«Падарунак да новага навучальнага года» – так 25 жніўня раённая газета Касцюковічаў апісала цалкам абноўленае асфальтавае пакрыццё ў двары сярэдняй школы № 1. Работы выканала ДРБУ № 130 – філіял КУП «Магілёўаблдарбуд». Больш за палову тэксту – падзякі: адміністрацыя, педагогі, навучэнцы і бацькі ўдзячныя прадпрыемству, кожнаму яго работніку і асобна начальніку філіяла, чыю неабыякавасць назвалі прыкладам гаспадарскага падыходу.
Насамрэч, цвёрдае пакрыццё ў школьным двары – не ўпрыгожванне і не жэст добрай волі. Санітарныя нормы і правілы для ўстаноў агульнай сярэдняй адукацыі патрабуюць, каб падыходы да будынка не менш чым за сто метраў, уезды і ўваходы на тэрыторыю, праезды і дарожкі мелі цвёрдае пакрыццё або пакрыццё з выкарыстаннем друзу. Гэта абавязак установы і яе заснавальніка – аддзела па адукацыі райвыканкама, і грошы на гэта закладваюцца ў бюджэт, а не выпрошваюцца.
Прычым да навучальнага года школу прынялі раней. З 29 па 31 ліпеня у раёне працавала міжведамасная камісія – аддзел па адукацыі, МНС, цэнтр гігіены і эпідэміялогіі, аддзел унутраных спраў. Правяралі якасць рамонту, выкананне санітарных нормаў і мер бяспекі, па выніках усе дванаццаць школ раёна павінны былі атрымаць пашпарты гатоўнасці.
Прылеглая тэрыторыя ўваходзіць у тое, што камісіі правяраюць. Значыць, адно з двух: альбо двор у ліпені нараканняў не выклікаў і асфальт клалі не дзеля бяспекі дзяцей, альбо заўвагі былі – і тады іх ліквідацыя тым больш не падарунак.
Другое, пра што газета не піша: ДРБУ № 130 – не прыватная фірма і не дабрачынны фонд. Гэта філіял камунальнага прадпрыемства, якое належыць вобласці. Для дзяржаўных арганізацый бязвыплатная (спонсарская) дапамога – не парыў, а працэдура, распісаная ўказам № 300: патрэбны дагавор з указаннем мэты і разліку кошту работ, а арганізацыя, падпарадкаваная мясцовым выканаўчым і распарадчым органам, мае права аказаць такую дапамогу толькі са згоды старшыні адпаведнага органа.
Сукупны памер дапамогі за год абмежаваны адным працэнтам выручкі за папярэдні год. І асобна: дзяржаўная арганізацыя наогул не мае права аказваць спонсарскую дапамогу, калі ў яе чыстая страта за справаздачны перыяд, пратэрмінаваная запазычанасць па плацяжах у бюджэт або па зарплаце работнікам.
Дапамога, аказаная з парушэннем гэтых правіл, падлягае вяртанню спонсару ў поўным аб’ёме.
Нічога з гэтага ў нататцы няма: ні кошту работ, ні плошчы двара, ні згадкі пра дагавор, ні таго, чыя згода атрыманая і з якіх сродкаў усё аплачана. Ёсць прозвішча начальніка філіяла і эпітэты.
Дарэчы, гэта ўжо другі раз за лета, калі школа атрымлівае патрэбнае ёй чужымі рукамі. 17 ліпеня на суботніку па добраўпарадкаванні бацькі і старэйшыя браты вучняў сваімі сіламі зманціравалі і ўсталявалі новую агароджу тэрыторыі. Пра гэта газета таксама пісала з падзякай.
Асфальт лёг за адзінаццаць дзён да 5 верасня, калі Касцюковічы прымуць XXXIII Дзень беларускага пісьменства. З вясны райцэнтр – адна вялікая будпляцоўка: вулічна-дарожная сетка, фасады шматпавярховікаў, плошча, сквер, раённы музей, Свята-Крыжаўзвіжанская царква.
Магчыма, што асфальт у школьным двары паклалі проста ў перадсвяточнай мітусні, калі грошы асабліва не лічаць, а законы становяцца лішнімі ўмоўнасцямі.
Фота газеты «Голас Касцюкоўшчыны».