Чарговыя 11 каталіцкіх святароў страцілі магчымасць служыць на Магілёўшчыне, пры гэтым вышэйшы клір расхвальвае абласныя ўлады.
Непажаданыя ксяндзы
Усё часцей адбываюцца выпадкі непадаўжэння дазволу каталіцкім святарам з польскім грамадзянствам служыць у касцёлах Магілёўскай вобласці. Аб недахопе ксяндзоў ужо казаў раней мітрапаліт Мінска-Магілёўскі, арцыбіскуп Юзаф Станеўскі.
І вось працяг гэтай гісторыі. Як стала вядома «Хрысціянскай візіі», чарговыя 11 святароў Мінска-Магілёўскай архідыяцэзіі будуць вымушаныя з’ехаць з Беларусі, паколькі не атрымалі ўзгаднення Апарата ўпаўнаважанага па справах рэлігій і нацыянальнасцяў на падаўжэнне рэлігійнай дзейнасці, а некаторыя атрымалі такі дазвол на мінімальны тэрмін.
У сувязі з гэтым Юзаф Станеўскі накіраваў просьбу да беларускага дыктатара аб падаўжэнні дазволу на служэнне гэтых святароў у Беларусі. Аднак развітанні з імі ўжо пачаліся. Так, 15 жніўня падчас урачыстай святой Імшы ў свята Унебаўзяцця Найсвяцейшай Панны Марыі ў Кафедральным касцёле ў Магілёве развіталіся з польскім святаром Раманам Шульцам, які з 2007 года служыў у Беларусі. Краіну ён пакіне ў бліжэйшыя дні.
Крывадушнасць у сутанах
Адметна, што ў набажэнстве, падчас якога развітваліся з Раманам Шульцам, удзельнічалі Апостальскі Нунцый у Беларусі арцыбіскуп Іньяцыа Чэфалія, Генеральны вікарый Мінска-Магілёўскай архідыяцэзіі біскуп Аляксандр Яшэўскі і ўжо згаданы Юзаф Станеўскі.
Днём раней у Музеі Масленікава яны сустракаліся з прадстаўнікамі магілёўскіх абласных і гарадскіх улад. З узгаданых на сайце Сatholic.by – толькі галоўны спецыяліст па справах рэлігій і нацыянальнасцяў галоўнага ўпраўлення ідэалагічнай работы і па справах моладзі Магілёўскага аблвыканкама Антон Лабаноўскі і кіраўнічка ўпраўлення ідэалагічнай работы Магілёўскага аблвыканкама Наталля Дашкова.
Згодна інфармацыі з артыкула аб сустрэчы можна зрабіць вывад, што высокія каталіцкія госці прыехалі ў Магілёў выключна для расхвальвання мясцовых улад. Хоць афіцыйнае пагадненне паміж Каталіцкім Касцёлам і дзяржавай пакуль не падпісана, фактычнае супрацоўніцтва ўжо сёння з’яўляецца актыўным, плённым і сістэмным, заявіў Яшэўскі. А Юзаф Станеўскі выказаў падзяку ўладам за тое, што яны адкрыты да дыялогу.
У сваю чаргу Дашкова пахваліла Касцёл на Магілёўшчыне за тое, што ўсе 12 яго зарэгістраваных супольнасцяў актыўна ўдзельнічаюць не толькі ў літургічным жыцці, але і ў выхаваўчых, культурных і сацыяльных праектах. “Яна адзначыла, што 2025 год стаў важным этапам перарэгістрацыі рэлігійных арганізацый у Магілёўскай вобласці, і каталіцкія супольнасці паспяхова прайшлі гэты працэс”, – распавядаецца ў артыкуле.
Тое, што лукашэнкаўская чыноўніца скажае рэчаіснасць, гэта яшчэ паўбяды, бо чакаць іншага ад яе не варта. Аднак горш за ўсё, што з ёй пагаджаецца вышэйшы каталіцкі клір Беларусі, бо ён выдатна ведае – змяншэнне ўдвая колькасці парафій у Магілёўскай вобласці пасля мінулагодняй рэгістрацыі ну ніяк нельга лічыць “паспяхова пройдзеным працэсам”.
Што ж тычыцца непадаўжэння дазволаў на служэння святарам, то ці ішла пра гэта гаворка на сустрэчы у музеі – невядома.
Фотаздымак: Сatholic.by