Category: Навіны Бабруйска

Дабраахвотнік з Бабруйска ва УСУ займеў шанец на легалізацыю

Навіна ад

Дабраахвотнік з Бабруйска Эмілій Лабейка, які ваюе ва Украіне, атрымаў магчымасць вырашыць пытанне з легалізацыяй, дзякуючы новаму закону, які збіраюцца прыняць украінскія ўлады.

Вярхоўная Рада Украіны падоўжыла на паўгода тэрмін, калі іншаземцы, якія служаць ва Узброеных сілах Украіны, могуць атрымаць пасведчанне на часовае жыхарства. Да 10 траўня 2027 года добраахвотнікі павінны падаць пакет дакументаў, каб легалізавацца ў краіне. Законапраект «Аб унясенні змен у некаторыя законы Украіны адносна падстаў знаходжання ва Украіне вайскоўцаў з ліку іншаземцаў і асоб без грамадзянства» апублікавалі 27 кастрычніка. Яго перадалі на подпіс прэзідэнту Уладзіміру Зяленскаму.

Папярэдні тэрмін заканчваўся 10 лістапада 2026 году. У тэксце новага законапраекту гаворыцца, што ня ўсе вайскоўцы паспелі падаць дакументы своечасова – «з шэрагу аб’ектыўных прычын – пераважна звязаных з праходжаннем вайсковай службы і выкананнем задач па абароне суверэнітэту і тэрытарыяльнай цэласнасці Украіны».

«Працяг устаноўленага тэрміну – неабходны і неадкладны крок. Гэтая мера накіраваная на перадухіленне праўнай нявызначанасці знаходжання такіх асоб на тэрыторыі Украіны, страты імі законных падстаў для такога знаходжання, а таксама звязаных з гэтым негатыўных прававых наступстваў», – адзначаюць аўтары законапраекту.

Законапраект прадугледжвае права іншаземцаў і асоб без грамадзянства пацвердзіць, што яны законна знаходзяцца на тэрыторыі Украіны, вайсковым білетам або даведкай вайскоўца да 10 траўня 2027 году.

«Атрымліваецца так, што вырашэння пакуль няма. І я працягваю вісець у паветры. Фактычна законапраект увёў новую дату, але праблема не вырашаная» – камэнтуе сітуацыю Эмілій Лабейка. У яго ёсць вайсковы білет. Але калі ва ўкраінскіх законах ня будзе іншых змен, ён не зможа легалізавацца ва Украіне і праз паўгода.

Эмілій Лабейка ўжо чацвёрты год ваюе на баку Украіны супраць расійскага ўварвання. За гэты час ён паспеў стаць фігурантам шасці крымінальных спраў на радзіме, атрымаць завочны прысуд ад акупацыйных улад Данбаса.

Сёлета ў лістападзе яго маглі прымусіць выехаць з краіны. Усё таму, што добраахвотнік не можа легалізавацца ва Украіне. Прычынай стаў закон, які павінен быў палегчыць легалізацыю іншаземных вайскоўцаў, каб яны не аказваліся ў прававой яме і ня трацілі легальнага статусу нават праз паўгода пасля заканчэння кантракта.

Гэты закон пачаў дзейнічаць 10 траўня 2026 году. Паводле яго, усе вайскоўцы, якія пачалі служыць ва Украіне раней за гэтую дату і яшчэ не атрымалі дазволу на жыхарства, былі абавязаныя падаць дакумэнты ў міграцыйную службу да 10 лістапада. У выніку яны маглі атрымаць дазвол на жыхарства.

Аднак для Эмілія Лабейкі гэты закон адыграў адваротную ролю. Ён ня можа падаць патрэбны пакет дакумэнтаў, бо ня мае пашпарта. Беларускі пашпарт Лабейкі згарэў пры абстрэле Краматорску ў траўні 2023 года. Зрабіць новы пашпарт ён ня можа, бо ў тым жа годзе беларускі дыктатар забараніў афармляць новыя пашпарты праз амбасады за мяжой.

Фотаздымак: Радыё Свабода

Бабруйск сустрэне 7 лістапада цірам у крэпасці, дзе ў гэты дзень расстралялі сем тысяч палонных

Навіна ад

Бабруйск адзначыць 109-ю гадавіну Кастрычніцкай рэвалюцыі. А 10-й раніцы 7 лістапада кіраўніцтва горада, Камуністычная партыя, БРСМ і піянеры ўскладуць кветкі да помніка Леніну. А 7 і 8 лістапада ў Бабруйскай крэпасці пройдзе гістарычная рэканструкцыя «Бабруйскі рубеж».

Да рэвалюцыі рэканструкцыя дачынення не мае – яна пра Вялікую Айчынную вайну. Гасцям абяцаюць лагер Чырвонай Арміі, палявую кухню, тэхніку, зброю і форму ваенных гадоў, агітацыйную палатку, цір, фотазону і пляцоўку юнага сапёра. Рэвалюцыю паказаць няма чым, таму свята напаўняюць вайной.


вайна

З вайной у 7 лістапада ёсць толькі маскоўская сувязь – парад 1941 года на Краснай плошчы, з якога войскі ішлі на фронт. Бабруйск да таго часу ўжо чатыры месяцы быў акупаваны, немцы занялі яго 28 чэрвеня 1941 года.

Свая дата 7 лістапада ёсць у самой Бабруйскай крэпасці. У ноч на 7 лістапада 1941 года немцы зладзілі пажар у казарме лагера для ваеннапалонных № 131 і расстралялі каля сямі тысяч чалавек. Пра гэта 2 лістапада нагадаў аддзел культуры Бабруйскага гарвыканкама, расказваючы пра кансервацыю «Былой казармы». Напярэдадні, 6 лістапада, горад праводзіць дзень памяці ахвяр Бабруйскага гета. У анонсе рэканструкцыі пра расстрэл у крэпасці ні слова.

Роўна праз 85 гадоў на тэрыторыі той жа крэпасці будуць палевая кухня, фотазона і цір – да гадавіны рэвалюцыі.

Фота planetabelarus.by

На Бабруйшчыне пенсіянерка памерла ад укусу змяі

Навіна ад

У Бабруйскім раёне 70-гадовую жанчыну ўкусіла змяя. Праз дзве гадзіны пенсіяненрка памерла.

Трагічны выпадак адбыўся ў верасні каля дома, дзе жыла пажылая жанчына. Змяя ўкусіла яе за нагу. Неўзабаве месца ўкусу апухла і пасінела, а сама пенсіянерка адчула моцную слабасць, галавакружэнне і цяжкасці з дыханнем.

Хуткую дапамогу выклікала суседка. Да прыезду медыкаў пацярпелая ніякіх лекаў не прымала. Аднак нават аказаная медыцынская дапамога не ўратавала жанчыну. Прыкладна праз дзве гадзіны пасля ўкусу яна памерла.

Пазней эксперты ўбачылі на правай назе пенсіянеркі, каля галёнкаступнёвага сустава, дзве ранкі з кровазліццямі. Паводле заключэння, гэта быў след ад зубоў змяі.

Даследаванне таксама паказала прыкметы анафілактычнага шоку – вострай алергічнай рэакцыі, якая развіваецца вельмі хутка. У жанчыны ўзніклі спазм бронхаў і моцны ацёк лёгкіх. Менавіта анафілактычны шок, як устанавілі эксперты, стаў непасрэднай прычынай смерці.

У Беларусі жыве толькі адзін від атрутных змей – звычайная гадзюка. 

Фотаздымак: sudexpert.gov.by

У Бабруйску загарэўся чарговы магазін адзення

Навіна ад

У Бабруйску час ад часу гараць магазіны з адзеннем. Чарговы такі інцыдэнт адбыўся ўвечары 1 лістапада 2026 года.

Інфармацыя ў МНС аб узгаранні ўнутры магазіна па вул. Сацыялістычнай у раёне Цэнтральнага рынку паступіла ад відавочцаў. У той час гандлёвы аб’ект ужо не працаваў і ў ім нікога не было. Такім чынам і пацярпець не было каму. Пажарныя патушылі агонь. Мяркуецца, што прычынай узгарання стала парушэнне правіл эксплуатацыі электраабсталявання.

Адзін з папярэдніх падобных пажараў адбыўся ў Бабруйску 25 чэрвеня 2026 года. Там загарэўся магазін з адзеннем па вуліцы Горкага. Інцыдэнт адбыўся днём, прадаўцы і наведвальнікі хутка выйшлі з магазіна, а пажарныя хутка пагасілі агонь.

1 красавіка 2025 года зноў па вул. Сацыялістычнай загарэўся магазін “Тваё”. Пра задымленне пажарным паведаміла прадавец-кансультант. Але да прыезда ратавальнікаў з агнём справіўся наведвальнік магазіна, які выкарыстаў парашковы вогнетушыцель. Дзякуючы яго аператыўным дзеянням удалося пазбегнуць сур’ёзных наступстваў. 

Фотаздымак: МНС

У Бабруйску ветэраны камсамола завяшчалі БРСМ сумяшчаць несумяшчальнае

Навіна ад

Бабруйскі гарадскі камітэт БРСМ сабраў ветэранаў камсамола у Цэнтры дадатковай адукацыі дзяцей і моладзі – да 108-й гадавіны ВЛКСМ.

Дата не круглая, затое нагоду сфармулявалі дакладна: былыя першыя сакратары гарадскога камітэта камсамола павінны перадаць свае традыцыі цяперашняму саюзу моладзі. Традыцыя ў гэтых людзей сапраўды агульная – кар’ера на ідэалогіі, якая перажыла змену самой ідэалогіі.

Лідзія Багданава на пачатку сямідзясятых узначальвала гарадскі камітэт камсамола, у васьмідзясятых была сакратаром гарадскога камітэта партыі па ідэалогіі, затым кіравала гарадскім упраўленнем адукацыі.

Пачынала яна ў 1964 годзе другім сакратаром Бабруйскага раённага камітэта камсамола. Задача, паводле яе ўласнага аповеду, заключалася ў тым, каб адвадзіць ад царквы рэлігійную моладзь Глушчыны і павярнуць яе да атэізму.

Сёння 84-гадовая ветэранка прызнаецца: усю маладосць агітавала за атэізм, а цяпер і сама заходзіць у царкву паставіць свечку. Марксісцка-ленінскія перакананні пры гэтым засталіся.

Уладзімір Белазёр, першы сакратар гарадскога камітэта камсамола сямідзясятых гадоў, а ў прадстаўленні арганізатараў яшчэ і стваральнік Дзяржаўнай міграцыйнай службы Беларусі, патлумачыў механізм змены ідэалаў.

Камсамол, паводле яго слоў, ніколі не быў застылай арганізацыяй, і кожнае дзесяцігоддзе прымушала мяняць падыходы. У перакладзе з юбілейнай мовы гэта і ёсць формула: лозунгі мяняюцца, а прамаўляюць іх адны і тыя ж людзі.

Састарэлыя камсамольцы тлумачылі свае малітвы розным багам яшчэ і так: з часам у людзей сумяшчаецца несумяшчальнае.

Формула для Беларусі не новая – Лукашэнка называе сябе праваслаўным атэістам. На чалавечай мове ўсё гэта называецца адным словам – пераабуванне на ляту.

Фота: BOBRlife.

Даведка на біс: старшыні Бабруйскага гарвыканкама двойчы за два месяцы далажылі адны і тыя ж лічбы

Навіна ад

Старшыня Бабруйскага гарвыканкама Максім Гурын пабываў на прадпрыемстве «Арэнда і паслугі», якое здае ў арэнду гарадскую камунальную нерухомасць. Дырэктар Юрый Вяроўкін далажыў:

  • на балансе 75 аб’ектаў,
  • прырост плошчаў, якія здаюцца ў арэнду, па выніках 2025 года склаў 124 працэнты,
  • рэклама за першае паўгоддзе прынесла ў гарадскі бюджэт 678 тысяч рублёў – 112 працэнтаў да мінулага года.

Усё гэта Гурын ужо чуў 18 жніўня на аператыўнай нарадзе ў гарвыканкаме. Дакладваў той жа Вяроўкін, і лічбы былі тыя ж: 75 аб’ектаў (52 капітальныя будынкі і 23 ізаляваныя памяшканні), 124 працэнты, 678 тысяч рублёў за паўгоддзе.

Супала і рэакцыя Гурына: у жніўні ён пахваліў прадпрыемства і заўважыў, што заўсёды ёсць да чаго імкнуцца, у кастрычніку – што спыняцца на дасягнутым нельга.

Сітуацыя ў Бабруйску камічная – хітры Вяроўкін, падобна, карыстаецца забыўчывасцю Гурына.

Фота bobrlife.by.

Смерць на дне калодзежа пад Бабруйскам

Навіна ад

У вёсцы Узнога Бабруйскага раёна 70-гадовы мясцовы жыхар упаў у калодзеж. Жывым яго больш ніхто не бачыў.

Трагедыя адбылася ў ноч на 26 кастрычніка 2026 года. Мясцовая жыхарка пачула нейкі шум у двары. Калі яна выйшла, то заўважыла, што на калодзежы адсутнічае металічны ліст, які закрываў яго.

Зазірнуўшы ўглыб дзявяціметровага калодзежа жанчына заўважыла там свайго мужа, які ўжо не падаваў прызнакаў жыцця. Бліжэй да 5:00 раніцы супрацоўнікі МНС выцягнулі бездыханае цела пенсіянера.

Паводле папярэдняй версіі, перад выпадкам мужчына ўжываў спіртное.

Фотаздымак: ТГ “ОСВОД Беларуси”

У Бабруйску выратавальную станцыю ставяць на будаўнічае смецце

Навіна ад

Падмурак новай выратавальнай станцыі на Бярэзіне ў Бабруйску будзе стаяць на будаўнічым смецці. Як доўга – невядома.

Напрыканцы жніўня 2026 года, калі купальны сезон ўжо амаль скончыўся, стары будынак выратавальнай станцыі на вуліцы Берагавой знеслі. Тлумачылася гэта тым, што пабудаваны яшчэ ў 1956 годзе, ён стаў трухлявым. 

Замест яго ў распараджэнне ратавальнікаў павінен паступіць сучасны модульны будынак, агульнай плошчай 72 м2. Модульны – гэта азначае, што сабраны па прынцыпе канструктара. 

Разам з тым, нават такі будынак мусіць стаяць на трывалым падмурку. Аднак не ў выпадку з новай выратавальнай станцыяй. Пад яе фундамент залілі на гары будаўнічага смецця – бута з пяском. Прычым займаліся заліўкай бетона самі ратавальнікі. Натуральна, што веснавая вада ў хуткім часе размые такія падмуркі, і будынак, якім бы модульным ён не быў, стане непрыдатным для выкарыстання.

Больш за тое, гледзячы на фундамент, немагчыма ўбачыць, якім чынам збіраюцца падводзіць у будучы дом камунікацыі – ацяпленне, вадаправод, каналізацыю.

Яшчэ напачатку верасня паведамлялася, што модульны будынак, з Барысава, дзе ён знаходзіўся, у хуткім часе павінен быў пераехаць у Бабруйск. Аднак, як сведчаць мясцовыя жыхары, на двары канец кастрычніка, а ратавальнікі па-ранейшаму туляцца ў будаўнічым вагончыку. І пакуль, дзе яны будуць дыслакавацца зімой – невядома.

Скриншот: ТГ “Беларусь за МКАДам”

Прафсаюзны санаторый у Бабруйску амаль напалову запоўнены замежнікамі

Навіна ад

У бабруйскім санаторыі імя Леніна будуюць спа-комплекс з двума басейнамі, хамамам, фінскай саўнай і рускай лазняй.

Здаць яго абяцаюць у сярэдзіне снежня. Будоўлю прыязджаў праверыць старшыня Федэрацыі прафсаюзаў Юрый Сянько.

Санаторый прафсаюзны, але амаль палова адпачывальнікаў у ім – замежнікі. Паводле слоў галоўнага ўрача Андрэя Мікановіча, іх 48 працэнтаў, беларусаў – 52.

Нумары здраўніц ФПБ у сезон, паводле даных самой федэрацыі, браніруюць за некалькі месяцаў.

Адзін з пастаянных гасцей – Аляксандр Лысікаў з Падмаскоўя. Ён адпачывае тут у 42-гі раз і цяпер прыязджае тройчы на год.

Лысікаў хваліць санаторый за прыроду, харчаванне і лячэнне, а яшчэ за тое, што цэны ніжэйшыя, чым у Расіі.

Мадэрнізацыю сваіх здраўніц прафсаюзы тлумачаць клопатам пра здароўе працоўных.

Мяркуючы па статыстыцы засялення, у бабруйскім санаторыі амаль кожны другі працоўны прыязджае з-за мяжы.

Фота ведамаснага сайта ФПБ.

На ўскрайку Бабруйска знайшлі могілкі хатніх жывёл

Навіна ад

Цэлы самавольны некропаль хатніх жывёл знайшлі усяго ў ста метрах ад жылой забудовы мікрараёна Заходні ў Бабруйску.

Звычайны сямейны шпацыр па лесе на ўскрайку Бабруйска скончыўся нечаканым адкрыццём. Сярод дрэў мясцовыя жыхары натрапілі на сапраўдныя могілкі хатніх гадаванцаў з крыжамі, агароджамі, вянкамі і нават гранітнымі помнікамі.

Мяркуючы па колькасці пахаванняў, гэты самадзейны некропаль існуе ўжо не першы год і паступова разрастаецца. Лясная паляна літаральна ўсеяная магіламі, абнесенымі пластыкавымі і металічнымі агароджамі. На некаторых стаяць крыжы, побач ляжаць штучныя кветкі і вянкі. Ёсць нават гранітныя надмагіллі. Усё амаль як на звычайных могілках, толькі пахаваныя тут не людзі, а іх чатырохногія сябры.

Аднак такое ўшанаванне памяці жывёл спадабалася далёка не ўсім. Бабруйчанін, які даслаў фотаздымкі незвычайнага некропаля, абурыўся тым, што лес паступова ператвараецца ў склад пластыку, металу і іншых штучных матэрыялаў.

“Ну хочаце вы пахаваць сваю жывёлу – пасадзіце на гэтым месцы дрэва! І прыродзе зробіце добра, і сабе арыенцір назаўсёды пакінеце. Я проста здзіўлены, як нашы людзі любяць усялякае смецце ў лес насіць. Тут штрафаваць трэба па поўнай!” – выказаўся ён.

Разам з тым, паводле беларускіх санітарных і ветэрынарных патрабаванняў, хаваць памерлых хатніх жывёл у лясах, парках, дварах і іншых непрыстасаваных месцах забаронена. Іх парэшткі лічацца біялагічнымі адходамі, якія патрабуюць спецыяльнай утылізацыі.

Самавольныя пахаванні могуць ствараць санітарную небяспеку, у тым ліку пагрозу забруджвання глебы і грунтовых вод. За арганізацыю несанкцыянаваных пахаванняў і засмечванне лесу можа наступіць адміністрацыйная адказнасць. У залежнасці ад кваліфікацыі парушэння штраф можа дасягаць 30 базавых велічынь.

Фотаздымак: Onliner