнка мроіў з маладосці. І вось старому за семдзесят, а салома ўсё яшчэ ляжыць на палях.

Што паказалі на полі:

  • узровень лакалізацыі першага доследнага ўзору перавышае 70 працэнтаў, у другога эксперыментальнага – больш за 80;
  • раму, адзін з самых складаных элементаў, рабілі на даччыным прадпрыемстве «Гомсельмаша»;
  • уласная распрацоўка – сістэма кіравання і гідрасістэмы, менавіта на гэтым завод і разлічвае выйграваць у цане ў замежных машын;
  • агрэгат прэсуе кармавыя і тэхнічныя культуры, абмотвае рулоны сеткай і стрэтч-плёнкай.

Лічба пра лакалізацыю чытаецца і наадварот. Больш за 70 працэнтаў свайго азначае, што амаль трэць машыны, якую называюць айчыннай, прыехала з-за мяжы. Яшчэ адзін прэс, паказаны тут жа, сабраны ў Брэсцкай вобласці з імпартных камплектуючых, і лакалізацыя ў яго пакуль 30 працэнтаў, з абяцаннем давесці яе да 60 у наступным годзе.

Выпрабаванні бабруйскага ўзору плануюць завяршыць у гэтым годзе, доследную партыю і серыйную вытворчасць абяцаюць у 2027-м.

Пры гэтым «першы айчынны прэс-падборшчык» на заводзе паказвалі віцэ-прэм’еру Віктару Каранкевічу яшчэ ў верасні 2025 года, а патрабаванне яго зрабіць прагучала летам таго ж года: прэс тады назвалі пытаннем жыцця і смерці. З таго часу прайшло больш за год, а машына па-ранейшаму доследная.

Патрэбу беларускага рынку Мінсельгасхарч ацэньвае больш чым у 2,2 тысячы высокапрадукцыйных прэсаў. Каб яе закрыць, трэба выпускаць каля 300 машын за год. «Бабруйскаграмаш» на наступны год плануе 50 адзінак – адну шостую ад гадавой нормы. Абяцана, што далей падключацца і іншыя прадпрыемствы краіны.

Віцэ-прэм’ер Юрый Шулейка назваў бабруйскую распрацоўку аналагам найлепшага еўрапейскага прэса.

Найлепшы ці не – час пакажа. А пакуль зразумела толькі адно – яшчэ адзін пакет санкцый можа перакрыць канал паставак імпартных запчастак, і тады айчынны прэс-падборшчык не зрушыцца з месца – на адной толькі гомсельмашаўскай раме далёка не паедзеш.

Фота ведамаснага сайта Лукашэнкі.

Горацкі райсуд прызнаў “экстрэмісцкім” сайт найбуйнейшага польскага інфармагенцтва

Навіна ад

Сайт Польскага агенцтва друку цяпер лічыцца “экстрэмісцкім матэрыялам” у Беларусі. Такое рашэнне прыняў суд Горацкага раёна.

Паводле суддзяў у Горках, “экстрэмісцкай” стала інфармацыйная прадукцыя інтэрнэт-рэсурсу з назвай “POLSKA AGENCJA PRASOWA”, які мае ідэнтыфікатар https://www.pap.pl. Рашэнне аб гэтым было прынята 28 ліпеня 2026 года.

PAP з’яўляецца найбуйнейшым інфармагенцтвам Польшчы, якое працуе ўжо больш за сто гадоў. Больш за тое, будучы публічным агенцтвам, яно абавязана ў тым ліку распаўсюджваць пазіцыі Сейма, Сената, урада, прэзідэнта і іншых дзяржорганаў па важных пытаннях.

Інфармацыю PAP часта выкарыстоўваюць не толькі польскія і сусветныя медыя, але нават лукашэнкаўскія прапагандысты. Так, на сайце Дзяржаўнага агенцтва БЕЛТА можна знайсці мноства паведамленняў са спасылкай на PAP, у тым ліку распаўсюджаных апошнім часам. 

Горацкі райсуд адназначна прыцягнуў да сябе ўвагу ў Польшчы такім дзікунскім рашэннем. “Рашэнне беларускага суда разглядаецца як спроба абмежаваць доступ да дакладнай і незалежнай інфармацыі. Польскае інфармацыйнае агенцтва працягне асвятляць падзеі ў Беларусі ў адпаведнасці са стандартамі прафесійнай журналістыкі. Гэта рашэнне не зменіць нашы правілы або тое, як мы працуем. Мы з асаблівай адказнасцю падыходзім да бяспекі нашых крыніц і атрымальнікаў у Беларусі” – заявіў генеральны дырэктар PAP Марэк Блоньскі.

Фотаздымак: Lukas Plewnia, CC BY-SA 2.0 / Wikimedia Commons, polen-heute.de

Чавускага вадзіцеля чакае суд за смерць пешаходаў пад коламі яго аўтобуса

Навіна ад

Вадзіцель аўтобуса, што пакаціўся і смяротна траўмаваў двух састарэлых пешаходаў у Чавусах, пойдзе пад суд за парушэнне правіл дарожнага руху.

Нагадаем, трагедыя адбылася раніцай 16 траўня 2026 года на аўтастанцыі Чавусаў. Вадзіцель не заглушыў рухавік, не прыняў мер па недапушчэнні адвольнага руху аўтобуса і пакінуў яго, пайшоўшы адзначаць пуцявы ліст. Аўтобус пакаціўся і наехаў на сямейную пару 70 і 66 гадоў, якія ішлі па пляцоўцы аўтастанцыі і не маглі заўважыць аўтобус. У выніку наезду людзі загінулі.

Як высвятліла следства, мужчына быў вельмі заняты размовай па мабільным тэлефоне і таму не выключыў рухавік аўтобуса і не паставіў транспартны сродак на стаяначны тормаз.

Пракуратура накіравала справу ў суд. Паводле ч.3 арт.317 КК РБ вадзіцелю пагражае ад трох да сямі гадоў зняволення. Мужчына зараз знаходзіцца пад падпіскай аб нявыездзе.

Скрыншот: ТГ Следчага камітэта

Спалохаўся ветлівай адмовы. У Асіповічах п’яны мужчына ўдарыў хлопца бутэлькай па галаве

Навіна ад

Пакуль пра Асіповічы разважаюць у сувязі з размешчанымі там расійскімі ракетнымі комплексамі, звычайнае жыццё ў горадзе ідзе сваёй чарадой.

Трыццацішасцігадовы мужчына ўвесь вечар піў дома з прыяцелем. Калі бутэлька апусцела, пара паехала па дабаўку – на электрасамакаце, каб хутчэй. У краме ўзялі спіртное і закуску, на зваротным шляху мужчына заўважыў хлопцаў на лаўцы і паспрабаваў завязаць размову. У размове яму ветліва адмовілі.

Далей, калі верыць міліцэйскай зводцы, п’янаму мужчыну здалося, што хлопцы збіраюцца напасці і адабраць самакат. Ён размахнуўся і ўдарыў аднаго з іх па галаве бутэлькай – той самай, якую толькі што купіў. Затрымалі гаваркога задзіру проста на месцы, цяпер мужчыне пагражае крымінальная адказнасць за хуліганства.

Фота «МагілёўАнлайн».

Паехаў на рыбалку з сынам. У Бабруйскім раёне патануў мужчына

Навіна ад

У вёсцы Саломенка Бабруйскага раёна патануў мужчына 1958 года нараджэння. Напярэдадні раніцай ратавальнікі атрымалі паведамленне пра яго знікненне: ён адправіўся на рыбалку разам з сынам і не вярнуўся. Цела знайшлі за тры з паловай метры ад берага, на глыбіні паўтара метра.
Абставіны гібелі высвятляюцца, праверку па факце здарэння праводзіць Бабруйскі міжраённы аддзел Следчага камітэта.
 Для Магілёўскай вобласці гэта не адзінкавы выпадак. За першае паўгоддзе на вадаёмах рэгіёна патанулі чатырнаццаць чалавек, у тым ліку двое дзяцей. Годам раней загінулых было васямнаццаць, але дзіцячых смерцяў на вадзе не фіксавалася зусім. Выратаваць за тое ж паўгоддзе ўдалося васямнаццаць чалавек – удвая больш, чым у 2025 годзе.

Фота ілюстрацыйнага характару.

Жыхара Клімавіцкага раёна будуць судзіць за кантрабанду патронаў з Расіі

Навіна ад

Патроны для агнястрэльнай зброі нелегальна прывёз з Расіі жыхар Клімавіцкага раёна, які займаўся браканьерствам.

Справа пра незаконную рыбалку ў Клімавіцкім раёне нечакана перарасла ў абвінавачанне адразу па трох крымінальных артыкулах. Падчас ператрусу ў аднаго з падазраваных знайшлі больш за паўсотні патронаў, якія, як высветлілася, ён прывёз з Расіі.

Паводле матэрыялаў следства, 47-гадовы жыхар аднаго з аграгарадкоў разам са знаёмым паставіў у вадаёме сеткі. Іх здабычай сталі амаль чатыры дзясяткі рыб – сярод іх срэбныя і залатыя карасі, а таксама ліні. Аднак мужчыны трапілі ў поле зроку супрацоўнікаў інспекцыі аховы жывёльнага і расліннага свету, пасля чаго супраць іх распачалі крымінальную справу.

Падчас агляду дома аднаго з фігурантаў супрацоўнікі міліцыі і інспекцыі знайшлі больш за пяцьдзясят патронаў. Боепрыпасы накіравалі на балістычную экспертызу ў Дзяржаўны камітэт судовых экспертыз па Магілёўскай вобласці. Эксперты прыйшлі да высновы, што гэта прыдатныя для стральбы малакаліберныя патроны калібру 5,6×16R прызначаны для наразной спартыўнай і паляўнічай агнястрэльнай зброі.

Сам мужчына не стаў адмаўляць, што патроны належалі яму. Ён прызнаўся, што знайшоў іх у доме свайго знаёмага ў Смаленскай вобласці. Замест таго каб паведаміць пра знаходку або пакінуць яе на месцы, забраў патроны з сабой і перавёз праз беларускую мяжу.

Менавіта гэтая акалічнасць дадала да справы яшчэ два крымінальныя артыкулы – за незаконнае захоўванне боепрыпасаў і іх незаконнае перамяшчэнне праз дзяржаўную мяжу Беларусі.

Цяпер матэрыялы следства перададзены ў суд Клімавіцкага раёна.

Фотаздымак: sudexpert.gov.by

Бесгаспадарчасць у Глуску лечаць бетонам

Навіна ад

Будаваць у Глускім раёне сталі ўдвая больш актыўна. За першае паўгоддзе будаўніча-мантажных работ тут выканалі амаль удвая больш, чым за той жа час летась, а агульны аб’ём інвестыцый вырас усяго на восем працэнтаў. Новыя грошы ў раён, выходзіць, не прыйшлі, іх проста пераклалі ў будаўніцтва. Засталося зразумець, у што менавіта. Можа, у дамы для людзей?

У маі ў Глускі раён прыехаў Дзмітрый Круты, кіраўнік адміністрацыі Лукашэнкі, і глядзеў, як тут узводзяць прафілакторыі для цялят. Іх будуюць адразу пяць:

  • прафілакторый на 236 цялят каля аграгарадка Калатзічы;
  • рэканструяваны малочна-таварны комплекс каля вёскі Дуброва;
  • яшчэ тры прафілакторыі ў гаспадарках раёна.

Навошта раёну столькі новых цялятнікаў, растлумачыў у лютым старшыня Магілёўскага аблвыканкама. Анатоль Ісачанка назваў тры раёны вобласці, дзе буйная рагатая жывёла гіне часцей за ўсё, і Глускі быў сярод іх.

Прычыну ён сфармуляваў без дыпламатыі: «элементарнае невыкананне тэхналогій і бесгаспадарчасць». І асобна агаварыўся, што маразы тут ні пры чым.

Значыць, бесгаспадарчасць лечаць у Глуску бетонам. Бетон, праўда, бывае розны. Той, якім у кіно заліваюць ногі ў тазіку, закрывае пытанне канчаткова, а гэты закрывае толькі паказчык.

Ні тэхналогія, ні ўменне гаспадарыць у камплекце з прафілакторыем не пастаўляюцца, але ў справаздачы ўсё будзе лічыцца перамогай над бесгаспадарчасцю.

Фота БелТА.

Распродаж нізкаякаснага абутку Belwest у Бабруйску выклікаў вялікі ажыятаж

Навіна ад

Знізіўшы цэны ў разы на летні абутак у Бабруйску прадпрыемства-банкрут Belwest выклікала вялікі ажыятаж у мясцовых жыхароў.

У інтэрнэце з’явілася відэа, як бабруйчане сталі вялічэзным натоўпам каля магазіна Belwest па вуліцы Дзяржынскага 45, дзе з 24 па 26 ліпеня 2026 года праходзіў распродаж абутку з вялікімі зніжкамі. Звяртаючы ўвагу на агромністую чаргу многія мінакі, а потым і карыстальнікі сеціва былі здзіўленыя масштабамі ажыятажа, піша BGmedia.

“Ды ўжо, такое пачуццё, што ў нас у горадзе людзі галодныя і босыя», «Амаль як у Доме адзення ў 80-х за «Аляскамі», «Праходзіла міма, убачыла такі натоўп людзей. Заўсёды здзіўляюся гэтаму… Няўжо людзям не лянота стаяць дзень у чарзе??? І не факт, што там ёсць нешта годнае”, – дзеляцца меркаваннямі гараджане.

Пры гэтым былі і паведамленні ад людзей, якія былі расчараваныя асартыментам распродажу. “Сяброўка сёння прастаяла 3 гадзіны ў чарзе і выйшла ні з чым! Кажа, што кошты ад 100 і вышэй, глядзець няма на што!» – напісала адна жанчына.

Разам з тым зніжкі на абутак у бабруйскім магазіне Belwest сапраўды ўражвалі. Цэні ўпалі ў тры-чатыры разы, у некаторых выпадках з трохзначных да двузначных лічб.

Варта адзначыць, што сёлета віцебскае абутковае прадпрыемства Belwest абвесціла сябе банкрутам. Яго склады завалены прадукцыяй, якая нікому не патрэбна. У сваю чаргу даўгі кампаніі склалі 259 млн рублёў. Зараз Belwest знаходзіцца ў працэдуры санацыі.

Фотаздымак: Instagram BGmedia

Па дзвесце рублёў за кожнага рака з 740 заплаціць мсціслаўскі браканьер

Навіна ад

У рыбалоўных угоддзях Мсціслаўскага раёна затрымалі мужчыну, які здабываў шырокапалага рака – від, занесены ў Чырвоную кнігу Беларусі, лоўля якога цалкам забароненая. Пры браканьеры было 17 ракаловак.

Улоў склаў 740 асобін агульнай вагой 24,5 кілаграма. Шкода навакольнаму асяроддзю ацэнена ў 3 330 базавых велічынь: пры цяперашнім памеры базавай велічыні ў 45 рублёў гэта каля 150 тысяч рублёў, або больш за дзвесце рублёў за аднаго рака.

Жывымі ў натуральнае асяроддзе пражывання выпусцілі 411 асобін – астатнія 329 не выжылі.

Затрыманы растлумачыў, што пра статус рака ведаў і здабываў яго дзеля нажывы: ракамі ён разлічваўся з людзьмі за аказаныя яму паслугі – выкарыстоўваў іх, паводле ўласных слоў, як жывую валюту.

Мсціслаўскі раённы аддзел Следчага камітэта ўзбудзіў крымінальную справу.

Фота з ведамаснага сайта Дзяржаўнай інспекцыі аховы жывёльнага і расліннага свету.

Гатовы стаць гаспадаром: магчыма, віцебскі АМАП затрымаў былога кіраўніка Клімавіцкага раёна

Навіна ад

Дваццаць сёмага ліпеня МУС і Генеральная пракуратура абвясцілі пра выкрыццё карупцыйнай схемы, якая ахапіла аграпрамысловы і паліўна-энергетычны комплексы, ЖКГ, будаўніцтва, транспарт і адукацыю: 44 фігуранты ва ўзросце ад 31 да 65 гадоў, 45 крымінальных спраў, хабар ад удзельнікаў тэндараў на агульную суму больш за 750 тысяч рублёў. Арганізатарам сілавікі называюць заснавальніка шэрагу камерцыйных фірмаў, які распрацаваў формулу разліку ўзнагароджанняў; падчас ператрусаў у яго канфіскавалі дакументы «чорнай бухгалтэрыі».

Асобна ў тым паведамленні адзначана: сярод фігурантаў – прадстаўнікі дванаццаці сельскагаспадарчых прадпрыемстваў, якія атрымалі 320 тысяч рублёў за пастаўкі энергетычнага абсталявання.

Што адбылося ў «Рудакове»

Дваццаць дзявятага ліпеня прэс-служба МУС распаўсюдзіла відэа: байцы АМАПа кладуць на падлогу службовага кабінета мужчыну ў блакітнай кашулі, а потым выводзяць яго па калідоры са скаванымі за спіной рукамі. Ні прозвішча, ні назвы прадпрыемства ў паведамленні няма – толькі тое, што затрыманы 45-гадовы дырэктар сельскагаспадарчай арганізацыі ў Віцебскай вобласці.

Паводле версіі сілавікоў, ён неаднаразова атрымліваў грошы ад прадстаўнікоў прыватных фірмаў за заключэнне дамоваў на арэнду будаўнічай тэхнікі, а таксама на пастаўку халадзільнага абсталявання, кандыцыянераў і сістэм відэаназірання.

Прозвішча затрыманага не названа, аднак віцябляне сцвярджаюць, што месца дзеяння – кабінет дырэктара камунальнага сельскагаспадарчага ўнітарнага прадпрыемства «Рудакова» Міхаіла Уладзіміравіча Дзямідава (на фота злева). Узрост і пасада таксама супадаюць.

Бліскучая кар’ера

Хто ж такі Міхаіл Дзямідаў, які займаў шэраг кіруючых пасад у Магілёўскай і Віцебскай абласцях?

Ён нарадзіўся 24 чэрвеня 1981 года ў вёсцы Крапіўна Аршанскага раёна. У 1999-м скончыў Аршанскае прафесійна-тэхнічнае вучылішча перапрацоўчай прамысловасці № 39, адслужыў у войску і «некаторы час працаваў на розных пасадах у арганізацыях Аршанскага раёна».

Зразумела, што пасля ПТВ пасады Дзямідава былі не міністэрскімі.

Аднак у 2011 годзе, у трыццаць гадоў, Міхаіл Уладзіміравіч заканчвае БДСГА па спецыяльнасці «заатэхнік» і адразу ж робіць кар’еру, магчымую толькі ў наскрозь карумпаванай кадравай блытаніне, створанай Лукашэнкам.

З гэтага моманту ў біяграфіі Дзямідава не сустракаецца ніводнага радка не пра кіруючыя пасады.

Пяць гадоў – у адміністрацыях прадпрыемстваў Магілёўскай і Віцебскай абласцей.

У 2017-м ён узначаліў філіял «Сухараўскі» ААТ «Агракамбінат «Прыдняпроўскі».

Апублікаваў свой маналог у абласной сельскагаспадарчай газеце, сутнасць якога зводзілася да таго, што ён «гатовы стаць паўнапраўнымі гаспадарамі на сваёй зямлі».

Праз некалькі месяцаў Міхаіл Дзямідаў перайшоў на пасаду першага намесніка старшыні – начальніка райсельгасхарчу Дрыбінскага, а затым Бялыніцкага райвыканкамаў.

Лукашэнка зблытаў ветэрынара з заатэхнікам

26 студзеня 2021 года кандыдатуру Дзямідава на пасаду старшыні Клімавіцкага райвыканкама ўзгадніў Лукашэнка з наказам: «калі я вывучаў вашы асабістыя матэрыялы, я падумаў пра тое, што вы як спецыяліст, заатэхнік, урач, усё жыццё прапрацаваўшы з жывёламі, перанясеце гэты вопыт на Клімавіцкі раён. Вельмі хацелася б. І ў гэтым дачыненні мы вас будзем падтрымліваць. Клімавіцкі раён прыстойны, гэта асноўны раён на Магілёўшчыне. Вельмі хацелася б, каб у вас атрымалася. Перспектывы ў вас добрыя».

Пасля 2020-га ў Лукашэнкі пачаліся відавочныя праблемы з адэкватнай ацэнкай рэчаіснасці. Толькі гэтым і можна растлумачыць тое, што ён назваў Дзямідава ўрачом.

Праз два дні пазачарговая сесія раённага Савета дэпутатаў зацвердзіла прызначэнне, а старшыня Магілёўскага аблвыканкама Леанід Заяц прадставіў клімавічанам Дзямідава як «руплівага гаспадарніка».

Ён прапрацаваў у Клімавічах тры з паловай гады. Трыццатага верасня 2024 года на пазачарговай сесіі райсавета новага старшыню райвыканкама прадстаўляў ужо Анатоль Ісачанка.

Сам Дзямідаў выявіўся праз месяц у іншай вобласці. Шостага лістапада 2024 года «Сельская газета» выйшла з разваротам пра прыгарадную гаспадарку пад Віцебскам, дзе наш «урач» быў прадстаўлены дырэктарам КСУП «Рудакова».

Тады Міхаіл Уладзіміравіч падзяліўся формулай свайго поспеху – «пралічваць эканоміку на два крокі наперад».

Мяркуючы па візіце АМАПа ў госці да Дзямідава, нечага ён усё ж такі не пралічыў.

Сорак чатыры іншыя ўдзельнікі карупцыйнай схемы – таксама.

Праблема толькі ў тым, што масавыя затрыманні «моцных гаспадарнікаў» – не заслуга праваахоўнікаў, а вынік бессэнсоўных кіданняў Лукашэнкі, які паспрабаваў стварыць у Беларусі аграрную эліту, а замест гэтага атрымаў шайку хабарнікаў.

Фота з адкрытых крыніц.