Category: Карупцыя ў Магілёве

У Магілёве намеснік галоўнага інжынера атрымаў два з паловай гады “хіміі” за хабары

Навіна ад

Намеснік галоўнага інжынера аднаго з дзяржаўных прадпрыемстваў Магілёва асуджаны на два з паловай гады абмежавання волі за 5 тыс. рублёў хабараў.

Як устанавіў суд Ленінскага раёна Магілёва, з сакавіка 2023-га да студзеня 2026 года намеснік галоўнага інжынера выкарыстоўваў свае паўнамоцтвы, каб нейкая камерцыйная арганізацыя станавілася пастаўшчыком неабходнага прадпрыемству абсталявання. За такую дапамогу ён атрымліваў грошы і матэрыяльныя каштоўнасці.

Паводле матэрыялаў справы, з кастрычніка 2024 года да студзеня 2026-га агульная сума атрыманых ім хабараў перавысіла 4,9 тыс. рублёў. У выніку дзяржаўнае прадпрыемства закупляла абсталяванне, камерцыйная фірма атрымлівала заказы, а адказны за тэхнічныя пытанні кіраўнік – асабістую ўзнагароду.

Пасля распачынання крымінальнай справы абвінавачаны добраахвотна вярнуў атрыманы злачынным шляхам даход. У судзе сваю віну ён цалкам прызнаў.

Аднак вяртанне грошай ад крымінальнай адказнасці яго не вызваліла. Суд прызначыў мужчыне два гады і шэсць месяцаў абмежавання волі з накіраваннем у папраўчую ўстанову адкрытага тыпу, на так званую «хімію». Акрамя таго, яму давядзецца заплаціць штраф у памеры 350 базавых велічынь (15 750 руб.).

Яшчэ на пяць гадоў яму забаронена займаць кіруючыя пасады. Прысуд пакуль не набыў законнай сілы.

Фотаздымак з адкрытых крыніц

Гендырэктар Беларускага цэментнага завода ў Касцюковічах папаўся на хабары

Навіна ад

Былы генеральны дырэктар Беларускага цэментнага завода, сенатар Ігар Сяргееў асуджаны за карупцыю.

Пра тое, што сёлета быў вынесены прысуд кіраўніку завода ў Касцюковічах распавёў 20 кастрычніка 2026 года старшы пракурор Генеральнай пракуратуры Беларусі Андрэй Федаровічаў. Ён не назваў імя і прозвішча кіраўніка, але іх удалося высвятліць журналістам.

З 2021 года на чале прадпрыемства быў Ігар Сяргееў. Ён жа ў 2024 годзе быў абраны членам Савета Рэспублікі ад Магілёўскай вобласці. У тэлеграм-канале касцюковіцкай раёнкі Сяргееў апошні раз узгадваецца 19 лістапада 2025 года, хоць да таго яго провішча рэгулярна з’яўлялася ў паведамленнях.

Новы дырэктар з’явіўся на Беларускім цэментным заводзе ў траўні 2026 года. Пасаду заняў Яўген Валошчык, які раней быў галоўным тэхнолагам у «Краснасельскбудматэрыялах», якія таксама займаюцца вырабам цэмента, праўда, у Ваўкавыскім раёне Гродненскай вобласці. 

За атрыманне хабару асобай, якая займае адказнае становішча (ч. 3. арт. 430 Крымінальнага кодэкса), прадугледжваецца ад 5 да 15 гадоў калоніі. Выглядае, што першасны суд ужо адбыўся. Але невядома, былы сенатар чакае апеляцыю ці ўжо адправіўся ў калонію.

На сайце Савета Рэспублікі Сяргееў ужо таксама адсутнічае. Пры гэтым 25 кастрычніка 2025 года ён прымаў удзел у суботніку ў Касцюковічах як сябр Пастаяннай камісіі Савета Рэспублікі па заканадаўству і дзяржаўнаму будаўніцву.

Фотаздымак: “Голас Касцюкоўшчыны”

У Горках дацэнта “адной з сельгасакадэмій” асудзілі на два з паловай гады “хіміі” за хабар

Навіна ад

У Горках выкладчык атрымаў два гады абмежавання волі за хабар у 140 рублёў ад дзвюх студэнтак.

Студэнткі-завочніцы, 140 рублёў і экзамен, які нават не давялося здаваць, сталі падставай для крымінальнай справы супраць 45-гадовага дацэнта. Ён, як піша ў мясцовай раёнцы старшы памочнік пракурора Горацкага раёна Анастасія Фаставец, выкладаў у адной з сельскагаспадарчых ВНУ. Цяжка знайсці ў наваколлях Горак іншае такое ВНУ, акрамя Беларускай дзяржаўнай сельскагаспадарчай акадэміі. Аднак мясцовыя пракуроры, пэўна, лічаць тых, для каго яны пішуць, людзьмі недалёкімі і не здольнымі зразумець, што гэта за “адна з сельскагаспадарчых ВНУ”.

Выкладчык меў права прымаць у студэнтаў залікі і экзамены. Гэтым правам, як устанавіў суд, ён і вырашыў скарыстацца для дадатковага заробку. Дзвюм завочніцам дацэнт прапанаваў просты спосаб атрымаць станоўчую адзнаку па сваёй дысцыпліне – па 70 рублёў з кожнай.

У дзень экзамену дзяўчаты перадалі выкладчыку заліковыя кніжкі, у якіх ляжалі грошы. Сам экзамен пры гэтым студэнткі не здавалі.

У судзе выкладчык цалкам прызнаў віну і раскаяўся. У выніку Горацкі раённы суд прысудзіў яму два гады і шэсць месяцаў абмежавання волі з накіраваннем ва ўстанову адкрытага тыпу, так званую «хімію». Акрамя таго, яму прызначылі штраф у 300 базавых велічынь, або 13 500 рублёў. Яшчэ пяць гадоў экс-дацэнт не зможа займаць пасады, звязаныя з выкладчыцкай дзейнасцю і выкананнем юрыдычна значных дзеянняў. Прысуд пакуль не набыў законную сілу.

Фотаздымак з адкрытых крыніц

Хабар у сувенірным нататніку: у Бабруйску начальніку далі два з паловай гады «хіміі»

Навіна ад

У Бабруйску асудзілі начальніка структурнага падраздзялення аднаго з прадпрыемстваў горада за хабар, які прыйшоў да яго ў пакеце з сувенірамі.
На пачатку 2025 года прадпрыемства заключыла дамову са сталічным падрадчыкам на тэхабслугоўванне абсталявання.
Начальнік кантраляваў работы і падпісваў акты іх выканання, але недахопы падрадчыка хаваў ад кіраўніцтва, афіцыйна не фіксаваў і дэфектных актаў не складаў.
За гэта дырэктар падраднай арганізацыі перадаў яму пакет з сувенірнай прадукцыяй, сярод якой быў нататнік з 2,5 тысячы рублёў унутры. Грошы начальнік знайшоў і патраціў на сябе. Суд прызначыў яму два з паловай гады абмежавання волі з накіраваннем у папраўчую ўстанову адкрытага тыпу, штраф 300 базавых велічынь, гэта значыць 13,5 тысячы рублёў, і забарону на пяць гадоў займаць кіруючыя пасады. Прысуд яшчэ не ўступіў у законную сілу.
Дакладна такі ж прысуд у жніўні атрымаў былы галоўны інжынер сельгасарганізацыі Бабруйскага раёна – за 2300 рублёў ад камерцыйнай фірмы: той жа тэрмін, той жа штраф, тая ж забарона.
У абодвух выпадках штраф у пяць-шэсць разоў большы за сам хабар.

Фота ілюстрацыйнага характару.

Пра магілёўскіх чыноўнікаў, адпраўленых за краты, людзі даведваюцца ад «экстрэмістаў»

Навіна ад

Незалежныя сродкі масавай інфармацыі патрэбныя любой краіне. Яны не даюць ёй канчаткова аскацініцца. Нагадваем пра тры гучныя карупцыйныя справы на Магілёўшчыне, пра якія ў дзяржСМІ – поўная цішыня.
Былы намеснік старшыні Магілёўскага аблвыканкама па будаўніцтве і ЖКГ Генадзь Дзенгалеў сядзіць у мінскім СІЗА КДБ – той самай «амерыканцы». Справа звязана з фінансамі, але артыкул, сутнасць прэтэнзій, працэсуальны статус і дата затрымання невядомыя. Вядома іншае – калі чыноўнік знік. 

На пачатку жніўня 2025 года Дзенгалеў яшчэ віншаваў будаўнікоў з прафесійным святам, на 9 жніўня ў яго была запланаваная прамая тэлефонная лінія, пасля чаго на публіцы ён больш не з’яўляўся. Толькі 15 студзеня 2026 года на яго месца ўзгаднілі Ігара Клішо – былога падначаленага, які з 2019 года ўзначальваў абласны камітэт па архітэктуры і будаўніцтве. Пяць месяцаў крэсла намесніка старшыні пуставала, а калі і чаму сышоў Дзенгалеў, публічна не паведамілі. Аблвыканкам абышоўся без тлумачэнняў і на ўласным сайце. 

Адрас афіцыйнай біяграфіі Дзенгалева цяпер адкрывае біяграфію Клішо – з ранейшай датай публікацыі, 12 ліпеня 2022 года. Намесніка старшыні не звольнілі са старонкі, а запісалі паверх. 

Чалавек пры гэтым не выпадковы. Дзенгалеў усё жыццё будаваў: кіраваў УКБ Магілёўскага гарвыканкама, Галоўным упраўленнем капітальнага будаўніцтва Кіраўніцтва справамі Лукашэнкі, «Мінскаблсельбудам». Лукашэнка ўзгадняў яго двойчы – у 2017 годзе старшынёй Барысаўскага райвыканкама і ў маі 2022-га намеснікам старшыні ў Магілёў. 

Другая гісторыя пра чыноўнікаў-хабарнікаў ярчэйшая. У лютым 2025 года старшыня аблвыканкама Анатоль Ісачанка ўручыў званне «Чалавек года Магілёўшчыны» Аляксандру Лаўрыновічу – «дэпутату» Магілёўскага гарадскога «савета дэпутатаў» і дырэктару ТАА «Фестывалі Бай». Дзяржаўная «Трыбуна працы» пералічвала заслугі лаўрэата: суарганізатар патрыятычнай акцыі «Беларусь, вперед!» і рэаліці-шоу «Фабрика блогеров», якому, паводле слоў газеты, няма аналагаў у рэспубліцы. З 2022 года прадзюсар яшчэ і працаваў настаўнікам у песенным тэлешоу «Звездный путь». 

Праз год «Чалавек года» з’ехаў з краіны. У сакавіку 2026 года Следчы камітэт забараніў яму прадаваць долі ў кампаніі, а з 10 красавіка магілёўскі «дэпутат» лічыцца ў вышуку  – падазраваным па карупцыйнай справе, у якой фігуруе больш за 200 тысяч рублёў, а падставай стала арганізацыя гарадскіх мерапрыемстваў у Брэсце. Прозвішча з’явілася ў базе ў красавіку, даведаліся пра гэта толькі ў жніўні. 

Дзяржаўныя газеты і тэлеканалы, якія яшчэ нядаўна ставілі Лаўрыновіча ўсім у прыклад, журботна маўчаць. 

Трэцяя гісторыя – прыступкай ніжэй. Дырэктар УКП «Быховский жилкомхоз» Дзмітрый Ліпскі знік пасля таго, як 21 сакавіка 2025 года каля гарадской лазні яго машыну абшукалі магілёўскія сілавікі і запрасілі дырэктара прайсці ў службовы кабінет. Улетку таго ж года затрыманы па падазрэнні ў хабарніцтве Ліпскі яшчэ значыўся дырэктарам  на сайце райвыканкама. Яго прозвішча прыбралі, але графа «Дырэктар»  пустуе ўжо паўтара года. 

Куды падзенецца Ліпскі, было зразумела загадзя. Да жылкамгаса ён служыў у быхаўскай міліцыі і сышоў адтуль не па-добраму, потым без прыкметных поспехаў кіраваў ЖКГ у Крупках. Разбіраючы абяцанні дырэктара ператварыць Быхаў у падабенства Рыа-дэ-Жанэйра, мы яшчэ да ператрусу каля лазні папярэджвалі, што працоўных подзвігаў ад яго чакаць не варта. Кадравае сіта райвыканкама былы міліцыянер пры гэтым прайшоў двойчы – спачатку намеснікам дырэктара, потым дырэктарам. 

Для тых, хто піша пра такія гісторыі, словы ў сілавікоў знаходзяцца заўсёды. У лістападзе 2023 года КДБ унёс праект 6TV Belarus і mogilev.media ў пералік «экстрэмісцкіх фарміраванняў», пайменна назваў датычных і пералічыў усе сайты, каналы і старонкі ў сацсетках.

Пра тое, у якіх камерах сядзяць топ-чыноўнікі Лукашэнкі і дзе хаваюцца ад пакарання «людзі года», жыхары Магілёўшчыны даведваюцца з выданняў, падтрымка якіх у Беларусі – крымінальны артыкул. ДзяржСМІ – маўчаць у анучку. 

Тут усё проста. Незалежныя сродкі масавай інфармацыі патрэбныя любой краіне. Яны не даюць ёй канчаткова аскацініцца. Прыбіраеш іх з інфармацыйнай прасторы і атрымліваеш тое, што мы маем цяпер у Беларусі, – поўнае скоцтва. 

Фота з адкрытых крыніц.

Сам прызначыў, сам пералічыў: дырэктар магілёўскай фірмы выпісаў сабе 41 тысячу звыш акладу

Навіна ад

У Магілёве распачалі крымінальную справу супраць 34-гадовага дырэктара будаўнічай фірмы, які плаціў сабе больш, чым прадугледжана працоўным дагаворам. 

Маючы доступ да разліковага рахунку кампаніі, кіраўнік сам прызначаў сабе выплаты звыш акладу і сам жа пераводзіў іх на свой рахунак. Так набегла каля 41 тысячы рублёў. 

Парушэнне выявіў аддзел па барацьбе з эканамічнымі злачынствамі Ленінскага РАУС, абставіны высвятляюцца. Для Магілёўшчыны гэта сума асаблівага маштабу. У ліпені 2026 года сярэдні налічаны заробак у вобласці склаў 2684,8 рубля – самы нізкі паказчык у краіне. 

Атрымліваецца, дырэктар дадаў да свайго акладу больш за пятнаццаць сярэдніх заробкаў па рэгіёне. За які тэрмін назапасілася сума, каму належыць фірма, не паведамляецца. 

Зразумела адно: у гэтай схеме адзін і той жа чалавек вырашаў, колькі сабе заплаціць, і сам праводзіў плацёж. Праверыць такога кіраўніка знутры не было каму – гэта зрабіў АБЭЗ.

Фота ілюстрацыйнага характару.

Экс-намеснік старшыні Магілёўскага аблвыканкама Генадзь Дзенгалёў апынуўся ў СІЗА КДБ

Навіна ад

Былы намеснік старшыні Магілёўскага аблвыканкама Генадзь Дзенгалёў стаў фігурантам крымінальнай справы, звязанай з фінансамі.

Пра затрыманне Дзенгалёва стала вядома ад крыніц “Радыё Свабода”. Аднак, што канкрэтна яму ставяць у віну, паводле якога артыкула Крымінальнага кодэкса вядзецца справа і ў якім працэсуальным статусе знаходзіцца Дзенгалёў, пакуль невядома. Няма дакладнай інфармацыі і пра час затрымання.

Апошні раз Дзенгалёў публічна з’яўляўся ў якасці намесніка старшыні Магілёўскага аблвыканкама ў пачатку жніўня 2025 года. 7 жніўня ён удзельнічаў ва ўрачыстасцях да Дня будаўніка, а на 9 жніўня ў чыноўніка была запланаваная прамая тэлефонная лінія.

Пасля гэтага Дзенгалёў фактычна знік з публічнай прасторы. Пры гэтым пра яго адстаўку ці прычыны сыходу з аблвыканкама афіцыйна не паведамлялася.

Пэўнасць з’явілася толькі праз некалькі месяцаў. 15 студзеня 2026 года на пасаду намесніка старшыні Магілёўскага аблвыканкама, які курыруе будаўніцтва і жыллёва-камунальную гаспадарку, быў узгоднены Ігар Клішо.

Такім чынам, паміж апошнім публічным з’яўленнем Дзенгалёва ў жніўні і прызначэннем яго пераемніка ў студзені мінула больш за пяць месяцаў. Увесь гэты час пра лёс чыноўніка публічна нічога не паведамлялася.

Цяпер высветлілася, што былы намеснік старшыні аблвыканкама апынуўся ў СІЗА КДБ, вядомым як «амерыканка». Аднак, што менавіта адбылося паміж урачыстасцямі да Дня будаўніка і «амерыканкай», пакуль застаецца невядомым.

Даведка

Генадзь Дзенгалёў нарадзіўся ў 1973 годзе ў Бялынічах, у сям’і спадчынных будаўнікоў. Там вучыўся ў сярэдняй, спартыўнай і музычнай школах, пасля восьмага класа ў 15 гадоў паступіў у Магілёўскі будаўнічы тэхнікум. Пасля заканчэння тэхнікума вярнуўся на радзіму і пачаў працоўную дзейнасць дублёрам майстра, а затым атрымаў пасаду майстра.

Скончыў Беларускую дзяржаўную політэхнічную акадэмію і Акадэмію кіравання пры прэзідэнце.

З 2015 года і на момант прызначэння на пасаду старшыні Барысаўскага райвыканкама працаваў генеральным дырэктарам Мінскага абласнога вытворчага праектна-будаўнічага ўнітарнага прадпрыемства «Мінскаблсельбуд».

14 верасня 2017 года быў прызначаны на пасаду старшыні Барысаўскага раённага выканаўчага камітэта. З 13 мая 2022 года ўступіў на пасаду намесніка старшыні Магілёўскага абласнога выканаўчага камітэта па пытаннях будаўніцтва і ЖКГ.

Фотаздымак: mediazonaby.com

Мёд, бярозавы сок і крымінальныя справы: раёнкі Магілёўшчыны масава святкуюць Дзень работнікаў лесу

Навіна ад

Работнікаў лясгасаў так паважаюць у раёнах Магілёўшчыны, што справаздачы, прысвечаныя прафесійнаму святу, ужо супернічаюць па масавасці з рэпартажамі пра новыя здзяйсненні Лукашэнкі і нагадваюць масавую істэрыю. 

У Краснаполлі расказалі пра бухгалтарку лясгаса, якая будуе сваю дзейнасць на прынцыпах, закладзеных у трактаце Лукі Пачолі «Аб боскай прапорцыі» . Касцюковіцкая «раёнка» апісала цяжкасці  укладвання лесу ў вагоны, а ў Асіповічах, як аказалася, колатыя дровы можна заказаць круглы год . 

Усіх пераплюнулі майстры пяра чавускай раёнкі. Яны аж у чатырох артыкулах расказалі пра свой лясгас  настолькі падрабязна, што не забыліся і пра сакратарку прыёмнай  (на фота), якая працуе на пасадзе ўжо 16 гадоў і пабачыла нямала цікавага. З гэтым не паспрачаешся – цікавае было. 

Напрыклад, у снежні 2023 года пасля праверкі Камітэта дзяржкантролю і фінансавай міліцыі  былі распачатыя крымінальныя справы ў дачыненні да былога дырэктара і галоўнага інжынера Чавускага лясгаса. «Фондавую» драўніну, якую належала прадаваць праз біржу па рыначнай цане, паводле шматхадовай схемы перадавалі ў выглядзе піламатэрыялаў дзвюм прыватным фірмам па заніжаных цэнах. Шкоду ацанілі больш як у 85 тысяч рублёў, матывам назвалі прэміі і жаданне схаваць невыкананне плана па вытворчасці і продажы тых жа піламатэрыялаў. 

Праз дзевяць дзён пракуратура Магілёўскай вобласці распачала  у дачыненні да былога дырэктара яшчэ адну справу – аб перавышэнні службовых паўнамоцтваў з цяжкімі наступствамі. Круглы яловы лес распілавалі ў прыватнай арганізацыі, дошкі лясгас прадаў на экспарт за 141 тысячу рублёў, хоць на біржавых таргах той жа лес можна і трэба было прадаць за 193 тысячы. Матэрыялы перадалі ў абласное ўпраўленне Следчага камітэта. 

Даводзіцца прызнаць, што лясная галіна Беларусі даўно ператварылася ў паўкрымінальны бізнес. У маі 2022 года міністра лясной гаспадаркі Віталя Дрожжу вызвалілі ад пасады  «ў сувязі са здзяйсненнем правіннасці, несумяшчальнай са знаходжаннем на дзяржаўнай службе». А ў снежні 2023 года, расказваючы пра чавускую сітуацыю, Камітэт дзяржкантролю  удакладніў, што за год па «шэрых» схемах з лесапрадукцыяй і незаконных сувязях лясгасаў з прыватнымі структурамі ў галіне распачата больш за 15 крымінальных спраў.
А вы кажаце мёд і бярозавы сок…

Фота чавускай раённай газеты .

«Чалавек года» ў вышуку: хто такі Аляксандр Лаўрыновіч з Магілёва

Навіна ад

У лютым 2025 года старшыня аблвыканкама Анатоль Ісачанка ўручаў званне «Чалавек года Магілёўшчыны» ў намінацыі «грамадска-палітычная дзейнасць» дваім  – Ігару Марзалюку і Аляксандру Лаўрыновічу, «дэпутату» Магілёўскага гарсавета і дырэктару ТАА «Фестивали бай». Праз чатырнаццаць месяцаў, 10 красавіка 2026 года, МУС абвясціла Лаўрыновіча ў вышук «па артыкуле Крымінальнага кодэкса» – вынікае  з базы SOTA і публікацыі «Зеркала» ад 19 жніўня. Партрэт на абласной Дошцы гонару і картка ў вышуковай базе належаць аднаму чалавеку, і шлях паміж імі ўклаўся ў год. Знаёмімся.

Настаўнік танцаў і ўніверсітэт у сямнаццаць гадоў

Аляксандр Аляксандравіч Лаўрыновіч нарадзіўся 3 сакавіка 1989 года ў Магілёве. З 2007 па 2013 год танцаваў у заслужаным аматарскім калектыве, у 2012-м скончыў універсітэт імя Куляшова па спецыяльнасці «артыст народнага танца, выкладчык», а ў 2013-м ансамбль пад яго кіраўніцтвам атрымаў званне ўзорнага – так напісана  ў яго біяграфіі на сайце Сусветнага альянсу мастацтва і танца WADA. Альянс базуецца ў Маскве, праводзіць «Вальс Победы» ў Стаўрапалі і алімпіяды мастацтваў у Губкіне Белгародскай вобласці, а Лаўрыновіч значыцца ў ім кіраўніком ад Беларусі. На сайце ўласнай кампаніі ён згаданы  як чалавек, які аддаў дванаццаць гадоў сістэме адукацыі Магілёва – то бок школьны педагог, які паралельна ставіў нумары і вазіў дзяцей на конкурсы. У перадвыбарнай праграме 2024 года, размешчанай  на сайце гарвыканкама, біяграфія выкладзена інакш: універсітэт скончаны ўжо ў 2007 годзе, Акадэмія кіравання – у 2012-м, «прайшоў шлях ад настаўніка да дырэктара арганізацыі». 

Універсітэт у васемнаццаць гадоў – гэта, вядома, моцна, але выбарчыя камісіі такія рэчы не правяраюць.

Каманда нумар адзін

З 2016 года Лаўрыновіч арганізуе конкурсы і фестывалі, а яго кампанія Festivali.by называе  сябе «камандай №1 у Беларусі ў сферы правядзення фестываляў». Кліентура ў яе была пераважна дзяржаўная, і за некалькі гадоў фірма вырасла з магілёўскіх дзіцячых конкурсаў у падрадчыка рэспубліканскіх акцый. Сярод праектаў апошніх гадоў:

  • танцавальны батл Dream Dance Fest на «Славянскім базары» ў 2019 годзе  і тэлепраект «Кубак Дружбы», які стартаваў  у Мінску тады ж;
  • шоу АНТ «Звездный путь», дзе Лаўрыновіч з 2022 года  сядзеў у настаўніках;
  • светлавое шоу і феерверк «Марафона единства» ў Брэсце ў снежні 2024 года – дамова  з Брэсцкім аблвыканкамам заключана без конкурсу, з адной крыніцы;
  • рэаліці-шоу «Фабрика блогеров» з Вольгай Бузовай у настаўніках, якое выйшла  у студзені 2025 года: фармат «Дома-2», галасаванне з пахваламі Лукашэнку і рэкламныя ўстаўкі дзяржпрадпрыемстваў Магілёўскай вобласці;
  • «першы ў Беларусі інтэрактыўны серыял» «Зумеры», здымкі якога завяршыліся  у Магілёве 15 снежня 2025 года.

Агульнае ў гэтых праектаў адно: заказчык або партнёр – дзяржава. У інтэрв’ю БелТА пра «Зумераў» генеральны прадзюсар Лаўрыновіч асобна дзякаваў за падтрымку ідэі Анатолю Ісачанку і Міністэрству інфармацыі, адной з пляцовак здымак стала магілёўская школа №46. Да вышуку тады заставалася менш за чатыры месяцы.

Мандат і Дошка гонару

У лютым 2024 года Лаўрыновіч прайшоў  у Магілёўскі гарадскі «савет дэпутатаў» па Чапаеўскай акрузе №17. Праграма абяцала добраўпарадкаванне, падтрымку таленавітай моладзі і захаванне духоўнай спадчыны; слоган – «Толькі разам і толькі наперад». Праз год мандат і фірма далі яму званне «Чалавек года Магілёўшчыны» ў адной намінацыі з гісторыкам Марзалюкам. У лістападзе 2025 года, у ток-шоу СТБ «Да!Но…», «дэпутат» з Магілёва тлумачыў  моладзі, як стаць паспяховай. Да вучобы ў Акадэміі кіравання ён, паводле ўласных слоў, думаў, што «яны там у сталіцы нічога не разумеюць», а пасля першай жа лекцыі зразумеў: «дрэнных кіраўнікоў у нашай краіне не існуе», бо «абсалютна кожны знаходзіцца на сваім месцы, палітыка, у тым ліку кіраўніка дзяржавы, гэта выбарачнае прызначэнне на пасады». Моладзі ён раіў не чакаць, што ёй нехта нешта павінен, а «рваць зямлю пад сабой».

Рваў зямлю так, што цяпер у вышуку

17 сакавіка 2026 года Следчы камітэт забараніў  уладальніку ТАА «Фестивали бай» прадаваць долі ў кампаніі – запіс унесены ў ЕДР, справай займаецца аддзел па Магілёўскай вобласці галоўнага ўпраўлення па расследаванні злачынстваў у сферы арганізаванай злачыннасці і карупцыі. 10 красавіка МУС абвясціла Лаўрыновіча ў вышук. Крыніца «Зеркала» кажа пра карупцыйныя артыкулы, суму звыш 200 тысяч рублёў і мерапрыемствы ў Брэсце як падставу прэтэнзій. Маёмасць Лаўрыновіча арыштаваная, а аўтамабілі і нерухомасць прадбачліва афармляліся на сваякоў. Сам Лаўрыновіч, паводле звестак выдання, выехаў з краіны вясной і знаходзіцца ў адной з краін Еўропы. Фірма засталася ў Магілёве: сайт festivali.by адключаны, інстаграм не абнаўляецца з 1 мая, у органах прымусовага выканання – пяць вытворчасцяў. 

Спагнаць грошы праз суд спрабавала і мінскае рэкламнае агенцтва, але пазоў адхілілі. Пярэчанне па сутнасці тут адно, і яно належыць самому Лаўрыновічу. У лістападзе ён сцвярджаў, што ў краіне кожны знаходзіцца на сваім месцы. З красавіка месца Лаўрыновічу спрабуе знайсці МУС.

Фота скрыншот відэа «Фабрика блогеров» .

Сістэмную карупцыю ў дарожных будаўнікоў знайшлі на Магілёўшчыне

Навіна ад

Злачынную схему, у якой былі задзейнічаны прадстаўнікі дарожна-будаўнічай галіны чатырох абласцей, выявілі на Магілёўшчыне.

Схема працавала паўтары гады. За гэты час фігуранты атрымалі больш за 55 тыс. рублёў незаконнаага ўзнагароджання ад удзельнікаў тэндэраў у абмен на лабіраванне іх інтарэсаў пры правядзенні працэдур закупак запчастак для дарожнай тэхнікі, а таксама своечасовую аплату.

Фігуратны прадстаўлялі дарожна-будаўнічыя арганізацыі Магілёўскай, Гомельскай, Брэсцкай і Мінскай абласцей. У дачыненні да пяці з іх ва ўзросце ад 34 да 44 гадоў распачатыя крымінальныя справы. Працягваюцца мерапрыемствы па выяўленні дадатковых эпізодаў хабарніцтва і кола датычных асоб. 

Фотаздымак: ТГ “МУС Беларусі”