Краснапольская «раёнка» асвятліла праблемы Літвы і дасягненні мясцовай жывёлагадоўлі.
Раённая газета Краснапольшчыны закляйміла ганьбай міністра замежных спраў Літвы Кястуціса Будрыса, выкарыстоўваючы ўсім народам вядомую байку «Воўк і ягня». А заадно асвятліла дасягненні краснапольскай жывёлагадоўлі, якая стала ў Магілёўскай вобласці сімвалам безгаспадарчасці.
Незразумела, што там яшчэ нарабіў літоўскі міністр, затое з АПК Краснапольшчыны ўсё да крайнасці ясна. Пра адзіны калгас раёна можна сказаць толькі тое, што ён пабіў усе рэкорды стратнасці.
ААТ «Краснапольскі» дапамагаюць усе каму не лянота – ад новага старшыні райвыканкама да студэнтаў магілёўскага інстытута, якія ездзяць у Краснаполле, каб разбіраць стары кароўнік.
Паказальна, што калі артыкул, прысвечаны Літве, мае ўражлівы памер, то нарада па жывёлагадоўлі змясцілася ў пару радкоў з мноствам фатаграфій заклапочаных краснапольскіх начальнікаў.
Вельмі падобна на тое, што літоўскае ягня неяк ды выжыве, а вось краснапольскія ваўкі – на мяжы вымірання.