Савецкі бамбардзіроўшчык ІЛ-4, які пацярпеў крушэнне ў 1940-гадах, знайшлі пошукавікі ва ўрочышчы Прошча ў Асіповіцкім раёне.
Пачалася гэтая гісторыя з даследавання лёсу байцоў Крымскай кавалерыйскай дывізіі, якія загінулі ў Асіповіцкім раёне напрыканцы лета 1941 года. Гэтым займаецца Міхаіл Кедыч з асіповіцкай пошукавай групы «Рэйд». Збіраючы звесткі пра кавалерыстаў, ён даведаўся, што непадалёк ад месца іх гібелі некалі разбіўся самалёт. Удалося прыблізна вызначыць месца падзення і арганізаваць выезд 15 лістапада 2026 года.
Да меркаванага месца катастрофы ўдзельнікам экспедыцыі давялося некалькі кіламетраў ісці пешшу. Праехаць туды на транспарце не дазваляе забалочаная мясцовасць, асабліва цяжкапраходная позняй восенню.
Каля аднаго з меліярацыйных каналаў пошукавікі заўважылі металічныя фрагменты самалёта. Сярод знаходак былі часткі фюзеляжа, патрубкі і аскепкі шкла з кабіны. Але вызначыць тып машыны дапамагла іншая дэталь – адзін з двух рэдуктараў.
Паводле ўдзельнікаў экспедыцыі, знойдзеныя абломкі належаць савецкаму бамбардзіроўшчыку ДБ-3Ф, які таксама вядомы пад пазнейшым абазначэннем ІЛ-4.
Дакладную дату катастрофы пакуль устанавіць не ўдалося. Пошукавікі мяркуюць, што бамбардзіроўшчык мог разбіцца ў 1942–1943 гадах. На аэрафотаздымках мясцовасці, зробленых у 1941 годзе, прыкмет падзення самалёта яны не выявілі.
Чалавечых парэшткаў падчас першай экспедыцыі не знайшлі. Пры гэтым мясцовыя жыхары захавалі ўспаміны пра тое, што пасля катастрофы лётчык трапіў у палон. Ці адпавядае гэтае сведчанне рэчаіснасці і што адбылося з ім пасля, яшчэ трэба высветліць.
Завяршыць даследаванне месца падзення за адзін дзень не атрымалася. Позняй восенню светлавога часу мала, а цяжкая дарога праз балота забірае значную яго частку. Таму ўдзельнікі экспедыцыі вырашылі вярнуцца ва ўрочышча Прошча ў пачатку снежня, прычым ужо больш шматлікай групай. Трэба вызначыць не толькі калі і пры якіх абставінах ён разбіўся, але і хто быў у складзе экіпажа.
Фотаздымак: komkur.info









