Пракуратура Быхаўскага раёна прымусіла адну з сельгасарганізацый раёна пералічыць спагнанніку грошы, якія бухгалтэрыя ўтрымала з заробку работніка, але так і не адправіла па прызначэнні. З выплат даўжніка па выканаўчым дакуменце ўтрымалі ўсю суму доўгу – звыш 7 тысяч рублёў, з іх больш за 5 тысяч аселі ў гаспадарцы. Скардзіўся ў пракуратуру сам работнік: з яго грошы ўтрымалі, а доўг перад спагнаннікам не пагасілі.
Паводле закона аб выканаўчым вядзенні наймальнік абавязаны пералічыць утрыманае спагнанніку або на рахунак органа прымусовага выканання на працягу пяці дзён з моманту выплаты заробку.
Пракурор вынес кіраўніку гаспадаркі прадпісанне, пасля чаго ўся ўтрыманая сума пайшла спагнанніку. Хто менавіта ў бухгалтэрыі распараджаўся чужымі грашыма і ці панёс нехта за гэта адказнасць, у паведамленні не сказана. Не названая і гаспадарка.
Паведамленне адметнае тым, што пракуратура Быхаўскага раёна публікуе яго другі раз амаль даслоўна. У чэрвені 2024 года тая ж пракуратура пад тым жа загалоўкам расказвала пра тую ж схему: сельгасарганізацыя раёна некалькі месяцаў утрымлівала грошы з заробку работніка, але спагнанніку – банку з дзяржаўнай доляй – іх не пералічвала, а «выкарыстоўвала на іншыя патрэбы ў інтарэсах гаспадаркі». Вынік той жа – прадпісанне кіраўніку.
Розніца ў дэталях: два гады таму ў пракуратуру звярнуўся банк, цяпер – работнік, і тады пракуратура хаця б паведамляла, куды падзеліся грошы, а цяпер абмежавалася «неналежным выкананнем абавязкаў». Адна гэта гаспадарка ці дзве розныя, з абодвух паведамленняў зразумець нельга.
Быхаўскія сельгасарганізацыі сёлета ўжо фігуравалі ў пракурорскай справаздачнасці аб заробках: у сакавіку 2026 года у адной з іх 94 работнікам не выплацілі больш за 104 тысячы рублёў, і грошы людзі атрымалі таксама толькі пасля ўмяшання пракуратуры.
Тры выпадкі за два гады аб’ядноўвае не толькі раён, але і мера рэагавання – прадпісанне. Заробак работніка ў быхаўскай гаспадарцы, мяркуючы па гэтых паведамленнях, даходзіць да адрасата не ў пяцідзённы тэрмін, а пасля акта нагляду.
Фота ілюстрацыйнага характару.