Category: Навіны Бабруйска

Наш адказ лорду Керзану – прэс для саломы робяць у Бабруйску

Навіна ад

На полі ў Бярозаўскім раёне Брэсцкай вобласці 31 ліпеня Лукашэнку паказалі доследны ўзор камбінаванага рулоннага прэс-падборшчыка. Машыну сабралі на «Бабруйскаграмашы»: тэхніка, якой у беларускім полі не хапае больш за ўсё, прыехала на брэсцкае поле з Магілёўскай вобласці.

Размова пра яе пачалася з саломы. Пралятаючы над рэгіёнам, дзед заўважыў, што значныя аб’ёмы з палёў да гэтага часу не вывезены. Араць і сеяць рапс трэба ўжо заўтра, а поле занята. Навіна так сабе – пра беларускі прэс-падборшчык Лукашэнка мроіў з маладосці. І вось старому за семдзесят, а салома ўсё яшчэ ляжыць на палях.

Што паказалі на полі:

  • узровень лакалізацыі першага доследнага ўзору перавышае 70 працэнтаў, у другога эксперыментальнага – больш за 80;
  • раму, адзін з самых складаных элементаў, рабілі на даччыным прадпрыемстве «Гомсельмаша»;
  • уласная распрацоўка – сістэма кіравання і гідрасістэмы, менавіта на гэтым завод і разлічвае выйграваць у цане ў замежных машын;
  • агрэгат прэсуе кармавыя і тэхнічныя культуры, абмотвае рулоны сеткай і стрэтч-плёнкай.

Лічба пра лакалізацыю чытаецца і наадварот. Больш за 70 працэнтаў свайго азначае, што амаль трэць машыны, якую называюць айчыннай, прыехала з-за мяжы. Яшчэ адзін прэс, паказаны тут жа, сабраны ў Брэсцкай вобласці з імпартных камплектуючых, і лакалізацыя ў яго пакуль 30 працэнтаў, з абяцаннем давесці яе да 60 у наступным годзе.

Выпрабаванні бабруйскага ўзору плануюць завяршыць у гэтым годзе, доследную партыю і серыйную вытворчасць абяцаюць у 2027-м.

Пры гэтым «першы айчынны прэс-падборшчык» на заводзе паказвалі віцэ-прэм’еру Віктару Каранкевічу яшчэ ў верасні 2025 года, а патрабаванне яго зрабіць прагучала летам таго ж года: прэс тады назвалі пытаннем жыцця і смерці. З таго часу прайшло больш за год, а машына па-ранейшаму доследная.

Патрэбу беларускага рынку Мінсельгасхарч ацэньвае больш чым у 2,2 тысячы высокапрадукцыйных прэсаў. Каб яе закрыць, трэба выпускаць каля 300 машын за год. «Бабруйскаграмаш» на наступны год плануе 50 адзінак – адну шостую ад гадавой нормы. Абяцана, што далей падключацца і іншыя прадпрыемствы краіны.

Віцэ-прэм’ер Юрый Шулейка назваў бабруйскую распрацоўку аналагам найлепшага еўрапейскага прэса.

Найлепшы ці не – час пакажа. А пакуль зразумела толькі адно – яшчэ адзін пакет санкцый можа перакрыць канал паставак імпартных запчастак, і тады айчынны прэс-падборшчык не зрушыцца з месца – на адной толькі гомсельмашаўскай раме далёка не паедзеш.

Фота ведамаснага сайта Лукашэнкі.

Паехаў на рыбалку з сынам. У Бабруйскім раёне патануў мужчына

Навіна ад

У вёсцы Саломенка Бабруйскага раёна патануў мужчына 1958 года нараджэння. Напярэдадні раніцай ратавальнікі атрымалі паведамленне пра яго знікненне: ён адправіўся на рыбалку разам з сынам і не вярнуўся. Цела знайшлі за тры з паловай метры ад берага, на глыбіні паўтара метра.
Абставіны гібелі высвятляюцца, праверку па факце здарэння праводзіць Бабруйскі міжраённы аддзел Следчага камітэта.
 Для Магілёўскай вобласці гэта не адзінкавы выпадак. За першае паўгоддзе на вадаёмах рэгіёна патанулі чатырнаццаць чалавек, у тым ліку двое дзяцей. Годам раней загінулых было васямнаццаць, але дзіцячых смерцяў на вадзе не фіксавалася зусім. Выратаваць за тое ж паўгоддзе ўдалося васямнаццаць чалавек – удвая больш, чым у 2025 годзе.

Фота ілюстрацыйнага характару.

Распродаж нізкаякаснага абутку Belwest у Бабруйску выклікаў вялікі ажыятаж

Навіна ад

Знізіўшы цэны ў разы на летні абутак у Бабруйску прадпрыемства-банкрут Belwest выклікала вялікі ажыятаж у мясцовых жыхароў.

У інтэрнэце з’явілася відэа, як бабруйчане сталі вялічэзным натоўпам каля магазіна Belwest па вуліцы Дзяржынскага 45, дзе з 24 па 26 ліпеня 2026 года праходзіў распродаж абутку з вялікімі зніжкамі. Звяртаючы ўвагу на агромністую чаргу многія мінакі, а потым і карыстальнікі сеціва былі здзіўленыя масштабамі ажыятажа, піша BGmedia.

“Ды ўжо, такое пачуццё, што ў нас у горадзе людзі галодныя і босыя», «Амаль як у Доме адзення ў 80-х за «Аляскамі», «Праходзіла міма, убачыла такі натоўп людзей. Заўсёды здзіўляюся гэтаму… Няўжо людзям не лянота стаяць дзень у чарзе??? І не факт, што там ёсць нешта годнае”, – дзеляцца меркаваннямі гараджане.

Пры гэтым былі і паведамленні ад людзей, якія былі расчараваныя асартыментам распродажу. “Сяброўка сёння прастаяла 3 гадзіны ў чарзе і выйшла ні з чым! Кажа, што кошты ад 100 і вышэй, глядзець няма на што!» – напісала адна жанчына.

Разам з тым зніжкі на абутак у бабруйскім магазіне Belwest сапраўды ўражвалі. Цэні ўпалі ў тры-чатыры разы, у некаторых выпадках з трохзначных да двузначных лічб.

Варта адзначыць, што сёлета віцебскае абутковае прадпрыемства Belwest абвесціла сябе банкрутам. Яго склады завалены прадукцыяй, якая нікому не патрэбна. У сваю чаргу даўгі кампаніі склалі 259 млн рублёў. Зараз Belwest знаходзіцца ў працэдуры санацыі.

Фотаздымак: Instagram BGmedia

У Бабруйску рэйсавым аўтобусам кіраваў п’яны вадзіцель

Навіна ад

Міліцыя зняла з маршруту п’янага вадзіцеля, які кіраваў рэйсавым аўтобусам, дзе знаходзіліся пасажыры.

Супрацоўнікі ДАІ спынілі аўтобус МАЗ для праверкі. Іх падазрэнне выклікаў фізічны стан 41-гадовага вадзіцеля. Пасля медыцынскага агляду аказалася, што ў выдыхаемым паветры апошняга ўтрымліваецца 1,15 праміле алкаголю. Паводле вадзіцеля, ён напярэдадні выпіваў піва.

У міліцэйскім паведамленні не ўказваецца прыналежнасць аўтобуса, але з відэа бачна, што ён з’яўляецца рэйсавым – на шыбе прымацаваны расклад руху. Дзе цяпер будзе працаваць мужчына, для яго самога невядома.

Таксама яму пагражае штраф у памеры да 200 базавых велічынь (9 тыс. рублёў) і пазбаўленне правоў кіравання транспартнымі сродкамі на пяць гадоў.

Фотаздымак: ТГ “Міліцыя Магілёшчыны”

Круты ў Бабруйску: выйшлі на сто працэнтаў, але не выканалі

Навіна ад

Адкрыўшы 28 ліпеня свінарнік у Клімавічах, кіраўнік Адміністрацыі Лукашэнкі Дзмітрый Круты завярнуў у Бабруйск. Першым пунктам візіту стала пасяджэнне на пляцоўцы «Белшыны» – пра вынікі работы прамысловага комплексу рэгіёна за студзень-чэрвень.

Галоўную лічбу Круты падаў як дасягненне. Валавы рэгіянальны прадукт выйшаў на ўзровень ста працэнтаў, і гэта, паводле яго слоў, пазітыўны момант. У наступнай жа фразе прагучалі паўтара працэнта невыканання паўгадавога задання, даведзенага ўрадам. Так што паказчык адначасова і ўзяты, і не ўзяты.

Астатнія лічбы змякчаць не сталі:

  • прамысловая вытворчасць вобласці – 95,5 %;
  • ключавыя прадпрыемствы рэспубліканскай формы ўласнасці – 90 %;
  • доля гэтых прадпрыемстваў у прамысловым блоку вобласці – 45-47 %.

Устойліва ў плюсе, паводле слоў Крутога, транспарт, гандаль, грамадскае харчаванне і энергетыка. І ніякага бінома Ньютана тут няма. Трымаецца тое, што возіць і прадае. Прасядае тое, што належыць дзяржаве непасрэдна і павінна вырабляць. Амаль палова прамысловасці вобласці – гэта рэспубліканская ўласнасць, і дае яна дзевяноста працэнтаў.

Асобны сюжэт – у выбары пляцоўкі. Пасяджэнне пра падзенне прамысловасці правялі на «Белшыне», прадпрыемстве, якое разам з «Магілёўхімвалакно» некалькі гадоў таму знікла са спісу найбуйнейшых падаткаплацельшчыкаў вобласці.

Потым Крутому паказалі дагледжаных, сімпатычных каровак, якія жывуць на прыгожых фермах. Вясёлыя і шчаслівыя сяляне ў кадр не трапілі.

Фота: «Магілёўскія ведамасці».

У Бабруйску 9-гадовы хлопчык упаў з яблыні, з вышыні 3,5 метра на бетон

Навіна ад

Хлопык з Расіі, які прыехаў да бабулі ў Бабруйск, шпіталізаваны ў цяжкім стане пасля падзення з дрэва галавой на бетонную тратуарную плітку.

Няшчасны выпадак адбыўся ўвечары 27 ліпеня. Паводле папярэдняй інфармацыі, хлопец узлез на дзікую яблыню, што расце непадалёк ад дома. На вышыні каля трох з паловай метраў ён не ўтрымаўся і сарваўся ўніз. Удар прыйшоўся галавой аб бетонную тратуарную плітку.

На месца неадкладна выклікалі хуткую дапамогу. Медыкі даставілі пацярпелага ў рэанімацыйнае аддзяленне. Паводле ўрачоў, яго стан застаецца цяжкім.

На месцы здарэння працавала следча-аператыўная група. Апытваюцца сваякі хлопчыка і магчымыя відавочцы.

Фотаздымак: ТГ Следчага камітэта РБ

У цэнтры Бабруйска знеслі стогадовы будынак дзіцячага дома. На яго месцы пабудуюць офісны цэнтр

Навіна ад

Аднапавярховы цагляны дом на скрыжаванні вуліц Пушкіна і Чырвонаармейскай, дзе да канца 1980-х гадоў працаваў дзіцячы дом, разабралі за пятнаццаць хвілін. Сцены склаліся пад ударам каўша экскаватара, як картачны домік. Ад пабудовы канца XIX – пачатку XX стагоддзя засталіся груда смецця і некалькі ацалелых цаглін з фірмовым кляймом.

Будынак пуставаў амаль чатыры дзесяцігоддзі. Напрыканцы 1980-х дзіцячы дом пераехаў у суседні двухпавярховы будынак на той жа вуліцы Пушкіна – больш новы і зручны. Старая аднапавярхоўка засталася без выкарыстання і паступова разбуралася. За апошнюю чвэрць стагоддзя ў яе змянілася не менш за трох уласнікаў. Адзін з іх яшчэ ў сярэдзіне 2010-х абяцаў адкрыць тут медыцынскі цэнтр, але так і не адкрыў. Да моманту зносу дом ужо страціў дах і вокны, а яго сцены зараслі дрэвамі і хмызняком.

Апошні ўласнік сцвярджае, што да апошняга спрабаваў захаваць будынак. Паводле яго слоў, паўнавартаснага падмурка ў будынка фактычна не было: цэгла ляжала проста на пяску, і калі пясок размыла, сцены пачалі нахіляцца. Гэта і стала прычынай рашэння пра знос.

Сярод абломкаў удалося адшукаць толькі некалькі цэлых цаглін – на іх захавалася фірмовае кляймо цагельнага завода братоў Лазінскіх, Гірша і Эвеля. Нароўні з Пружынінымі і Разенбергамі Лазінскія належалі да трох галоўных «цагельных» дынастый дарэвалюцыйнага Бабруйска.

Цікава, што радавы асабняк Лазінскіх таксама стаяў на Пушкінскай. Гэты матэрыял дазваляе датаваць знесеную аднапавярхоўку канцом XIX – пачаткам XX стагоддзя. Тым не менш статусу гісторыка-культурнай каштоўнасці будынак не меў – ды і размяшчаўся ўбаку ад звыклай гістарычнай забудовы горада.

На месцы знесенага будынка прадпрымальнік плануе пабудаваць двухпавярховы офісны цэнтр. Паводле яго слоў, праект ужо ўзгоднены, дапрацоўваюцца толькі тэхнічныя дэталі. Гандлёвых плошчаў у новым будынку не прадугледжана – толькі офісы, магчыма, з ухілам у IT. Праектам таксама прадугледжаны актавая зала і стаянка на прылеглым участку плошчай 0,09 гектара. Будаўніцтва павінна пачацца найбліжэйшым часам.

Фота magilev.by.

Пад Бабруйскам прадаецца закінуты дзіцячы лагер

Навіна ад

Былы дзіцячы аздараўленчы лагер “Змена” каля вёскі Мірадзіна Бабруйскага раёна выстаўлены на таргі за амаль 292 тыс. рублёў.

Яшчэ некалькі дзесяцігоддзяў таму там гучалі дзіцячыя галасы, праводзіліся лінейкі і распальваліся вогнішчы. Цяпер жа былы лагер «Змена» чакае не новую змену дзяцей, а новага ўладальніка. Закінуты комплекс у лесе за дзесяць кіламетраў ад Бабруйска выставілі на аўкцыён.

Прадаюць лагер праз запазычанасці яго апошняга ўласніка. Таргі арганізуе пляцоўка «БелЮрЗабеспячэнне», а пачатковая цана лота складае 291 тыс. 520 рублёў.

На продаж выставілі больш за трыццаць будынкаў на тэрыторыі амаль у два з паловай гектары. Гэта чатыры спальныя корпусы, сталовая, клуб, медпункт, лазня, адміністрацыйны будынак, а таксама склады, хлявы, навесы, гаспадарчыя пабудовы, цір і артэзіянская свідравіна. Агульная плошча будынкаў перавышае 1400 м2.

«Змена» з’явілася яшчэ ў канцы 1940-х – пачатку 1950-х гадоў як дзіцячы аздараўленчы лагер. Пасля распаду Савецкага Саюза ён яшчэ некаторы час працягваў працаваць, але паступова стаў прайграваць больш сучасным базам адпачынку. Драўляныя корпусы ўжо не адпавядалі патрабаванням пажарнай бяспекі і санітарным нормам, а бацькі ўсё радзей выбіралі адпачынак для дзяцей у састарэлым лагеры.

У 2017-2018 гадах прадпрыемства «Бабруйсктрыкатаж» перадала лагер аддзелу адукацыі. Але замест новага жыцця аб’ект атрымаў рашэнне аб закрыцці. У сакавіку 2019 года «Змена» канчаткова спыніла працу.

Пасля гэтага лагер хутка ператварыўся ў яшчэ адзін помнік заняпаду. Будынкі пачалі пакрысе разбурацца, а тэрыторыя засталася без належнага дагляду.

Праз некалькі гадоў знайшліся ахвотныя вярнуць жыццё ў былую аздараўленчую базу. Кампанія «Мірадзінскі востраў» планавала зрабіць там камерцыйны комплекс адпачынку. Але праект так і не выйшаў за межы намераў. Цяпер сама фірма ліквідуецца, а лагер прадаюць, каб разлічыцца з даўгамі.

Аўкцыён прызначаны на 4 жніўня. Заяўкі прымаюцца да 3 жніўня, а ўдзельнікам неабходна ўнесці задатак у памеры 29 152 рублёў. Пераможца таргоў павінен цалкам разлічыцца за пакупку цягам дзесяці працоўных дзён.

Фотаздымак: e-auction.by

У Бабруйску далі “хатняюю хімію” за здзекі з пасынка – біў і напісаў на лбе “ВОР”

Навіна ад

Збіваў малалетняга хлопца, пісаў на яго галаве “вор”, апрылюдніў свае здзекі – за такія дзеянні ў бабруйскі суд патрапіў мясцовы жыхар.

Суд у Бабруйску прызнаў мясцовага жыхара вінаватым у сістэматычных здзеках з васьмігадовага пасынка. На працягу некалькіх месяцаў, з траўня па лістапад 2025 года, мужчына рэгулярна ўжываў фізічны гвалт супраць дзіцяці. Падставай для пакаранняў станавіліся розныя дзіцячыя правіны.

Найбольш жорсткі выпадак адбыўся восенню, калі хлопчык без дазволу ўзяў грошы айчыма. Мужчына некалькі разоў ударыў дзіця па галаве і твары, пасля чаго прымусова абстрыг і пагаліў яму галаву. Затым маркерам напісаў на лбе слова «ВОР».

На наступны дзень, убачыўшы, што надпіс сцёрты, ён яшчэ раз збіў хлопчыка, напісаў яго зноў і адправіў дзіця ў школу. Менавіта там усё і раскрылася. Настаўніца заўважыла надпіс на лбе вучня, і кіраўніцтва школы паведаміла пра здарэнне ў міліцыю.

Пасля праверкі хлопчыка забралі з сям’і і прызналі такім, што мае патрэбу ў дзяржаўнай абароне. У судзе абвінавачаны прызнаў сваю віну толькі часткова.

Нягледзячы на працяглыя здзекі з малалетняга дзіцяці і публічнае прыніжэнне яго чалавечай годнасці, суд прызначыў мужчыну пакаранне ў выглядзе абмежавання волі без накіравання ва ўстанову адкрытага тыпу – так званую «хатнюю хімію» тэрмінам на адзін год і шэсць месяцаў.

Прысуд пакуль не ўступіў у законную сілу і можа быць абскарджаны.

Фотаздымак з адкрытых крыніц

Сям’я з Бабруйску плануе вярнуцца з Масквы на радзіму, навучаючы дачку беларускай мове

Навіна ад

Сям’я бабруйчанкі Ірыны Радчынскай, папрацаваўшы ў сталіцы Расіі, вырашыла вярнуцца на радзіму і вучыць дачку ў беларускай школе. 

Жанчына, якой зараз каля 37-38 гадоў, штогод прыязджае ў родны Бабруйск, “да сям’і і беларускай зямлі”. “Дзень ці то працую, па зуму заняткі праводжу, ці то з дачкой гуляю, у дзіцячы гульнявы цэнтр схадзілі. Уражаная, колькі ўсяго з’явілася ў горадзе. Шмат новых дзіцячых пляцовак, ілюмінацыя, «Этажэрка» насупраць дому – як гандлёвы цэнтр, а не доўгабуд. Надвор’е толькі падводзіць – хочацца на лецішча, а што там у дождж рабіць? Але гэта ідэальнае надвор’е, каб глядзець футбол, дома альбо ў бары”, – цытуе Ірыну komkur.info. 

Яна распавяла выданню, што шмат гадоў працуе з мужам у Маскве. У лютым 2024 года ў іх там нарадзілася дачка Міра, якая ўжо вучыць беларускую мову анлайн. “У садку выхавацелькі ўкраінкі, таму яны разумеюць, калі яна пачынае шпурляць беларускімі словамі. Раней для мяне жыццё там было добрае, хоць ніколі і не хацела заставацца. Але яшчэ ў 21-м вырашылі, што вернемся ў Беларусь, так што не з-за дронаў. Мы з імі і не сутыкаліся – Масква вельмі вялікая, я нават не бачыла жыўцом, як НПЗ гарэў, у нас зусім іншы раён. Пакуль проста дапрацоўваем, зарабляем на жыццё і на рамонт. Але зразумела, што ў школу Міра пойдзе ўжо ў беларускую”, – кажа бабруйчанка. 

Варта адзначыць, што пад паняццем “беларуская школа” жанчына, па ўсяму відаць, мае на ўвазе тэрытарыяльную прыналежнасць навучальнай установы. Беларускамоўных школ у Бабруйску няма.

Фотаздымак: wiki.bobr.by