У вёску Анікавічы Горацкага раёна днямі наведаліся воўкі. Паляўнічыя застрэлілі іх.
Падзея адбылася літаральна надоечы. З’яўленне ваўкоў у вёсцы Анікавічы зафіксаваў мясцовы жыхар. Для восені такія выпадкі не рэдкія, бо ў гэты час маладняк пачынае асвойваць тэрыторыю і праяўляць залішнюю цікаўнасць, кажа інжынер па паляўнічай гаспадарцы Дзяніс Елісееў.
Як паведамляе тэлеграм-канал “Лясныя навіны Магілёўшчыны”, сітуацыю ў Анікавічах удалося ўзяць пад кантроль максімальна хутка. Дзякуючы ўзаемадзеянню мясцовых паляўнічых і егерскай службы Горацкага лясгаса, тры ваўкі былі адсочаныя і забітыя.
Спецыялісты раяць насельніцтву ў падобных выпадках як мага хутчэй паведамляць паляўнічым альбо егерам для аператыўнага рэагавання і змяншэння рызык для сельскай гаспадаркі і жыцця людзей.
Фотаздымак: ТГ “Лясныя навіны Магілёўшчыны”