Category: Навіны Мсціслава

Ядзерны магільнік на Мсціслаўшчыне запланаваны непадалёк ад радовішча фасфарытаў

Навіна ад

Ядзерны магільнік, які можа быць пабудаваны ў Мсціслаўскім раёне, бедзе знаходзіцца на адлегласці ў 14 км ад радовішча фасфарытаў.

На такую асабліваць магчымага размяшчэння магільніка ўказаў аўтар аднаго з некалькіх зваротаў да БелРАА, якое разглядае месцы пад магільнік ядзерных адходаў, у тым ліку на Магілёўшчыне. На публікацыю трыма райвыканкамамі (Астравецкім, Мсціслаўскім і Хойніцкім) зводкі водгукаў па справаздачы аб Ацэнцы ўздзеяння на навакольнае асяроддзе па аб’екце (АУНА) «Узвядзенне пункта пахавання і часовага захоўвання радыеактыўных адходаў» звярнуў увагу “Флагшток”.

Грамадзянін піша, што «у самай жа справаздачы прамым тэкстам прызнаецца: будучая распрацоўка гэтых кар’ераў крытычна панізіць грунтавыя воды і выкліча маштабнае прасяданне зямлі. Пры нармальнай экспертызе такая рызыка абвальвання імгненна бракуе любую лакацыю для ядзернага аб’екта».  

Аднак у БелРАА запэўнілі, што змяненне ўзроўню грунтавых вод і магчымыя дэфармацыі паверхні ўлічваюцца пры параўнальным аналізе разгляданых альтэрнатыўных пляцовак. 

«У выпадку рашэння аб размяшчэнні планаванай гаспадарчай дзейнасці на альтэрнатыўнай пляцоўцы ў Мсціслаўскім раёне, далейшае праектаванне будаўнічых канструкцый ПЗРА будзе весціся з ужываннем шматбар’ернай сістэмы абароны і падвышанай жорсткасці фундамента, здольных кампенсаваць асяданне грунтоў», – адзначылі ў арганізацыі, якой кіруе выхадзец з КДБ Міхаіл Кісель. 

Другі заяўнік звярнуў увагу на тое, што тэрмін пераносу радыяцыі з грунтовымі водамі ў раку Натопу Мсціслаўскага раёна ў Дняпроўскім басейне складае па дадзеных справаздачы 5-14 гадоў. А сам аб’ект закладваецца нібыта на стагоддзі.

На гэта адказалі, што “праект не ігнаруе базавую гідрадынаміку, а бярэ яе за аснову пры разліку надзейнасці штучных бар’ераў бяспекі”, сцвярджаючы, што бяспека ПЗРА на працягу заяўленых тэрмінаў грунтуецца не на ізаляцыйных уласцівасцях грунтоў, а на прынцыпе эшаланаванай шматбар’ернай абароны, прынятым у міжнароднай практыцы.

У водгуках, якія паступілі падчас правядзення сходаў па абмеркаванні справаздачы аб АУНА, змяшчаецца чатыры выступы ў падтрымку будаўніцтва магільніка ў Астравецкім раёне, два – у Мсціслаўскім, адзін – у Хойніцкім раёне. 

Фотаздымак: БелРАА

За 740 чырвонакніжных ракаў – адзін год зняволення з адтэрміноўкай

Навіна ад

Жыхара Мсціслаўскага раёна асудзілі на адзін год пазбаўлення волі з адтэрміноўкай за браканьерскі вылаў 740 шырокапалых ракаў, якія занесены ў Чырвоную кнігу Беларусі.

У ліпені гэтага года мужчына з дапамогай раколавак здабыў ракаў, вылаў якіх забаронены. Браканьера затрымалі супрацоўнікі Мсціслаўскай міжраённай інспекцыі аховы жывёльнага і расліннага свету каля аўтамабіля, у які ён якраз пераносіў мяшкі са здабычай.

Дзякуючы своечасоваму ўмяшанню інспектараў 411 ракаў засталіся жывымі. Іх вярнулі ў натуральнае асяроддзе. А вось астатніх 329 ракаў выратаваць не ўдалося. Нанесеную прыродзе шкоду ацанілі ў 149 850 рублёў.

У судзе мужчына цалкам прызнаў віну, раскаяўся і добраахвотна кампенсаваў шкоду. Гэтыя абставіны суд улічыў як змякчальныя. Абцяжарвальных абставінаў не выявілі.

У выніку яго прызналі вінаватым у незаконнай здабычы водных жывёл, якая прычыніла шкоду ў асабліва буйным памеры. Пакаранне – адзін год пазбаўлення волі і штраф у 40 базавых велічынь, або 1800 рублёў.

Аднак адпраўляць браканьера за краты адразу не будуць. Суд пастанавіў не прыводзіць пакаранне ў выглядзе пазбаўлення волі ў выкананне, калі на працягу аднаго года мужчына не здзейсніць новага злачынства і будзе выконваць ускладзеныя на яго абавязкі.

Фотаздымак: redrak.dp.ua

На Магілёўшчыне аграгаспадарка месяц не плаціла 205 работнікам. Штраф дырэктару меншы за адзін іх заробак

Навіна ад

У Мсціслаўскім раёне адно з прадпрыемстваў аграпрамысловага комплексу не выплаціла 205 работнікам заробак за адзін з месяцаў гэтага года. Запазычанасць, паводле даных пракуратуры Магілёўскай вобласці, перавысіла 288 тысяч рублёў. Назву гаспадаркі і прозвішча кіраўніка пракуратура не прыводзіць.

Пасля прадпісання раённай пракуратуры грошы людзям пералічылі ў поўным аб’ёме, а кіраўніка аштрафавалі на 30 базавых велічынь. Пры базавай велічыні 45 рублёў гэта 1350 рублёў.

У сярэднім на кожнага работніка прыпала каля 1400 рублёў запазычанасці. Выходзіць, штраф дырэктару аказаўся меншы, чым ён завінаваціўся за месяц аднаму свайму работніку.

Мсціслаўскі раён сёлета не першы.

У сакавіку адна з сельгасарганізацый Быхаўскага раёна завінавацілася 94 работнікам больш за 104 тысячы рублёў заробку.

Пакінуць дзвесце чалавек на месяц без грошай дырэктару абышлося танней, чым заплаціць аднаму з іх.

Выява ілюстрацыйнага характару.

У Мсціслаўскім раёне за даўгі прадаюць прыбіральню за 900 рублёў

Навіна ад

Цагляную прыбіральню плошчай 4,5 квадратнага метра ў вёсцы Каўшова выставілі на таргі як арыштаваную маёмасць. Пачатковая цана – 900 рублёў, задатак – 90. Заяўкі прымаюць да 12 кастрычніка, таргі пройдуць 13 кастрычніка.

Прыбіральня прадаецца ў межах выканаўчага вядзення, даўжнік – ТАА «Асиката». На будынак накладзены арышт і забарона на рэгістрацыйныя дзеянні.

Кампанія «Асиката» ў 2023 годзе купіла на аўкцыёне будынак школы ў Каўшове – пад арганічнае земляробства і аграэкатурызм.

На сваім сайце «Асиката» называе вёску навучальным доследна-эксперыментальным вытворчым цэнтрам, дзе іншая фірма вырошчвае саджанцы клубніц, ажын і малін.

Цяпер у кампаніі за даўгі прадаюць прыбіральню. Зямлі пакупнік не атрымае: будынак стаіць на арандаваным участку плошчай 3,8 гектара, асобна пад прыбіральню зямля не выдзялялася.

Фота e-auction.by.

У Мсціслаўскім раёне вяскоўцы самі затрымалі дачнага вора

Навіна ад

Жыхар Горацкага раёна папаўся на крадзяжы, калі чарговы раз ускрыў пустуючую хату ў мясцовай вёсцы.

62-гадовы жыхар Горацкага раёна хадзіў па вёсцы ў пошуках таго, чым можна было б пажывіцца. Урэшце яго ўвагу прыцягнула дача, гаспадары якой нейкі час там не з’яўляліся. Мужчына выставіў аконную раму і залез у дом. Багатай здабычы там не аказалася, але, падобна, ён і не разлічваў на сямейныя каштоўнасці. З хаты зніклі алкаголь, закуска і цыгарэты. З гэтым няхітрым наборам злодзей і сышоў адзначаць удалы, як яму тады здавалася, паход. 

На адной дачы мужчына, паводле міліцыі, не спыніўся. Неўзабаве ён ужо прыглядаў сабе новую здабычу ў адным з населеных пунктаў суседняга Мсціслаўскага раёна. Але там схема дала збой. Мясцовыя жыхары заўважылі незнаёмца, які хадзіў па ўчастку дачнікаў, што нядаўна з’ехалі. Чакаць, пакуль госць выставіць чарговую аконную раму і праверыць запасы гаспадароў, вяскоўцы не сталі. Яны самі затрымалі мужчыну і перадалі яго міліцыі.

Адмаўляцца затрыманы не стаў. Паводле праваахоўнікаў, ён прызнаўся не толькі ў крадзяжы ў Горацкім раёне, але і яшчэ ў некалькіх падобных эпізодах. Узбуджаны крымінальныя справы.

Фотаздымак з адкрытых крыніц.

Знойдзены новыя доказы магчымых работ пад ядзерны магільнік на Мсціслаўшчыне

Навіна ад

Аналіз здымкаў з космасу выявіў магчымую масштабную аперацыю па дэзынфармацыі датычна будаўніцтва ядзернага магільніка ў Мсціслаўскім раёне.

Нагадаем, што дырэктар Беларускай арганізацыі па абыходжанні з радыеактыўнымі адходамі (БелРАА) Міхаіл Кісель 23 жніўня ў эфіры дзяржаўнага тэлеканала СТБ заявіў, што у Мсціслаўскім раёне мясцовыя прадпрыемствы проста вядуць меліярацыю. Даследчыя работы па выбару пляцоўкі пад магільнік у Мсціслаўскім і Хойніцкім раёнах, маўляў, завяршыліся ў ліпені, а ў Астравецкім раёне працягваюцца. Адмаўленне распрацоўкі тэрыторыі пад магільнік з’явілася пасля таго, як на спадарожнікавых здымках каля вёскі Ходасы выявіліся маштабныя земляныя работы.

Аднак журналісты гомельскага «Флагштока» вырашылі праверыць афіцыйную версію не па заявах чыноўнікаў, а па тым, што бачна з космасу. І выявілі дэталі, якія не стасуюцца са словамі кіраўніцтва БелРАА.

З дапамогай сэрвісу Copernicus Browser журналісты прааналізавалі спадарожнікавыя здымкі тэрыторыі, дзе можа з’явіцца пункт пахавання радыеактыўных адкідаў. Для параўнання ўзялі здымкі амаль за год – з 29 верасня 2025-га па 8 верасня 2026 года – і склалі з іх анімацыю.

Першыя прыкметы земляных работ бачныя ўжо ў верасні 2025 года – у сярэдзіне даследаванай зоны з’явілася траншэя ўздоўж мясцовай дарогі. Значна больш актыўныя работы спадарожнікі зафіксавалі ў сакавіку 2026-га. Змены сталі бачныя ў месцах шматлікіх суфазійных правалаў. Журналісты мяркуюць, што іх маглі засыпаць, выраўноўваючы паверхню зямлі.

У пэўным сэнсе разабрацца ў тым, што адбываецца, дапамог снег. На белым покрыве добра бачныя сляды цяжкай тэхнікі і свежыя земляныя работы: снег у месцах руху машын і перамяшчэння грунту ператвараўся ў цёмную масу, якая выразна вылучалася на спадарожнікавых здымках. Прыкладна ў той жа час пачалі засыпаць роў безназоўнага ручая ў зоне меркаванага будаўніцтва магільніка.

З надыходам вегетацыйнага перыяду асноўная актыўнасць перамясцілася ў паўночную частку даследаванай тэрыторыі – прыкладна за два кіламетры ад пляцоўкі, дзе можа з’явіцца аб’ект для радыеактыўных адкідаў. Плошча пашкоджанага травянога покрыва працягвала павялічвацца ажно да канца жніўня.

І вось тут узнікае галоўная нестыкоўка. БелРАА заяўляла, што ўсе работы ў раёне меркаванага магільніка завяршылі яшчэ ў ліпені 2026 года. А спадарожнікавыя здымкі, прааналізаваныя «Флагштокам», паказваюць прыкметы працягу земляных работ і ў жніўні.

Само па сабе гэта яшчэ не даказвае, што там ужо будуюць сховішча радыеактыўных адкідаў. Але афіцыйная версія пра поўнае завяршэнне работ у ліпені пасля такіх здымкаў патрабуе як мінімум дадатковага тлумачэння.

Таксама застаецца пытанне, чаму маштабная меліярацыя разгарнулася менавіта каля адной з трох пляцовак, якія разглядаюцца для магчымага размяшчэння магільніка. Акрамя таго, «Флагшток» не знайшоў прыкметаў аналагічных маштабных работ у іншых частках Мсціслаўскага раёна за той жа перыяд. Асобнага пераканаўчага тлумачэння таго, што адбывалася на поўнач ад меркаванай пляцоўкі, пакуль таксама няма.

Таму гісторыя пакуль упіраецца ў даволі простую рэч: з космасу відаць, што зямлю там актыўна варушылі, але дакладна сказаць, навошта, па гэтых здымках немагчыма. Кропку маглі б паставіць дэталёвыя спадарожнікавыя здымкі высокай раздзяляльнасці альбо незалежныя здымкі непасрэдна на месцы. 

Фотаздымак з адкрытых крыніц

Мсціслаўскі стралок па людзях атрымаў пяць гадоў знаволення

Навіна ад

Жыхар Мсціслаўскага раёна страляў з пнеўматыкі па людзях і аўтамабілях – атрымаў пяць гадоў калоніі ўзмоцненага рэжыму і прымусовае лячэнне ад алкагалізму.

Навагодні дзень 31 снежня 2025 года для 32-гадовага жыхара Мсціслаўскага раёна адзначыўся серыяй п’яных стрэлаў. Пнеўматычны газабалонны пісталет «Stalker S92ME» ён набыў на тэрыторыі, як піша пракуратура, суседняй дзяржавы. Суседняя дзяржава, якую праваахоўнікі ніколі не хочуць называць – Расія. 

Ужо раніцай, будучы п’яным, ён выкарыстаў новую пакупку ў маршрутцы: восем разоў стрэліў у свайго калегу. Той атрымаў цялесныя пашкоджанні. Маршрутка таксама калясіла па тэрыторыі Расіі, хоць пра гэта і не піша пракуратура.

Пасля вяртання ў Беларусь страляніна працягнулася. Увечары ў Магілёўскім раёне мужчына выйшаў на балкон кватэры знаёмага і шэсць разоў стрэліў па двух аўтамабілях на паркоўцы. Іх уладальнікам нанесена шкода больш чым на 1,5 тыс. рублёў. Але і аўтамабілямі справа не скончылася. У кватэры калегі стралок пацэліў з пнеўматыкі ў нагу яго маці, таксама прычыніўшы жанчыне цялесныя пашкоджанні.

У судзе мужчына цалкам прызнаў віну і заявіў, што раскайваецца.

Суд Чэрыкаўскага раёна прызнаў яго вінаватым у злосным і асабліва злосным хуліганстве, у тым ліку паўторным, і прысудзіў пяць гадоў пазбаўлення волі ў калоніі ўзмоцненага рэжыму. Акрамя турэмнага тэрміну, мужчыне прызначылі прымусовае лячэнне ад хранічнага алкагалізму.

Суд таксама пастанавіў спагнаць на карысць аднаго з пацярпелых 1,3 тыс. рублёў матэрыяльнай шкоды і яшчэ 500 рублёў кампенсацыі маральнай шкоды. Прысуд пакуль не набыў законную моц.

Фотаздымак з адкрытых крыніц

Магільнік без адраса: у Мсціславе абмеркавалі пункт пахавання радыеактыўных адходаў

Навіна ад

26 жніўня у зале Мсціслаўскага раённага выканаўчага камітэта прайшоў сход па абмеркаванні справаздачы аб ацэнцы ўздзеяння на навакольнае асяроддзе па аб’екце «Узвядзенне пункта пахавання і часовага захоўвання радыеактыўных адходаў».
Мсціслаўскі раён – адна з трох пляцовак, якія разглядае дзяржава; дзве іншыя знаходзяцца ў Астравецкім і Хойніцкім раёнах.
Пра праект дакладвалі дырэктар Беларускай арганізацыі па абыходжанні з радыеактыўнымі адходамі Міхаіл Кісель і намеснік галоўнага інжынера цепламеханічнай часткі «Белніпіэнергапрама» Андрэй Рыкаў – шматбар’ерная абарона, гарантыі бяспекі, маніторынг пасля ўводу ў эксплуатацыю.
Кісель асобна агаварыў, што адпрацаванае ядзернае паліва БелАЭС тут захоўвацца не будзе: паводле міжурадавага пагаднення яго вывозяць на перапрацоўку ў Расію. Сам аб’ект павінен быць пабудаваны да канца 2030 года і прыняць першыя кантэйнеры да 2031-га, месца пад яго спатрэбіцца каля квадратнага кіламетра.
Жыхары пыталіся пра ўзровень радыяцыйнага кантролю, пра здароўе цяперашняга і будучых пакаленняў, пра працоўныя месцы для мясцовых спецыялістаў. Адказы раённае выданне назвала вычарпальнымі.
Чаго ў справаздачы пра сход няма – дык гэта адраса. У дакументах АУНА мсціслаўская пляцоўка праходзіць пад нумарам 3-3, публічна ні БелРАА, ні праекціроўшчык месца не называлі.
Прабел запоўнілі журналісты «Флагштока» па слайдах прэзентацый самога БелРАА: паміж вёскамі Сычоўка і Валоўнікі, за 19 кіламетраў ад Мсціслава, побач працякае Белая Натапа – прыток Сожа.
Відэа з архітэктурна-планіровачнымі рашэннямі будучага магільніка БелРАА паказала яшчэ ў сакавіку, і ўжо тады да яго была тая ж прэтэнзія: базавыя параметры палігона не названы.
За тры дні да сходу, 23 жніўня, Кісель заявіў у эфіры СТБ, што ўсе тры пляцоўкі раўназначныя, а сярод крытэрыяў адбору – сацыяльная прымальнасць і наяўнасць працоўных рэсурсаў. Там жа ён растлумачыў, чым мсціслаўская пляцоўка адрознівалася ў 2024-2025 гадах: слабыя грунты, пасля дажджу туды не праходзілі нават паўнапрывадныя грузавікі.
Цяпер, паводле яго слоў, у Мсціславе меліярацыйныя работы вядуць мясцовыя прадпрыемствы. Палявыя даследаванні на мсціслаўскай і хойніцкай пляцоўках завяршыліся ў ліпені, у Астраўцы працягваюцца.
Канчатковае рашэнне прыме дзяржаўная камісія – пазней, калі скончацца экспертызы і абмеркаванні.

Пляцоўкі пакуль раўназначныя, але зямлю чамусьці сушаць толькі на адной.

Фота раённай газеты.

Умоўны выбух у Мсціславе: катастрофу адпрацоўвалі на складзе, а балоны стаяць у тысячах дамоў

Навіна ад

На базе Мсціслаўскага раёна газазабеспячэння прайшлі тактыка-спецыяльныя вучэнні. Паводле задумы, на складзе захоўвання газавых балонаў адбыўся выбух, часткова абваліліся канструкцыі, пад заваламі аказаліся заблакаваныя людзі.
 Ратавальнікі спачатку тушылі ўмоўны пажар, каб зняць пагрозу паўторнага выбуху, затым разбіралі завалы гідраўлічным аварыйна-выратавальным інструментам і цяжкай тэхнікай.
Газавікі перакрылі падачу газу да аварыйнага ўчастка, энергетыкі абясточылі будынак, супрацоўнікі РАУС выставілі ачапленне. Кіраваў вучэннямі намеснік начальніка раённага аддзела па надзвычайных сітуацыях. Ён назваў такія трэніроўкі жыццёва неабходнымі і казаў, што ў рэальнай сітуацыі лік ідзе на секунды.
Маштаб таго, што адпрацоўвалі, варта суаднесці з маштабам самога прадпрыемства. Мсціслаўскі раён газазабеспячэння ўваходзіць у вытворчае ўпраўленне «Горкігаз» і, паводле даных гадавой даўніны, складаецца з 53 спецыялістаў.
На абслугоўванні – каля 230 кіламетраў сетак рознага ціску, больш за 5200 абанентаў прыроднага газу і звыш 3,5 тысячы жыхароў, якія карыстаюцца звадкаваным газам у балонах.
То бок прыкладна ў кожнага трэцяга абанента раёна газ не ў трубе, а ў ёмістасці, якую прывозяць, заносяць у дом і мяняюць уручную. Склад, дзе разыгрывалі катастрофу – адна кропка на карце.
Самі балоны размеркаваныя па тысячах кухняў, хлявоў і дачных дамоў.
Рэальныя ж здарэнні з газам на Магілёўшчыне выглядаюць менавіта так – бытавымі.
У канцы мая у гаражным кааператыве на вуліцы Грышына ў Магілёве ўспыхнула газапаветраная сумесь: гаспадар зняў з аўтамабіля газабалоннае абсталяванне, паклаў яго ў назіральную яму і пачаў зварачныя работы. Загарэлася адзенне на ім і на яго жонцы, пацярпеў сусед па гаражы – усяго трое.
Вучэнні скончыліся дакладам аб тым, што ўсе задачы выкананыя. Адпрацоўвалі пры гэтым аварыю на аб’екце, дзе газ захоўваецца пад наглядам Сцэнарый, паводле якога балон выбухае ў прыватным доме, у гэты дзень не разыгрывалі – хоць менавіта так здарэнні з газам у вобласці і выглядаюць.

Фота раённай газеты.

У БелРАА адказалі на здымкі з-пад Мсціслава: работы былі, але гэта меліярацыя

Навіна ад

Праз пяць дзён пасля таго, як на спадарожнікавых здымках каля вёскі Ходасы выявіліся маштабныя земляныя работы, тое, што адбываецца на мсціслаўскай пляцоўцы, патлумачыў дырэктар Беларускай арганізацыі па абыходжанні з радыеактыўнымі адходамі Міхаіл Кісель. Зрабіў ён гэта 23 жніўня у эфіры дзяржаўнага тэлеканала СТБ.

Паводле яго версіі, пляцоўка пад Мсціславам з самага пачатку адрознівалася слабымі грунтамі: у дождж туды не маглі праехаць нават паўнапрывадныя грузавікі. Таму цяпер там працуюць мясцовыя прадпрыемствы – вядуць меліярацыю. Палявыя работы, прызнае кіраўнік БелРАА, вяліся, але гэта «не той аб’ём, які спрабуюць паказаць людзям».

Даследчыя работы на мсціслаўскай і хойніцкай пляцоўках, паводле яго слоў, завяршыліся ў ліпені, у Астравецкім раёне працягваюцца. Усе тры варыянты, сцвярджае Кісель, на цяперашнім этапе раўназначныя, а крытэрыі выбару ўключаюць не толькі інжынерную бяспеку на стагоддзі наперад, але і сацыяльную прымальнасць, гэта значыць меркаванне насельніцтва і наяўнасць працоўных рэсурсаў.

Такім чынам, сам факт работ на мсціслаўскай пляцоўцы дзяржаўнае прадпрыемства не адмаўляе.

Разыходжанне толькі ў іх тлумачэнні: спадарожнікавыя здымкі паказваюць расчышчаную расліннасць, засыпаную частку лагчыны ручая і зменены рэльеф на ўчастку каля 3,4 квадратнага кіламетра, БелРАА называе гэта меліярацыяй і падрыхтоўкай пад’ездаў. Праверыць, дзе заканчваецца адно і пачынаецца другое, па здымках немагчыма – для гэтага патрэбныя дакументы на земляныя работы і дамовы з тымі самымі мясцовымі прадпрыемствамі.

Істотна іншае: прыярытэтная пляцоўка фармальна не выбрана. Справаздача аб ацэнцы ўздзеяння на навакольнае асяроддзе толькі выносіцца на абмеркаванне, аналітычныя матэрыялы павінны пайсці ва ўрадавую камісію ў першым квартале 2027 года, і толькі пасля яе рашэння пачнецца архітэктурнае праектаванне. Пры гэтым меліярацыйныя работы на адной з трох раўназначных пляцовак ужо ідуць – а на дзвюх іншых, паводле даных даследавання здымкаў, нічога параўнальнага не адбываецца.

Тэрміны пры гэтым жорсткія: паводле стратэгіі пункт пахавання павінен быць пабудаваны да канца 2030 года, а першыя кантэйнеры з БелАЭС ён павінен прыняць да 2031-га. Абмеркаванне справаздачы аб ацэнцы ўздзеяння ў Мсціславе прызначана на 26 жніўня і пройдзе ў будынку райвыканкама; у Астраўцы такое абмеркаванне прайшло 20 жніўня, у Хойніках намечана на 10 верасня.

Паказальная і розніца ва ўзроўнях адказу. Калі журналісты патэлефанавалі ў сельсавет у Ходасах і спыталі, што будуюць побач з вёскай, там кінулі слухаўку. Тлумачэнне з’явілася праз пяць дзён – у рэспубліканскім эфіры, за тры дні да абмеркаванняў, на якія жыхарам Мсціслаўскага раёна давядзецца прыйсці з тымі ж пытаннямі.

Фота «Флагшток».