У падземным пераходзе на скрыжаванні праспекта Міру і Першамайскай у Магілёве скончылі мяняць плітку – усе ўваходы зноў адкрытыя.
Работы пачаліся ў сярэдзіне верасня і ішлі па частках: унутры агароджвалі ўчасткі, а ўваходы перакрывалі то з боку праспекта, то з боку Першамайскай.
Сам пераход увесь гэты час працаваў. Скончыць укладку планавалі да 1 лістапада.
Прычыну рамонту ведае кожны, хто ходзіць гэтай дарогай зімой: ад расталага снегу старая падлога станавілася слізкай, і скардзіліся на гэта некалькі гадоў запар. Да вясны на падлозе не хапала цэлых кавалкаў керамаграніту.
Новая плітка таўсцейшая за ранейшую і шурпатая. Люкі з камунікацыямі закрылі здымнымі плітамі, і яны больш не вылучаюцца на падлозе.
Да канца кастрычніка ў Магілёве ліквідавалі і яшчэ адну задаўненую праблему. На мосце па вуліцы Каралёва з боку Юбілейнага адхон, пліты якога ў жніўні пасля ліўняў спаўзлі ў пясок, прывялі ў парадак. Пліты, якія спаўзлі, на месца не вярнулі: размытыя ўчасткі залілі бетонам са шчэбнем і з яго ж зрабілі водаадводы.
Фота з адкрытых крыніц.