Сын ураджэнкі Магілёва Інэсы Іванаўны Конрад спрабуе амаль праз восем дзесяцігоддзяў аднавіць гісторыю сваёй сям’і. Вядома, што восенню 1947 года мнованароджаная дзяўчынка была падкінутая ў Магілёўскі Дом дзіцяці. Цяпер яе родныя спадзяюцца знайсці людзей, якім нешта вядома пра сям’ю Кашынскіх.
У рэдакцыю mogilev.media звярнуўся Юрый Найдзенкаў, які жыве ў Германіі. Ён шукае біялагічных сваякоў сваёй маці – Інэсы Іванаўны Конрад.
Інэса нарадзілася 10 кастрычніка 1947 года. Як вынікае з атрыманай сям’ёй архіўнай даведкі Дзяржаўнага архіва Магілёўскай вобласці, у журнале прыёму дзяцей Магілёўскага Дома дзіцяці захаваны запіс № 5 ад 29 лістапада 1947 года на імя Кашынскай Інэсы, 1947 года нараджэння.
На момант паступлення ўзрост дзяўчынкі быў пазначаны як адзін месяц і 15 дзён. Побач стаяў кароткі запіс – «падкінута». Звестак пра бацькоў не было.
Пазней Інэсу ўдачарыла сям’я Найдзенкавых (яны разам – на фота). Доўгі час яна не ведала, што людзі, якіх лічыла сваімі бацькамі, не былі такімі біялагічна.
Пошукі пачаліся ў 1991 годзе. Тады з Магілёўскага абласнога архіва ЗАГС прыйшоў афіцыйны адказ: у актавым запісе аб нараджэнні Інэсы былі пазначаныя яе біялагічныя бацькі. Бацькам запісаны Іван Кашынскі, маці – Аляксандра Стэфанаўна Кашынская. Іншых звестак пра іх у дакуменце не аказалася.
Сям’я спрабуе высветліць, кім былі Іван і Аляксандра Кашынскія, дзе яны жылі ў пасляваенныя гады і ці маглі ў іх застацца іншыя дзеці або сваякі.
Асабліва важнымі могуць аказацца ўспаміны старажылаў Магілёва і іншых населеных пунктаў Магілёўскай вобласці. Магчыма, у чыімсьці сямейным архіве захаваліся фотаздымкі або дакументы Кашынскіх, якія жылі тут у 1940-я гады. А нехта мог чуць гісторыю маленькай Інэсы, якая апынулася ў Доме дзіцяці восенню 1947 года.
Юрый просіць адгукнуцца ўсіх, каму знаёмыя імёны Іван Кашынскі і Аляксандра Стэфанаўна Кашынская. Важнай можа стаць любая дэталь: назва вёскі, вуліца, прозвішча сваяка ці суседа, стары фотаздымак, ліст або сямейны ўспамін.
Пошук вядзе сын Інэсы – Юрый Найдзенкаў, які жыве ў Германіі. Ён таксама просіць чытачоў падзяліцца гэтай гісторыяй са сваімі бацькамі, дзядулямі і бабулямі, іншымі сваякамі старэйшага пакалення. Магчыма, менавіта ў іх памяці захавалася дэталь, здольная амаль праз 80 гадоў дапамагчы аднавіць гісторыю сям’і.
Калі вам нешта вядома пра Кашынскіх з Магілёва або Магілёўскай вобласці, якія жылі тут у 1940-я гады, напішыце ў рэдакцыю mogilev.media.
Крыніца інфармацыі і архіўных звестак: Юрый Найдзенкаў.
Фота: з сямейнага архіва / прадастаўлена героем публікацыі.