Камітэт дзяржкантролю Магілёўскай вобласці знайшоў у пяці раёнах больш за дзвесце закінутых дамоў, якіх няма ў рэестры пустуючых. Уладальнікаў ніхто не шукаў, зносіць або прадаваць гэтыя дамы не збіраліся, участкі зараслі хмызняком і дрэвамі.
Якія гэта раёны, камітэт не паведаміў.
Быхаву такая ананімнасць не прадугледжана. У ліпені раённая пракуратура абследавала адзін Ямніцкі сельсавет і налічыла 118 дамоў, якія адпавядалі крытэрыям пустуючых, але ў рэестр не трапілі. А ў 2025 годзе сам КДК, правяраючы Быхаўскі раён, знайшоў там больш за дзвесце пустуючых прыватных дамоў, з якімі не працавалі. Ды яшчэ 51 тысячу бюджэтных рублёў, заплачаных за знос, які да канца не давялі.
У адным раёне тады знайшлі столькі ж, колькі цяпер у пяці. Іншыя раёны ў справаздачах кантралёраў застаюцца без назваў нават пры вялікіх сумах.
У студзені КДК праверыў знос закінутых аб’ектаў сельгасарганізацый, і зноў у пяці безыменных раёнах. Там за знос 35 будынкаў з бюджэту заплацілі больш за 250 тысяч рублёў за работы, якіх не было. Заўважым, упяцёра больш за быхаўскія 51 тысячу. Прычына, хутчэй за ўсё, у словах Лукашэнкі. У жніўні 2024 года, узгадняючы Аляксандра Кісялёва старшынёй Быхаўскага райвыканкама, ён сказаў, што ў Быхаўскім раёне «непачаты край работы ўвогуле па навядзенні элементарнага парадку».
З таго часу валіць усё на Быхаў бяспечна: любая праверка там пацвярджае сказанае дзедам. Назваць іншы раён – значыць прызнаць, што бардак не быхаўская асаблівасць, а агульная карціна вобласці.
За два гады пасля слоў Лукашэнкі парадак у Быхаве так і вымяраюць закінутымі дамамі: больш за дзвесце на раён у 2025 годзе, 118 на адзін сельсавет у 2026-м. Ад астатніх раёнаў Быхаў адрозніваецца толькі тым, што яго дамы лічаць услых.
Фота БелТА.