Амаль інжынер Талмудоўскі – новы намеснік старшыні Асіповіцкага райвыканкама мяняў месцы працы, як пальчаткі.
На пасаду намесніка старшыні райвыканкама ў Асіповічах прызначаны Сяргей Федзянін, якога, трэба прызнаць, нямала паматала па жыцці. У 2009 годзе ён скончыў Акадэмію МУС, а з 2004 па 2014 гады працаваў на розных прадпрыемствах у Барысаве і Мінску.
Потым Федзянін год працаваў інспектарам Барысаўскай міжраённай інспекцыі аховы жывёльнага і расліннага свету. Яшчэ год Сяргей Іванавіч працаваў вядучым, а потым і галоўным спецыялістам аддзела архітэктуры і будаўніцтва Барысаўскага райвыканкама.
Наступныя пяць гадоў былі стабільнымі. Іх Федзянін аддаў працы галоўным спецыялістам сектара архітэктуры і будаўніцтва ўпраўлення па архітэктуры, будаўніцтве і жыллёва-камунальнай гаспадарцы Жодзінскага гарвыканкама.
Потым год быў начальнікам аддзела архітэктуры і будаўніцтва Смалявіцкага райвыканкама.
Ствараецца ўражанне, што міліцыянера Федзянiна не ведалі, куды прыстроіць. Тым не менш яго лічылі перспектыўным кадрам і дазволілі прайсці перападрыхтоўку ў лукашэнкаўскай акадэміі кіравання.
Цікава, што ў профілі ВК нейкі 40-гадовы Сяргей Федзянін з Барысава усталяваў усяго адну гульню з красамоўнай назвай «Жажда власти».
Мяркуючы па спісе займаных пасад, у ведамстве Геворга Мелканяна Сяргей Федзянін будзе адказваць за пытанні будаўніцтва і ЖКГ. Напэўна, падыдзе да гэтай справы з чыста міліцэйскай хваткай, якую яму раней чамусьці не ўдалося рэалізаваць.
Фота belarus-news.by.