Category: Раёны

Вось дык візіт: у асіповіцкую вёску Слабада зайшоў зубр

Навіна ад

Жыхары вёскі Слабада Асіповіцкага раёна заўважылі зубра, які некалькі дзён знаходзіўся побач з населеным пунктам, а потым зайшоў у вёску.

Зубр зайшоў у вёску Слабада Асіповіцкага раёна і павёў сябе па-гаспадарску

Па словах мясцовай жыхаркі, спачатку жывёлу бачылі на полі і на дарозе Свіслач – Ялізава. 

Увечары зубр прыйшоў у Слабаду. Ён паводзіў сябе спакойна, рухаўся павольна, да прынесенай людзьмі ежы не дакранаўся.

Зубра прыцягвалі вулічныя ліхтары: ён доўга стаяў пад імі і пераходзіў ад аднаго да другога. 

У нейкі момант жывёла перагародзіла ўезд у двор, і гаспадару дома давялося шукаць абыходны шлях.

Пазней зубр прылёг, а каля другой гадзіны ночы пайшоў у бок Ялізава.

Фота: раённай газеты.

Палітвязень пра Шклоўскую калонію: замарожвалі, білі, фабрыкавалі парушэнні

Навіна ад

Вызвалены ў снежні 2025 года палітвязень Ігар распавёў пра сістэмныя катаванні, ізаляцыю ў холадзе, фізічны гвалт і масавую фабрыкацыю дысцыплінарных спагнанняў у Папраўчай калоніі №17 у Шклове.

Каранцін як інструмент ціску

Ігара асудзілі ў 2023 годзе па шэрагу палітычных артыкулаў да пяці гадоў зняволення.  Пасля этапавання ў шклоўскую калонію № 17 Ігара, як і іншых, змясцілі ў каранцін, адкуль ён выйшаў з дзевяццю дысцыплінарнымі парушэннямі. Пра гэта мужчына распавёў Праваабарончаму цэнтру “Вясна”.  Паводле яго, усе спагнанні мелі фармальны характар і выкарыстоўваліся як механізм далейшай ізаляцыі. Сам палітвязень адзначае, што падобная колькасць рапартаў лічыцца «сярэднім» паказчыкам, паколькі многіх вязняў накіроўваюць у ШІЗА непасрэдна з каранціну.

Ігар сцвярджае, што ў атрадзе дзейнічала практыка вынясення рапартаў за спосаб маўлення і фармулёўкі адказаў. У прыватнасці, зняволеных каралі за выказванні, якія адміністрацыя трактавала як «падтрымку крымінальнай субкультуры». Нават выкарыстанне юрыдычна карэктных фармулёвак, паводле суразмоўцы, станавілася падставай для змяшчэння ў штрафны ізалятар.

ШІЗА: холад і дэпрывацыя

У агульнай складанасці палітвязень правёў каля месяца ў штрафным ізалятары. Першыя пяць сутак ШІЗА яму прызначылі за тое, што нібыта не павітаўся з супрацоўнікам калоніі. Узімку Ігара трымалі аднаго ў трохмеснай камеры без пасцельнай бялізны пры тэмпературы ніжэй за +10 градусаў.

Паводле яго, камеру штодзённа праветрывалі, пакідаючы вокны адчыненымі на ўвесь дзень, што прыводзіла да поўнага вымярзання памяшкання. Адзінай крыніцай цяпла заставаліся ацяпляльныя трубы.

Адно са змяшчэнняў у штрафны ізалятар на 15 сутак, як мяркуе Ігар, было звязанае са спробай перадаць ліст на волю. Мужчына распавёў, што перад накіраваннем у ШІЗА яго цалкам распранулі, змясцілі ў клетку на КПП і пакінулі на марозе пры тэмпературы каля -10 градусаў.

Праз некалькі гадзін, калі стан зняволенага істотна пагоршыўся, яго перавялі ў ізалятар, дзе ўмовы ўтрымання, паводле яго, засталіся экстрэмальнымі.

Фізічны гвалт у ПКТ

Пасля серыі пакаранняў у ШІЗА палітвязня перавялі ў памяшканне камернага тыпу, дзе, як ён сцвярджае, да зняволеных ужываўся фізічны гвалт. Паводле яго, зняволеных ставілі на «расцяжку» і наносілі ўдары па нагах, правакуючы супраціў.

У выніку аднаго з такіх эпізодаў Ігар атрымаў вывіх пляча. З-за адсутнасці належнай медыцынскай дапамогі і дрэнных умоваў утрымання, траўма не загаілася дагэтуль.

Падчас знаходжання ў калоніі Ігар працаваў у швейным цэху. Ён распавёў, што палітвязняў прымушалі шыць форму і спальныя мяшкі для вайсковых патрэбаў. Працоўная змена доўжылася з 22:00 да 6:00, пры адным выходным дні на тыдзень.

«Спіс тэрарыстаў» і перавод у турму

У калоніі Ігара ўнеслі ў так званы «спіс тэрарыстаў». Сам суразмоўца мяркуе, што падставай для гэтага магла стаць узаемадапамога з іншым вязнем. Пасля гэтага адбыўся суд, па выніках якога палітвязня вырашылі перавесці на турэмны рэжым.

Перад пераводам супрацоўнікі калоніі, паводле сведчанняў Ігара, змясцілі яго ў свежапафарбаваную камеру штрафнога ізалятара. Знаходзячыся ў памяшканні, палітвязень неаднаразова губляў прытомнасць ад атручвання парамі фарбы.

Крытычны стан зняволенага, паводле яго слоў, стаў прычынай тэрміновага пераводу з калоніі ў турму.

Напрыканцы лета 2024 года Ігара этапавалі ў магілёўскую турму № 4, а ў снежні 2025 вывезлі з Беларусі ва Украіну з іншымі вызваленымі палітвязнямі.

Фотаздымак: “Новы час”

У Бабруйскім раёне выратавалі замярзаючую казулю

Навіна ад

Жыхары Бабруйскага раёна адагрэлі і накармілі замярзаючую казулю, а потым за ёй прыйшлі суродзічы з лесу.

Казуля прыйшла да дома жыхароў Бабруйскага раёна ад безвыходнасці – жывёла замярзала. Яна прыйшла да людзей з сасулькамі на пысцы.

Людзі пасялілі жывёлу ў хляве, як маглі адагрэлі і накармілі казулю. Праз дзве гадзіны ў бадзяжкі з’явіўся апетыт, а праз нейкі час яна ўжо хадзіла па пятах за гаспадаром сям’і. 

Казулі нават паспелі даць імя Яшка, але неўзабаве каля дома з’явілася дарослая асобіна. Відавочна, суродзічы шукалі зніклую казулю.
Жывёлу давялося адпусціць у лес.

Фота: БелТА.

Школьнік з Бабруйска стварыў музей піянерыі. «Патрыёты» Магілёўшчыны гэтаму ўзрадаваліся

Навіна ад

Дзевяцікласніка з Бабруйска прынялі ў абласную арганізацыю «Патрыёты Беларусі» за тое, што ён сабраў калекцыю піянерскіх «артэфактаў».

Бабруйскі падлетак Мацвей Бержанін сабраў у сваім хатнім музеі калекцыю з 550 экспанатаў. Асаблівасць калекцыі ў тым, што яна звязаная з піянерскім рухам часоў СССР.

Пачалося ўсё з бюста Ільіча, якім Мацвей зацікавіўся ў першым класе. Цяпер, праз сем гадоў, у яго ёсць барабаны, горны, школьная форма, значкі, пасведчанні, кнігі, вымпелы і кубкі мінулага стагоддзя.

Сама па сабе калекцыя заслугоўвае ўвагі, але праблема ў тым, што ёю зацікавіліся старшыня абласной арганізацыі РГА «Патрыёты Беларусі» Аляксандр Шкадаў і яго памочніца Вольга Рудакоўская.

Псеўдапатрыятычная арганізацыя бачыць у падобных экспанатах не проста спадчыну таталітарнага мінулага. Шкадаў і яго паплечнікі ўпэўненыя, што менавіта ў гэтым і заключаецца «светлая будучыня» Беларусі.

Па рашэнні Шкадава і Рудакоўскай Мацвей Бержанін атрымаў сумнеўны гонар – стаў членам Магілёўскай абласной арганізацыі РГА «Патрыёты Беларусі».

Фота: «Магілёўскія ведамасці».

У бабруйскім каледжы ўкараняюць камуністычную ідэалогію

Навіна ад

Выкладчыца Бабруйскага дзяржаўнага аграрна-эканамічнага каледжа, карыстаючыся службовым становішчам, распаўсюджвае ідэі камунізму.

Выкладчык Людміла Кандрацьева, якая адначасова займае пасаду другога сакратара Бабруйскага гаркама Камуністычнай партыі Беларусі, зладзіла агітацыю за сваю ідэалогію, забароненую ў многіх краінах, проста ў сценах каледжа. Для гэтага яна выкарыстала фармат так званай «Гадзіны інфармавання», і такім чынам каледж ператварыўся ў пляцоўку для палітычнай агітацыі. 

На сустрэчу са студэнтамі былі запрошаны яе аднапартыйцы – прадстаўнікі гарадскога камітэта КПБ Аляксандр Лаўрыненка і Сяргей Белянаў. У ходзе размовы падлеткам распавядалі пра “выбітную ролю правадыра сусветнага пралетарыяту”, а таксама аб прынцыпах і ідэях камуністычнай партыі.

Асаблівую ўвагу прыцягнуў адзін з гасцей – Аляксандр Лаўрыненка, які акрамя партыйнай дзейнасці ўзначальвае ветэранскую арганізацыю вайсковай часткі № 5527 Унутраных войскаў МУС. На сустрэчу са студэнтамі ён прыйшоў у форменнай вопратцы, што ўзмацніла сімвалічны і ідэалагічны эфект таго, што адбывалася.

У сваю чаргу падрыхтоўка да прапагандысцкага мерапрыемства выйшла за рамкі аўдыторыі. Напярэдадні некалькі навучэнцаў каледжа па просьбе выкладчыцы былі прыцягнутыя да ўборкі снегу на дарозе, якая вядзе да офіса Бабруйскай партыйнай арганізацыі КПБ.

Сітуацыя выклікае пытанні аб дапушчальнасці выкарыстання адукацыйнай установы і працы навучэнцаў для прасоўвання партыйнай ідэалогіі, а таксама аб межах паміж навучальным працэсам і палітычнай прапагандай.

Фотаздымак: Mayday

Бабруйчанін пусціў пажыць знаёмага, а той набраў на яго мікракрэдытаў

Навіна ад

Бабруйчаніну раптам сталі паступаць патрабаванні аб пагашэнні мікрапазык, якія, як аказалася, набраў яго кватарант.

Званкі з мікрафінансавых арганізацый сталі для 25-гадовага жыхара Бабруйска непрыемным сюрпрызам. Суразмоўцы настойліва патрабавалі пагасіць крэдытную запазычанасць. Праблема была ў тым, што ніякіх пазык мужчына не афармляў.

Заява пацярпелага паступіла ў міліцыю, і ў ходзе аператыўна-вышуковых мерапрыемстваў праваахоўнікі высветлілі, як з’явіліся гэтыя даўгі. Да незаконных фінансавых аперацый аказаўся датычны 23-гадовы беспрацоўны бабруйчанін, які раней некаторы час жыў у кватэры заяўніка.

Следства ўстанавіла, што малады чалавек скарыстаўся даверлівымі адносінамі і свабодным доступам да мабільнага тэлефона гаспадара жылля. Без ведама ўладальніка ён аформіў на яго імя тры мікрапазыкі, пасля чаго перавёў атрыманыя сродкі на ўласную банкаўскую карту. Грошы былі выдаткаваны на асабістыя патрэбы.

У дачыненні да падазраванага ўзбуджана крымінальная справа.

Фотаздымак: freepik.com

Жыхар Кіраўска падабраў тушку зайца. Яго папярэдзілі і адпусцілі

Навіна ад

Жыхар Кіраўска забраў з дарогі тушку зайца, каб раздзелаць яе. Гэта абярнулася для яго праблемай з законам.

У бытоўцы на ферме ў вёсцы Букіна супрацоўнікі Кіраўскага аддзела Дэпартамента аховы знайшлі тушку зайца. Яны адразу пазванілі ў дзяржаўным прыродаахоўнікам – у Бабруйскую міжраённую інспекцыю аховы жывёльнага і расліннага свету, піша komkur.info.

Тыя, у сваю чаргу, высветлілі, што звер, хутчэй за ўсё, загінуў пад коламі аўтамабіля. Мужчына, які падабраў тушку, вырашыў, што мяса зайца можна выкарыстаць у асабістых мэтах і забраў яе з сабой, каб разабраць па месцы працы. Але гэта дзеянне адміністрацыйным кодэксам, а таксама Правіламі палявання, забаронена. У дадзеным выпадку чалавек павінен быў паведаміць аб тым, што здарылася альбо карыстальніка паляўнічых угоддзяў, альбо міліцыю. Пры гэтым, у любым выпадку, не перамяшчаць мёртвую жывёліну з месца выяўлення.

Аматар заечага мяса падпаў пад ч.2 арт.16.27 Кодэкса аб адміністратыўных правапарушэннях – “Парушэнне правіл вядзення паляўнічай гаспадаркі і палявання”. Яму пагражаў штраф да 1350 рублёў, але праваахоўнікі абмежаваліся папярэджаннем з увагі на тое, што да гэтага выпадку цягам года мужчына не здзяйсняў падобных правапарушэняў.

Фотаздымак з адкрытых крыніц

Беларусы праігнаравалі праблемы вадзіцеля машыны з расійскімі нумарамі

Навіна ад

На трасе М5 у Бабруйскім раёне вадзіцель Opel Insignia і яго спадарожніца замярзалі ў заглухшай машыне. Ніхто з удзельнікаў руху не адгукнуўся на знакі аб дапамозе.

На трасе «Мінск – Гомель» у Бабруйскім раёне пара правяла каля чатырох гадзін у заглухшым аўтамабілі на марозе. Нягледзячы на ўключаную аварыйную сігналізацыю, падняты капот і спробы спыніць машыны, ніводзін кіроўца не спыніўся, каб дапамагчы. Пра гэта піша komkur.info.

Інцыдэнт адбыўся ў нядзелю, 25 студзеня 2026 года ўвечары. Каля 16.00 паміж паваротамі на Дубоўку і Савічы спыніўся Opel Insignia, бо з рухавіка выліўся алей, і працягваць рух машына не магла. У салоне знаходзіліся Дзмітрый і Крысціна, жыхары Гомеля, якія ехалі ў Полацк па справах. Пры гэтым сам аўтамабіль меў расійскую рэгістрацыю (гэта відаць па здымку аўтамабіля), што, магчыма, і абумовіла такую абыякавасць людзей на трасе.

Надвор’е ў той дзень было па сутнасці экстрэмальным: тэмпература апускалася ніжэй за мінус 15 градусаў, а адкрытая мясцовасць узмацняла адчуванне холаду. Абагрэць салон без працуючага рухавіка было немагчыма. Дзмітрый уключыў аварыйку, падняў капот і перыядычна выходзіў на дарогу, спрабуючы «галасаваць», але дарэмна. Паволе яго, хоць машын праязджала шмат, ніхто не меў намеру спыняцца.

Пра сітуацыю Дзмітрый паведаміў знаёмаму, які размясціў заклік аб дапамозе ў вадзіцельскай суполцы Viber «Дороги.by». На паведамленне адгукнуўся Максім Шырокі з вёскі Міхалёва і актыўны ўдзельнік аўтамабільных супольнасцяў.

“Я ўбачыў пост каля 19.00, быў дома. – распавёў Максім – Зразумеў, што марудзіць нельга”.

На месца ён прыехаў прыкладна ў 19.30. Да таго моманту Дзмітрый і Крысціна былі моцна пераахалоджаныя. Прычым, паводле Максіма, у вадзіцеля настолькі замерзлі рукі, што ён не мог нават зачапіць трос. Дзяўчына ўвесь гэты час заставалася ў салоне нерухомай машыны. 

Аўтамабіль удалося адцягнуць на бліжэйшую АЗС. Там пара сагрэлася гарачым чаем і дачакалася яшчэ аднаго гомельскага знаёмага, які выехаў насустрач і ўзяў Opel на буксір. Пасля гэтага ўсе разам накіраваліся ў бок Гомеля.

Фотаздымак: komkur.info

Чавускія школьнікі дапамагаюць выжыць азёрнай рыбе

Навіна ад

Выратаваць рыбу ад магчымага замора дапамагаюць вучні чавускай сярэдняй школы №1. 

На лёд на возеры ў аграгарадку Каменка з бурамі школьнікі прыйшлі разам з начальнікам Чавускай раённай прыродаахоўнай інспекцыі і кіраўнком раённага АСВОДа. У межах традыцыйнай экалагчнай акцыі “Зробім лункі – выратуем рыбу ад замора” яны прабурвалі лёд, тым самым дазваляючы паветру даходзіць да вады.

Такая акцыя сапраўды мае вялікае значэнне ў маразы, калі вадаёмы скаваныя лёдам і колькасць паветра ў вадзе значна змяншаецца. Гэта ўскладняе жыццё рыбе і іншым насельнікам рэк і азёр. Калі лёд будзе скоўваць ваду доўгі час, гэта можа прывесці да іх гібелі.

Акрамя таго, уплыў такога заняцця для дзяцей значна лепшы, чым мілітарысцкія гульні, у якія дарослыя ўцягваюць беларускіх дзяцей.

Фотаздымак: ТГ “Магілёўпрырода”

У Крычаве ўлада актыўна сустракаецца з народам

Навіна ад

Старшыня Крычаўскага райвыканкама сустракаецца з насельніцтвам. «TikTok» жыве і перамагае.

Улады Крычава правялі сустрэчы з насельніцтвам. Яны адказвалі не толькі на пытанні, зададзеныя ім праз сацыяльныя сеткі, але і паспрабавалі загадзя знізіць пільную ўвагу да крычаўскіх праблем у «TikTok».
Старшыня райвыканкама Аляксей Шарай працаваў у пары з дырэктарам УКПП «Камунальнік» Мікітам Інaзeмцавым, да прадпрыемства якога апошнім часам узнікла мноства прэтэнзій.
На сустрэчы з жыхарамі мікразоны «Сожавая» Мікіта Сяргеевіч паведаміў, што праблемы з ацяпленнем кватэр узніклі з-за паломкі чацвёртага катла кацельні, і паабяцаў забяспечыць людзей цяплом.
Інaзeмцаў таксама патлумачыў, чаму так складана датэлефанавацца ў дыспетчарскую службу яго прадпрыемства.
Давялося тлумачыць людзям і чарговасць капітальнага рамонту дамоў. Аказалася, што ўсё залежыць не ад года пабудовы будынка, а ад яго стану на дадзены момант.
Прагучала шмат іншых пытанняў, адказы на якія крычаўляне атрымалі дзякуючы сваёй актыўнасці ў «TikTok».
Дзіўна, але менавіта гэтая сацыяльная платформа сёння робіць значна больш, чым усе аддзелы па зваротах грамадзян разам узятыя. Зрэшты, чаму тут здзіўляцца? Улады Беларусі, якія ператварылі краіну ў канцэнтрацыйны лагер, не могуць кантраляваць «TikTok».
Прапагандысцкія ролікі тут не здольныя канкурыраваць з допісамі незалежных СМІ. Да ўсеагульнага задавальнення супраць гэтага лома прыёму ў лукашэнкаўскіх ідэолагаў няма і не прадбачыцца.

Фота раённай газеты.