У 2025 годзе пракуратура скіравала 194 заявы ў суды Магілёўскай вобласці на прызнанне матэрыялаў “экстрэмісцкімі”.
Блукаючы па прасторах інтэрнэта, пракуроры знаходзілі шмат публікацый, якія, на іх думку, “накіраваныя на дэстабілізацыю грамадска-палітычнай і сацыяльна-эканамічнай абстаноўкі ў краіне”.
У выніку яны, зразумела, пазнаходзілі такія, а суды з імі пагадзіліся. Гэта тычыцца 45 матэрыялаў у ТікТоку, 36 – у Інстаграме, 26 – на YouTube, 24 – у Тэлеграме, а ў Фэйсбуку, “Вконтакте” “Аднакласніках” і Х – 13. Таксама “экстрэмісцкімі” былі прызнаныя дзевяць сайтаў і адно друкаванае выданне.
У якасці прыкладу такога выяўленага “экстрэмізму” пракуроры прыводзяць нейкі канал на YouTube, дзе колькасць падпісчыкаў звыш 33 тыс.чалавек. “На інтэрнэт-рэсурсе размяшчаліся відэаматэрыялы, накіраваныя на абразу, падрыў аўтарытэту і іміджу кіраўніка дзяржавы, а таксама падзеі сацыяльнага і палітычнага жыцця Рэспублікі Беларусь, якія прадстаўляюць у негатыўным святле” – напісала Генпракуратура, не лічачы, што такі “экстрэмізм” – звычайная рэалізацыя права на свабоду выказванняў і выяўленне свайго пункту погляду.
Змагаючыся з вольным словам, пракуратура летась таксама абмежавала доступ да дзевяці інтэрнэт-рэсурсаў нібыта “экстрэмісцкага зместу”.
Фотаздымак з адкрытых крыніц