Дваццаць пяць клімавіцкіх вадзіцеляў скралі 14,5 тон паліва

Дваццаць пяць крымінальных спраў было ўзбуджана ў Клімавіцкім раёне па 103 фактах шматлікіх крадзяжоў паліва.

Са снежня 2024-га па снежань 2025 года вадзіцелі аднаго з прадпрыемстваў электраэнергетычнай галіны раёна прысабечвалі паліва, якое атрымлівалі для службовых машын. Адны напаўнялі каністры непасрэдна з палівараздатачных калонак, другія злівалі гаручае з бакаў аўтамабіляў. 

Сумесная праверка выявіла 103 выпадкі крадзяжоў. У выніку пракуратура і Следчы камітэт распачалі 25 крымінальных спраў паводле фактаў прысваення даверанай маёмасці. Падлічаная шкода прадпрыемству склала звыш 38 тыс. рублёў.

Праўда, для дзевяці работнікаў справа скончылася без крымінальнага прысуду: з санкцыі пракурора вытворчасць спынілі, прымяніўшы адміністрацыйныя спагнанні.

А вось 16 вадзіцеляў атрымалі абвінаваўчыя выракі судоў Клімавіцкага і Краснапольскага раёнаў. Большасць спраў разглядалі непасрэдна на прадпрыемстве ў выязных судовых пасяджэннях. Усю нанесеную шкоду абвінавачаныя кампенсавалі.

Як прыклад прыводзіцца факт злачыннай дзейнасці аднаго з  асуджаных. За адзінаццаць месяцаў 2025 года ён скраў больш за 900 літраў дызельнага паліва коштам звыш 2,3 тыс. рублёў.

Суд прызначыў яму год пазбаўлення волі, штраф у 50 базавых велічынь (больш за 2,2 тыс. рублёў) і на год забараніў займаць пасады, звязаныя з улікам, захоўваннем і распараджэннем матэрыяльнымі каштоўнасцямі.

Праўда, у калонію мужчына не адправіцца, калі на працягу гадавога выпрабавальнага тэрміну выканае ўстаноўленыя судом умовы. Прысуд уступіў у законную сілу.

Пасля разгляду гэтай справы суд па ініцыятыве дзяржаўнага абвінаваўцы прапанаваў вышэйшай арганізацыі перагледзець нормы расходу паліва, каб прыбраць перадумовы для новых крадзяжоў.

Фотаздымак з адкрытых крыніц

Клімаўчанін купіў ракалоўкі на Wildberries і атрымаў крымінальную справу

Жыхар Клімавічаў вылавіў 27 шыракапалых ракаў, і супраць яго распачалі крымінальную справу.

Шыракапалы рак занесены ў Чырвоную кнігу Беларусі, здабываць яго забаронена. Шкоду прыродзе ацанілі ў 5467,5 рубля – па 202,5 рубля за кожнага рака.

Такая сума ўжо лічыцца буйным памерам.

Тарыф адзін для ўсіх. У ліпені ў Мсціслаўскім раёне затрымалі браканьера з 740 шыракапалымі ракамі, шкоду ацанілі ў 149 850 рублёў – тыя ж 202,5 рубля за штуку.

У кастрычніку суд прысудзіў яму год пазбаўлення волі з адтэрміноўкай: мужчына прызнаў віну і кампенсаваў шкоду. Мяшок ракаў ці вядро – дарога адна, крымінальная справа.

Лавіў клімаўчанін трыма ракалоўкамі з васьмю ўваходамі кожная. Правілы, якія Савет Міністраў зацвердзіў у чэрвені 2026 года, дазваляюць не больш за пяць. Ракалоўкі, паводле яго слоў, купленыя на Wildberries.

Раённы аддзел унутраных спраў папярэджвае, што шыракапалыя ракі могуць вадзіцца ў вадаёмах раёна, напрыклад у крэйдавым кар’еры Шчучы, таму перад лоўляй трэба навучыцца адрозніваць віды.

Асобна міліцыя прызнае: некаторыя прылады лоўлі, якія свабодна прадаюцца, выкарыстоўваць у Беларусі забаронена.

Купіць раколаўку з васьмю ўваходамі ў Беларусі можна, лавіць ёю – нельга.

Фота «Родная ніва».

Клімавіцкія дарогі рамантуюць раз на шаснаццаць гадоў

Кіраўнік ДРБУ-172 Сяргей Аўхіменка да Дня дарожніка адсправаздачыўся аб працы за год.

Поспехі сціплыя: у Клімавіцкім раёне адрамантавалі каля 12 кіламетраў дарог, хоць планавалі шаснаццаць.

На наступны год запланавана яшчэ 15 кіламетраў. Ёсць надзея, што дарожнікі з гэтай задачай справяцца.

Цікава іншае. Асфальтаваных дарог на абслугоўванні ДРБУ-172 у 2015 годзе было 236,9 кіламетра. 

Калі рамантаваць па 15 кіламетраў за год, да кожнага ўчастка чарга даходзіць раз на шаснаццаць гадоў. Можа, так і трэба. Ці існуе айчынны нарматыў на гэты від работ – невядома.

Фота «Родная нива».

Ад нуля да трох скалаў рост колькасці цяжкіх злачынстваў на Клімаўшчыне

За дзевяць месяцаў 2026 года ў Клімавіцкім раёне адбылося ажно тры цяжкія і асабліва цяжкія злачынствы супраць жыцця і здароўя людзей. 

У адпаведны мінулагодні перыяд такіх злачынстваў не было, распавёў пракурор раёна Алег Лімараў на пасяджэнні з удзелам пракурора вобласці Валерыя Куліковіча. 

Таксама, паводле статыстыкі, у сферы сямейна-бытавых адносін было наўмыснае прычыненне лёгкага і менш цяжкага цялесных пашкоджанняў, а таксама пагроза забойствам. То бок тры злачынствы. Летась за дзевяць месяцаў іх было шэсць. Пракуратура паўзбуджала справы, нягледзячы на тое, што заяў ад пацярпелых не было.

Таксама на пасяджэнні пракуроры паўшчувалі органы прафілактыкі за недастатковае ўзаемадзеяннне, пералічылі хібы ў працы праваахоўных і дзяржаўных органаў. 

Вынкам пасяджэння стаў нейкі выпрацаваны там “комплекс дадатковых мерапрыемстваў”, закліканых “павысіць эфектыўнасць прафілактыкі наўмысных забойстваў і прычынення цяжкіх цялесных пашкоджанняў і палепшыць працу праваахоўных і іншых дзяржаўных органаў”.

Фотаздымак з адкрытых крыніц

Куды падзеўся клімавіцкі старшыня Пугач?

На фоне карупцыйнага скандалу ў АПК трох абласцей Беларусі, людзі задаюцца пытаннем, чаму быў зняты былы старшыня Клімавіцкага райвыканкама Віктар Пугач.

Нагадаем, што на мінулым тыдні Клімавічы другі раз за два гады сустракалі новага старшыню райвыканкама. На месца галоўнага раённага вертыкальшчыка беларускі дыктатар нечакана прызначыў Аляксандра Анжэнку з Хоцімска. Яго папярэднік Віктар Пугач, патомны чыноўнік, прыйшоў у Клімавічы з суседняга Быхаўскага раёна, і цяпер падзеўся невядома куды.

Такая частая змена старшыняў райвыканкама не засталася незаўважнай для насельніцтва. Чытач тэлеграм-канала “Вячэрні Магілёў” Ніканор Віскоўскі задаецца пытаннем, чаму так адбылося. “За што вызвалілі 49-гадовага перспектыўнага кіраўніка, які мае за плячыма эканамічны факультэт БДСГА і Акадэмію кіравання пры прэзідэнце, вялікі вопыт паспяховай працы – ніхто толкам не ведае. А калі так, то з’яўляецца глеба для нядобрых чутак. І такое адбываецца з году ў год”, – заўважае чытач тэлеграм-канала.

Спадар Віскоўскі лічыць, што няправільна, калі аб прызначэнні новых службовых асоб насельніцтву паведамляюць, а куды сыходзяць іх папярэднікі, не кажуць нічога. “Гаворка ж ідзе не пра дробных чыноўнікаў, хоць і яны людзі, а пра эліту грамадства, на прадстаўнікоў якіх павінны раўняцца астатнія, браць з яе прыклад”, – разважае жыхар Магілёўскай вобласці.

Пры гэтым змену ў клімавіцкай вертыкалі ён звязвае з нядаўна агучанай МУС інфармацыяй аб раскрыцці карупцыйнай схемы ў Гродзенскай, Брэсцкай і Мінскай абласцях. Сутнасць яе ў тым, што дырэктар прыватнай кампаніі пастаянна даваў хабары службовым асобам сельскагаспадарчых прадпрыемстваў. Узамен яны павінны былі заказваць рамонт тэхнікі менавіта ў яго фірмы.

“Выяўленне і спыненне карупцыі ў ключавых галінах эканомікі, у тым ліку ў аграрным сектары, працягнецца. Значыць, з’явяцца новыя фігуранты крымінальных спраў. А як інакш, калі небяспечнай сацыяльнай хваробай пакутуюць лепшыя ў рэспубліцы вобласці! Што ўжо тады казаць пра Віцебскую, Гомельскую, ды і нашу Магілёўскую таксама. Ды і казалі ўжо, прычым шмат разоў, пра што паведамлялася ў друкаваных і электронных СМІ, у ТГ-канале «Вячэрні Магілёў» таксама. Так што наш рэгіён чакае свайго часу.  Ён блізкі, паколькі чуткі ходзяць розныя. І яны не беспадстаўныя”, – упэўнены мужчына.

Фотаздымак: www.rodniva.by

Клімавічы другі раз за два гады знаёмяцца з новым старшынёй райвыканкама. Пугач і Анжэнка

Клімавічанам зноў прадставілі новага кіраўніка раёна. Аляксандра Анжэнку з Хоцімска прызначылі старшынёй райвыканкама, і 29 верасня старшыня аблвыканкама Анатоль Ісачанка прывёз яго на пазачарговую сесію раённага «савета дэпутатаў».
Мінулае знаёмства адбылося роўна два гады таму: 30 верасня 2024 года той жа Ісачанка на такой жа пазачарговай сесіі прадставіў Пугача.
Віктар Пугач, патомны чыноўнік, прыйшоў з суседняга Быхаўскага раёна, дзе быў намеснікам старшыні райвыканкама па эканоміцы, а да гэтага працаваў у быхаўскіх калгасе, бальніцы, райвыканкаме і ТАА «Быхаўлес».
Тады Ісачанка дзякаваў за працу яго папярэдніку Дзмітрыю Хайноўскаму, цяпер – самому Пугачу.
Схема паўтарылася амаль даслоўна. Анжэнка таксама прыйшоў намеснікам старшыні з суседняга раёна – Хоцімскага, дзе адказваў за будаўніцтва, жыллёва-камунальную гаспадарку і надзвычайныя сітуацыі, і таксама правёў усю кар’еру ў адным раёне.
А ў ліпені ганаровую грамату Хоцімскага райвыканкама там атрымала кіраўніца спраў Велікаліпаўскага сельвыканкама Галіна Анжэнка – магчыма, аднафамілец.
Розніца ў профілі: Пугач – эканаміст з аграрнай адукацыяй, які працаваў у райвыканкаме з 2003 года, Анжэнка – трыццацісямігадовы інжынер па будаўнічых і дарожных машынах.
Аднак абяцанні на сесіях прагучалі падобныя. Пугач у 2024 годзе казаў пра завяршэнне палявых работ, падрыхтоўку да «Дажынак» і прагнозныя паказчыкі. Анжэнка ў першым выступленні паабяцаў увагу ўсім галінам, асабліва сельскай гаспадарцы.
Падобна на тое, мяняючы кіраўнікоў раёнаў, састарэлы Лукашэнка ўжо звяраецца не з вынікамі іх працы, а са становішчам Марса і Юпітэра.
Новае галоўнае імя клімаўчанам давядзецца вывучыць да зімы, а наступнае, калі захаваецца тэмп і дакладнасць сонцавароту, спатрэбіцца восенню 2028 года.

Фота «Родная нива» розных гадоў.

Галоўным вертыкальшчыкам у Клімавічах стаў чыноўнік з Хоцімска

Кіраваць Клімавіцкім райвыканкамам прызначаны Аляксандр Анжэнка, які да гэтага быў намеснікам старшыні райвыканкама ў Хоцімску.

Пра тое, што Анжэнка цяпер будзе жыць і працаваць у Клімавічах, стала вядома сёння, пасля кадравых змен, якія правёў беларускі дыктатар.

Анжэнка на чыноўніцкіх пасадах ўжо даўно. У 2019 годзе ён быў начальнікам аддзела архітэктуры, будаўніцтва і землеўпарадкавання райвыканкама. Потым стаў намеснікам кіраўніка хоцімскай вертыкалі. Як звычайны лукашэнкаўскі чыноўнік, прадстаўляе не толькі выканаўчую, але і прадстаўнічую ўладу. Ён – дэпутат Хотімскага райсавета дэпутатаў. Ці будзе ён цяпер неяк прадстаўляць інтарэсы тых, ад каго нібыта абіраўся, і весці іх асабісты прыём – пытанне адкрытае. Магчыма, Анжэнка будзе бачыць сэнс хаця б раз на месяц вяртацца з Клімавічаў у Хоцімск, каб пачуць выбарцаў сваёй Набярэжнай выбарчай акругі №16.

На пасадзе намесніка старшыні курыраваў пытанні будаўніцтва, паліўна-энергетычнага комплекса, надзвычайных сітуацый, кантроля за інвестыцыйнай дзейнасцю і інш.

Фотаздымак: khotimsk.gov.by

Усё для шчасця ёсць: хто ў Клімавічах гаворыць ад імя народнага адзінства

Да 17 верасня клімавіцкая раённая газета сабрала меркаванні гараджан пра Дзень народнага адзінства, і першай слова атрымала Ала Анціпава. Намесніца старшыні раённай арганізацыі РГА «Белая Русь» заявіла: Беларусь – краіна, «дзе ёсць усё для жыцця і шчасця», а ад кожнага залежыць, каб яна квітнела. Паглядзім, у каго менавіта ўсё ёсць.
Анціпавай у кастрычніку споўніцца шэсцьдзесят шэсць. У 2010 годзе яна, намесніца дырэктара прафесійнага ліцэя № 14, стала «дэпутатам» раённага «савета» – тады яшчэ беспартыйнай.
У 2018 годзе ўзначальвала ўчастковую выбарчую камісію № 8 на мясцовых выбарах і адначасова раённую «Белую Русь».
Цяпер на сайце райвыканкама Анціпава значыцца вядучым спецыялістам і намесніцай старшыні арганізацыі, то бок на штатнай стаўцы.
У красавіку абласная канферэнцыя ўручыла Але Георгіеўне сярэбраны знак «За общественную деятельность».
У маі яна ж расказвала раёнцы пра сумесны праект з камунальнікамі – тры актывісткі пафарбавалі дзіцячую пляцоўку у двары дома № 123 на Леніна. Гэта быў унёсак арганізацыі ў агульнарэспубліканскі рух па добраўпарадкаванні. Па сутнасці справы – фікцыя.
Да шасцідзесяці шасці гадоў у Анціпавай сапраўды ёсць усё, што належыць чалавеку яе становішча і размаху:

  • пенсія па ўзросце;
  • стаўка вядучага спецыяліста ў грамадскім аб’яднанні;
  • месца ў першым радзе на раённых урачыстасцях – ад злёту перадавікоў да ўзнагароджання камбайнераў;
  • першая рэпліка ў раёнцы на кожнае дзяржаўнае свята.

Пры такім наборы жаданне, каб нічога не мянялася, натуральнае: любая перамена – рызыка для стаўкі, знака і першага рада.
Тая ж інтанацыя гучала 14 верасня ў Палацы Незалежнасці, дзе Лукашэнка ўручаў узнагароды да свята. Яму 72, з іх 32 гады ва ўладзе.
Дзед запэўніў залу, што зробіць усё, каб людзі «не былі, як мінімум, расчараваныя», а калі на Беларусь і будуць паказваць пальцам, то «з зайздрасцю».
Ні слова пра тое, што трэба змяніць – толькі пра тое, што трэба захаваць. Анціпава і Лукашэнка гавораць адно і тое ж з розных паверхаў адной вертыкалі: у нас усё ёсць, не чапайце.
Што да «ўз’яднання» 1939 года, дзеля якога заснавана свята, то Чырвоная армія 17 верасня перайшла польскую мяжу па дамоўленасці з Германіяй.
У каляндар гэтая дата трапіла ў 2021 годзе – праз год разгромнага паражэння Лукашэнкі на выбарах, калі адзінства спатрэбілася неадкладна.
«Ад кожнага з нас залежыць», – сцвярджае Анціпава. Ад яе залежыць, каб раённая «Белая Русь» своечасова здала справаздачу аб мерапрыемствах. Ад Лукашэнкі – каб нічога не мянялася яшчэ адзін тэрмін. Абодва спраўляюцца.

Фота раённай газеты.

У Клімавічах цалкам вынішчылі беларускую мову ў грамадскім транспарце

Беларускую мову цяпер немагчыма сустрэць ні ў клімавіцкім грамадскім транспарце, ні ў яго інфраструктуры.

Шыльды з назвамі прыпынкаў, расклад руху, інфармаванне пасажыраў ў аўтобусах і тэкставая інфармацыя для іх – выключна на рускай мове. Пра гэта паведамілі грамадскаму “моўнаму інспектару” Ігару Случаку ў Клімавіцкім філіяле аўтапарка №9 ААТ “Магілёўаблаўтатранс”.

Напярэдадні святкавання новага свята “Дзень народнага адзінства” праўладныя СМІ распавядаюць, як знішчалася беларуская мова ў Заходняй Беларусі, якая ў міжваенны перыяд знаходзілася ў складзе Польшчы. Клімавіцкія транспартнікі, па ўсім відаць, працягваюць справу вынішчэння беларушчыны і пэўна ўжо дасягнулі ў гэтым большых поспехаў, чым тыя, каго цяпер бэсціць прапаганда ў Беларусі.

Фотаздымак: fotobus.msk.ru

Сыранкоў прапагандаваў КПБ на клімавцкім лікёра-гарэлачным

У Клімавічы Сыранкоў прыехаў, каб распавядаць работнікам ААТ “Клімавіцкі лікёра-гарэлачны завод” аб экалогіі. Як піша раённая “Родная ніва”, ён “абмеркаваў розныя аспекты экалагічнай культуры, сфарміраванай у грамадзян нашай краіны”. 

“Клопат аб чысціні і прыгажосці прыроды, населеных пунктаў пачынаецца з малога: разумнага спажывання наяўных рэсурсаў і іх папаўненне. Прыемна, што падрастаючае пакаленне вучаць рупліваму стаўленню да наяўных у нас багаццяў, расліннаму і жывёльнаму свету з ранняга дзяцінства”, – перадае агульны змест сыранкоўскай сустрэчы газета. Пэўна, такая па вялікаму рахунку бессэнсоўная трывіяльшчына, была не самым галоўным чыннікам прыезда Сырканкова на ЛГЗ. Галоўным было прапагандаванне сярод работнікаў прадпрыемства партыі, якую ўзначальвае новаспечаны сенатар – Камуністычную партыю Беларусі.

Наглядная агітацыя ў выглядзе партыйных банэраў стаяла побач з Сыранковым падчас сустрэчы. Нават калі пагадзіцца з тым, што падчас сваёй лекцыі партыйны бос ніяк не ўзгадаў пра КПБ, наглядная агітацыя добра рабіла гэта за яго цягам усёй сустрэчы. У сваю чаргу агітацыя якраз з’яўляецца адным з відаў дзейнасці палітычнай партыі. 

Паводле акона “Аб палітычных партыях”, такія палітфармаванні будуюцца па тэрытарыяльным прынцыпе. Іх дзейнасць на прадпрыемствах забароненая. Але сенатару Сыранкову дазволена парушаць гэты закон.

Фотаздымак: “Родная ніва”