У магілёўскім парку Падміколле з’явілася адразу пара новых металічных насельнікаў – скульптуры мужчыны і жанчыны, якія сядзяць побач на паркавых лаўках.
Абедзве скульптуры зробленыя з мноства дробных дэталяў. Жанчына апранутая ў доўгую ажурную сукенку і шырокі капялюш. Яе адзенне сабранае з металічных кружкоў, кветак, пласцінак і іншых элементаў. У руках яна трымае металічны глобус, на якім праглядаюцца абрысы карты Беларусі. У выніку атрымалася своеасаблівая «беларуская паненка з зямным шарам» – ці то гаспадыня свету, ці то алегорыя Беларусі, у залежнасці ад фантазіі таго, хто на яе глядзіць.
Побач на суседняй лаўцы прымасціўся яе металічны кавалер. Мужчына апрануты ў гарнітур з гальштукам, капялюш, акуляры і чаравікі. Аўтары нават паклапаціліся пра гузікі, кішэні і шнуркі на абутку. У адной руцэ ён трымае вялікую кнігу з надпісам «Гісторыя Магілёва». Атрымаўся ці то інтэлігент-краязнаўца, ці то экскурсавод, які прысеў пачытаць гісторыю горада непадалёк ад такой жа металічнай жанчыны.
Разам скульптуры ўжо выглядаюць не выпадковымі асобнымі фігурамі, а кампазіцыяй. У жанчыны – зямны шар з Беларуссю, у мужчыны – гісторыя Магілёва. Аўтарскую задуму можна прачытаць як спробу злучыць краіну і горад, хоць без дадатковага тлумачэння гэта застаецца толькі адной з магчымых інтэрпрэтацый.
Пры гэтым абодва персанажы маюць выразную стымпанкавую эстэтыку: чалавечыя постаці нібыта сабраныя з таго, што знайшлося ў металічнай майстэрні. Асабліва каларытным атрымаўся мужчына – з сур’ёзным тварам, вялізнымі акулярамі і крыху карыкатурнымі прапорцыямі ён нагадвае адначасова чыноўніка і робата, якога адправілі вывучаць краязнаўства.
Практычнае прызначэнне новых арт-аб’ектаў таксама відавочнае: з імі можна фатаграфавацца. А вось што канкрэтна хацелі сказаць аўтары глобусам з Беларуссю і «Гісторыяй Магілёва», наведнікам Падніколля давядзецца дадумваць самім.
Фотаздымак: ТГ “Магілёў. Галоўнае”