Размову аб патрыятызме ў магілёўскай школе вёў Аляксандр Шкадаў, жыццё якога – бляклы ўзор служэння Айчыне.
У СШ №21 Магілёва прайшла сустрэча ў рамках праекта “Школа актыўнага грамадзяніна”. Тэмай дыялогу стала пытанне аб тым, што значыць быць дастойным грамадзянінам Рэспублікі Беларусь і ў чым заключаецца гатоўнасць да абароны Радзімы. Галоўны спікер – старшыня Магілёўскай абласной арганізацыі РГА “Патрыёты Беларусі” Аляксандр Шкадаў. Для яго праблема з тым, як стаць дастойным грамадзянінам, гатовым абараняць Радзіму, ужо лічы вырашана.
Нараджэнне легенды
У публікацыі “Магілёўскіх ведамасцей” Шкадава называюць “чалавекам-легендай, чыё жыццё – ўзор служэння Айчыне”.
Што вядома аб яго прафесійным шляху, акрамя бягучай пасады ў грамадскім аб’яднанні?
Толькі тое, што Аляксандр Яўгенавіч быў вядучым спецыялістам аддзела эканамічнай бяспекі, вядучым эканамістам і выконваючым абавязкі намесніка начальніка ўпраўлення матэрыяльна-тэхнічнага забеспячэння ААТ “Магілёўхімвалакно”.
Вядома таксама, што прадпрыемства і дагэтуль з’яўляецца глыбока стратным.
Такім чынам, вялікіх поспехаў Шкадаў там не дамогся і яго працу на ААТ “Магілёўхімвалакно” нельга назваць узорам служэння Айчыне нават з вялікай нацяжкай.
Ды і згадваўся Аляксандр Шкадаў у публікацыях абласных СМІ не як перадавік вытворчасці, а як ўдзельнік патрыятычных акцый.
Здаецца, што з вытворчасцю хларата натрыю і перакісу вадароду Шкадаў завязаў канчаткова і пачаў займацца патрыятызмам на прафесійным узроўні.
Так ці інакш, але афіцыйна абласная арганізацыя РГА “Патрыёты Беларусі” зарэгістраваная ў галоўным упраўленні юстыцыі аблвыканкама ў красавіку 2023 года.
Стаў маральным арыенцірам
З цягам часу і пры такім частым мільганні Шкадава на розных праўладных мерапрыемствах, у тым, што Шкадаў з’яўляецца ўзорам служэння Айчыне ўжо перастануць сумнявацца. А тут яшчэ і фота з Віктарам Лукашэнкам, Мукавозчыкам і Азаронкам у асабістым інстаграм-акаўнце Аляксандра Яўгенавіча не пакідае ніякіх сумневаў у тым, што ён менавіта той, каго “абраў час”.
У выпадку са Шкадавым не патрабуецца нават указваць адрас фермы па вырошчванні патрыётаў.
Ты проста ездзіш на аўтапрабегі, заводзіш карысныя знаёмствы, затым рэгіструеш нейкую разнавіднасць саюза “Мяча і арала”, потым цябе прадстаўляюць школьнікам як маральны арыенцір і прыклад для пераймання і… Калі зараз Шкадава ўзнагародзяць медалём “За адвагу на пажары” ніякіх сумневаў у яго адвазе ўжо не будзе.
А што на справе? Хлопец проста зразумеў, што пры цяперашняй свістаплясцы меркаванняў і перакананняў у Беларусі кар’еру зрабіць значна прасцей не ў гарачым цэху, а на рэжымных патрыятычных пачуццях.
Фота – асабісты акаўнт ў Instagram.