Category: Навіны Хоцімска

Галоўным вертыкальшчыкам у Клімавічах стаў чыноўнік з Хоцімска

Навіна ад

Кіраваць Клімавіцкім райвыканкамам прызначаны Аляксандр Анжэнка, які да гэтага быў намеснікам старшыні райвыканкама ў Хоцімску.

Пра тое, што Анжэнка цяпер будзе жыць і працаваць у Клімавічах, стала вядома сёння, пасля кадравых змен, якія правёў беларускі дыктатар.

Анжэнка на чыноўніцкіх пасадах ўжо даўно. У 2019 годзе ён быў начальнікам аддзела архітэктуры, будаўніцтва і землеўпарадкавання райвыканкама. Потым стаў намеснікам кіраўніка хоцімскай вертыкалі. Як звычайны лукашэнкаўскі чыноўнік, прадстаўляе не толькі выканаўчую, але і прадстаўнічую ўладу. Ён – дэпутат Хотімскага райсавета дэпутатаў. Ці будзе ён цяпер неяк прадстаўляць інтарэсы тых, ад каго нібыта абіраўся, і весці іх асабісты прыём – пытанне адкрытае. Магчыма, Анжэнка будзе бачыць сэнс хаця б раз на месяц вяртацца з Клімавічаў у Хоцімск, каб пачуць выбарцаў сваёй Набярэжнай выбарчай акругі №16.

На пасадзе намесніка старшыні курыраваў пытанні будаўніцтва, паліўна-энергетычнага комплекса, надзвычайных сітуацый, кантроля за інвестыцыйнай дзейнасцю і інш.

Фотаздымак: khotimsk.gov.by

У Хоцімску з чырвонай стужкай адкрылі мост пасля бягучага рамонту – нават не капітальнага

Навіна ад

У Хоцімску ўрачыста адкрылі мост па вуліцы Пралетарскай. Перарэзалі чырвоную стужку, сфатаграфавалі раённае кіраўніцтва на фоне дзяржаўных сцягоў і гледачоў, якія апладзіравалі.
Цырымонія адкрыцця моста стаяла ў праграме свята вызвалення Хоцімска.
Прычым першым пунктам, раней за ўрачыстую цырымонію каля брацкай магілы. Што менавіта зрабілі з мостам, патлумачыў кіраўнік раёна Аляксандр Дзівакоў у віншаванні з Днём вызвалення раёна і Днём горада: мост стаў «бяспечным і камфортным» пасля бягучага рамонту.
Бягучы рамонт – гэта планавыя работы па падтрыманні збудавання ў працоўным стане, а не будаўніцтва і нават не рэканструкцыя.

Было б жаданне нешта адсвяткаваць, а нагода ў Хоцімску заўсёды знойдзецца.

Фота раённай газеты «Шлях Кастрычніка»

«Не кіпішуйце»: у Хоцімску першы сакратар райкама КПБ растлумачыў блогерам, каму можна скардзіцца

Навіна ад

Хоцімская раённая газета «Шлях Кастрычніка» выйшла з калонкай пра блогераў, якія здымаюць на тэлефон лужыны, выбоіны, зламаныя лаўкі і някошаныя могілкі. На думку аўтара, гэта бура ў шклянцы і спосаб засвяціцца.
Інструкцыя такая: убачыў някошаныя могілкі – купі бензакасу, прыязджай на малую радзіму і касі сам; заўважыў адкрыты інспекцыйны люк у падлозе аўтобуса – скажы кіроўцу або патэлефануй у 115.
Склаў гэтую інструкцыю Аляксандр Ляйчынскі, загадчык аддзела сельскай гаспадаркі газеты «Шляху Кастрычніка» і адначасова першы сакратар Хоцімскай раённай арганізацыі КПБ.
У 2024 годзе кампартыя вылучала яго кандыдатам у «дэпутаты», на з’ездзе яму ўручылі памятны медаль ЦК КПРФ, а абласны конкурс называў яго лепшым журналістам мясцовых СМІ. Аўтару шэсцьдзесят восем, і маладых блогераў ён выхоўвае з вышыні гэтага стажу.
Сама парада гучыць разумна: патэлефанаваць у 115 хутчэй, чым мантаваць ролік. Неўвязка ў тым, што канал публічных скаргаў дзяржава завяла сабе сама. З 18 мая на «Беларусь 1» ідзе праграма «В понедельник дойдет до Лукашенко» – разбор вірусных ролікаў з TikTok, які ў эфіры называюць рэвізіяй сацсетак. Адзін і той жа апарат у прайм-тайм разбірае скаргі, знятыя на тэлефон, а праз раённую газету тлумачыць, што здымаць іх сорамна.
Другую палову калонкі аўтар адводзіць уласнаму публічнаму абурэнню. У Пецярбургу на 10 і 11 кастрычніка анансаваныя канцэрты Канье Уэста, які ў 2022 годзе публічна выказваў сімпатыю да Гітлера. 

Ляйчынскі называе рэпера падонкам, пераказвае каментары Пяскова і Захаравай, саромеецца за ленінградцаў, якія раскупілі 80 тысяч білетаў за дзень, і заканчвае Цютчавым – розумам Расію не зразумець. 

Права на гучны публічны тэкст ён пакідае за сабой. Проста адрасаваны гэты тэкст не ў Хоцімск, а “ненавіснікам” фашызму, якія прапагандуюць вайну ва Украіне.
Адначасова ў калонцы прагаворана тое, міма чаго раённыя газеты звычайна праходзяць. Спрачаючыся з тымі, хто абмяркоўвае заробак камбайнера з TikTok, які намалаціў за 40 дзён 3000 тон, аўтар прыводзіць свайго земляка – хоцімчаніна Аляксандра Папраўку з 1700 тонамі – і дадае: дай яму ўраджайнасць хаця б 40 цэнтнераў з гектара, ён сабраў бы не менш за тры тысячы. То бок розніца не ў людзях і не ў камбайнах. 

Аднак сарака цэнтнераў няма і ў Магілёўскім раёне, адным з лідараў вобласці: на 11 жніўня сярэдняя ўраджайнасць там складала 37,1 цэнтнера з гектара. Няма і не прадбачыцца па той простай прычыне, што калгасы ўсюды і заўсёды былі заняткам стратным.
Правіла, якое вынікае з калонкі Ляйчынскага, прасцей за параную рэпу. Скардзіцца публічна нельга, калі ты жыхар Хоцімшчыны і скардзішся на някошаныя могілкі. Можна, калі ты першы сакратар райкама і скардзішся на Пецярбург.

Фота раённай газеты.

На Хоцімшчыне ў жанчыны аднялі дзяцей і пакінулі іх без грашовай дапамогі

Навіна ад

Толькі пасля звароту жанчыны ў пракуратуру аб тым, што адабраныя ў яе дзеці засталіся без грашовай дапамогі, новыя апекуны заняліся гэтай справай.

Праблема з нявыплатай грашовай дапамогі выявілася не адразу. У сакавіку 2026 года Хоцімскі райвыканкам надаў двум непаўналетнім дзецям статус тых, хто застаўся без апекі бацькоў. Пасля гэтага іх забралі ў прыёмную сям’ю. Да гэтага іх родная маці атрымлівала за дзяцей дзве дзяржаўныя выплаты: пенсію па інваліднасці на аднаго з іх і пенсію з нагоды страты карміцеля.

Пасля перадачы дзяцей у іншую сям’ю выплаты маці заканамерна прыпынілі. А вось аднавіць іх ужо на імя новага апекуна ніхто не паспяшаўся. Апякун па належныя дзецям грошы не звярнуўся. Органы апекі, якія павінны былі сачыць у тым ліку за захаваннем маёмасных правоў дзяцей, сітуацыю таксама своечасова не заўважылі. У выніку дзеці, якіх дзяржава перадала прыёмнай сям’і, засталіся без часткі належнай ім дзяржаўнай падтрымкі.

Зрух адбыўся толькі пасля заявы ад роднай маці ў пракуратуру. Мясцовы пракурор вынес прадпісанне начальніку мясцовага аддзела па адукацыі з патрабаваннем неадкладна выправіць парушэнні. Пасля гэтага апякун нарэшце звярнуўся ў адпаведныя органы, каб аднавіць выплаты на дзяцей.

Колькі часу непаўналетнія заставаліся без належных ім грошай і якая сума не была выплачаная за гэты перыяд, пракуратура не паведамляе.

Фотаздымак з адкрытых крыніц

У Хоцімску рыба не любіць цішыні – там будзе фестываліць “Залаты карась”

Навіна ад

Пад песні і гучныя забавы ў Хоцімску пройдзе рыбалоўны фестываль “Залаты карась”.

Фестываль намечаны на 21-22 жніўня 2026 года на гарадскім пляжы ракі Жадунька. Прычым адбудзецца гэта ўжо ў чацвёрты раз. 

Лоўля рыбы, конкурсы і яскаравыя творчыя нумары. Такое дакладна нельга прапусціць”, – заклікае тэлеграм мясцовай раёнкі. Фестываль, які распачынаўся ў 2023 годзе, мае статус адкрытага рэгіянальнага. 

Паводле Магілёўскага абласнога цэнтра народнай творчасці, гэты фестываль рыбалкі адно з самых запатрабаваных мерапрыемстваў у раёне. “Як толькі ў сацыяльных сетках з’явіліся аб’ява, заяўкі набіраліся літаральна за пару дзён” – сцвярджаюць там. Праўда, знайсці інфармацыю об колькасці ўдзельнікаў у рыбалоўных конкурсах фестываля ў адкрытых крыніцах не ўдалося. Таксама як і не ўдалося параўнаць тыя лічбы для разумення, ці расце зацікаўленасць у “Залатым карасе” сапраўдных аматараў спаборніцтваў па рыбнай лоўлі. 

Фотаздымак: www.mogomc.by

Дзевяць лішніх дзён бальнічнага: даведку хоцімскага навучэнца вывучалі судовыя эксперты

Навіна ад

Пятнаццацігадовы жыхар Хоцімска больш за тыдзень у маі не з’яўляўся на занятках у каледжы, а калі ўсё ж аформіў бальнічны, выправіў у даведцы з цэнтральнай раённай бальніцы дату яго адкрыцця – адразу ў дзвюх графах. Дакумент з прыкметамі падробкі накіравалі на судовую экспертызу ва ўпраўленне Дзяржаўнага камітэта судовых экспертыз па Магілёўскай вобласці, і 4 жніўня заключэнне эксперта стала публічным.

Эксперт устанавіў, што запісы даты пачатку хваробы змянялі тэхнічным спосабам:

  • першапачатковы запіс падчысцілі;
  • зверху дапісалі знакі «0» і «4»;
  • зыходны змест – «130526», гэта значыць трынаццатае мая.

Так трохдзённы бальнічны ператварыўся ў дванаццацідзённы, а прапушчаны тыдзень заняткаў атрымаў заднім чыслом медыцынскае тлумачэнне. Уся выгада аперацыі – дзевяць дзён.

Папера з Хоцімскай цэнтральнай раённай бальніцы дзеля двух падчышчаных знакаў прайшла ўвесь шлях да абласнога ўпраўлення ДКСЭ – ведамства, чые спецыялісты працуюць з рэчавымі доказамі па крымінальных справах.

Паводле слоў афіцыйнага прадстаўніка ўпраўлення, ад сур’ёзных прававых наступстваў хоцімца выратаваў толькі юны ўзрост: да крымінальнай адказнасці за падробку і выкарыстанне падробленага дакумента прыцягваюць з шаснаццаці гадоў.

Ведамства падае гэта як шанцаванне, хоць адзінае, чаго не хапіла гэтай гісторыі да паўнавартаснай крымінальнай справы, – яшчэ аднаго дня нараджэння.

Фота “Магілёўскія ведамасці”.

Кіраўнік хоцімскага прадпрыемства пакараны за несвоечасовую выплату заробку

Навіна ад

У Хоцімскім раёне 107 работнікаў сельгасарганізацыі не маглі своечасова атрымаць 155 тысяч рублёў заробку.

Запазычанасць па заробку ўтварылася ў траўні 2026 года. Гэта высветліла пракуратура пры праверцы выканання заканадаўства аб працы.

Пасля таго як умяшалася нагляднае ведамства, заробак быў выплачаны, а кіраўнік гэтага прадпрыемства АПК прыцягнуты да адміністрацыйнай адказнасці. 

Згодна Працоўнаму кодэксу, выплата заработнай платы ажыццяўляецца рэгулярна ў дні, вызначаныя ў калектыўным дагаворы, пагадненні або працоўным дагаворы, але не радзей двух разоў на месяц. 

Фотаздымак з адкрытых крыніц

Апякун кацянатаў з Хоцімска папаўся на махлярстве

Навіна ад

Абяцаючы даглядаць за нованароджанымі кацянятамі хацімчанін падмануў мінчанку на 1,5 тыс. рублёў.

Гісторыя пачалася з таго, што жыхарка сталіцы знайшла на вуліцы двух нованароджаных кацянятаў. Малечы патрабавалі пастаяннага догляду і спецыяльнага кармлення, але жанчына не мела неабходнага досведу. Таму яна звярнулася па дапамогу ў тэматычную інтэрнэт-супольнасць, дзе абмяркоўваюць праблемы бяздомных жывёл.

На заклік адгукнуўся 25-гадовы жыхар Хоцімска. Малады чалавек паведаміў, што вучыцца на ветэрынарнага ўрача і мае досвед выхаджвання нованароджаных жывёл. Яго словы падаліся пераканаўчымі.

Каб выратаваць кацянятаў, мінчанка асабіста прывезла іх у Магілёўскую вобласць. Яна таксама пагадзілася аплочваць усе выдаткі, звязаныя з доглядам і лячэннем жывёл.

Пэўны час усё выглядала цалкам праўдападобна. Хацімчанін рэгулярна паведамляў, што возіць кацянятаў у ветэрынарную клініку, купляе лекі, шпрыцы, корм і іншыя неабходныя рэчы. Для пацверджання сваіх слоў ён прасіў грошы, якія жанчына без ваганняў пералічвала на яго банкаўскую картку.

Паводле яго паведамленняў, значныя сумы ішлі нават на паездкі ў ветклініку. Часам ён заяўляў пра неабходнасць выклікаць таксі, якое нібыта каштавала ад 45 да 60 рублёў у адзін бок.

Так працягвалася некалькі тыдняў, пакуль у жанчыны не ўзніклі сумненні. Каб упэўніцца, што грошы сапраўды ідуць на дапамогу жывёлам, яна сама звязалася з ветэрынарнай клінікай. Там яе чакала непрыемнае адкрыццё. Высветлілася, што кацянятаў прывозілі да ветэрынараў толькі адзін раз – у першы дзень пасля іх перадачы новаму апекуну.

Пасля гэтага мінчанка звярнулася ў міліцыю. Праваахоўнікі затрымалі жыхара Хоцімска і распачалі супраць яго крымінальную справу па артыкуле аб махлярстве. Што сталася з кацянятамі і ў якім яны цяпер стане, афіцыйна не паведамляецца. 

Фотаздымак: ТГ ОС Exclusive

У Хоцімскім раёне з-за азартых гульняў маці галадалі яе дзеці

Навіна ад

Суд забараніў жыхарцы Хоцімскага раёна тры гады гуляць у анлайн-казіно, дзе яна прайгравала дзіцячыя грошы.

23-гадовая жанчына жыве разам з мужам і двума малалетнімі дзецьмі. На працягу апошніх двух гадоў яна пастаянна рабіла стаўкі ў віртуальных казіно. Для ўдзелу ў гульнях у яе было сем гульнявых акаўнтаў.

На азартныя гульні маладая маці траціла не толькі ўласныя сродкі, але і дзіцячую дапамогу. Акрамя таго, яна рэгулярна пазычала грошы ў сваякоў. У выніку ў сям’і ўзніклі даўгі, у тым ліку па аплаце жыллёва-камунальных паслуг.

У красавіку 2026 года двое дзяцей жанчыны былі прызнаныя як тыя, што знаходзяцца ў сацыяльна небяспечным становішчы з-за незабеспячэння іх асноўных жыццёвых патрэбаў, адсутнасці дастатковага харчавання і неналежнага выкарыстання дзіцячай дапамогі.

У інтарэсах дзяцей і мужа жанчыны пракурор Хоцімскага раёна звярнуўся ў суд з патрабаваннем абмежаваць яе ўдзел у азартных гульнях. Пасяджэнне суда Хоцімскага раёна, пэўна, у мэтах прафілактыкі, праходзіла ў прысутнасці навучэнцаў мясцовага каледжу. Прысуд – поўная забарона жанчыне гуляць у азартныя гульні на максімальна вызначаныя законадаўствам тры гады.

Пакуль рашэнне суда можа быць абскарджана.

Фотаздымак з адкрытых крыніц

Вяха ў развіцці Хоцімска – цяпер без скразнякоў

Навіна ад

У Хоцімскім раёне будуюць прафілакторыі для цялят. Галоўнае адкрыццё: калі няма скразнякоў і ёсць сухая падсцілка, цяля не хварэе.

У трох сельгаспрадпрыемствах Хоцімскага раёна будуюць прафілакторыі для цялят. Аб’екты аднатыпныя, але з варыяцыямі: нясучыя канструкцыі можна рабіць з металу або дрэва, ашалёўку – з дрэва або штор, у залежнасці ад фінансавых магчымасцей гаспадаркі. А яны, як вядома, у Хоцімску вельмі сціплыя.

Радуе толькі адно: ватага “моцных гаспадарнікаў” Лукашэнкі нарэшце дапёрла, што залог здароўя цяляці – адсутнасць скразнякоў і наяўнасць сухой падсцілкі.

Вядомы хоцімскі камуніст назваў гэта вяхой у развіцці. Што менавіта замінала пабудаваць сухое і непрадзьмуванае памяшканне гадоў гэтак на трыццаць раней, можна толькі здагадвацца.

Верагодна, мільярды рублёў, выдаткаваных нібыта на беларускае сяло, пайшлі на будаўніцтва сухіх і непрадзьмуваных асабнякоў для беларускіх чыноўнікаў.

Фота раённай газеты.