Магілёўская вобласць перамагла ў галасаванні за найлепшы каравай краіны, якое правёў тэлеграм-канал прэс-службы Лукашэнкі «Пул Першага». Другое месца ў Мінскай вобласці, трэцяе – у Брэсцкай. Канал паведаміў пра мінімальны адрыў паміж лідарамі і барацьбу да апошніх секунд.
Спаборнічалі караваі-«мільённікі»: кожная вобласць спякла свой пасля таго, як намалаціла мільён тон збожжа, і прывезла яго ў Палац Незалежнасці. Магілёўскі – паўтара метра вышынёй і сто кілаграмаў вагой, з пшаніцы новага ўраджаю.
У полі расклад быў іншым. Паводле даных Мінсельгасхарча на 9 кастрычніка, збожжа з рапсам і кукурузай вобласці намалацілі столькі:
- Мінская – 2582 тысячы тон;
- Гродзенская – 1913 тысяч;
- Брэсцкая – 1806 тысяч;
- Магілёўская – 1251 тысячу;
- Гомельская – 1171 тысячу;
- Віцебская – 1003 тысячы.
Магілёўская вобласць тут чацвёртая з шасці, і збожжа ў яе ўдвая менш, чым у Мінскай, чый каравай у галасаванні стаў другім.
У самім апытанні галасы размеркаваліся так:
- Магілёўская вобласць – 110 836;
- Мінская – 107 939;
- Брэсцкая – 103 112;
- Гомельская – 98 116;
- Віцебская – 63 190;
- Гродзенская – 58 275.
Усяго 530,3 тысячы галасоў. Першае і другое месцы раздзялілі менш за тры тысячы галасоў, а Гродзенская вобласць, другая ў краіне па намалоце, у галасаванні апынулася апошняй.
Падпісчыкаў у «Пула Первого» цяпер 283 829 – галасоў у апытанні амаль удвая больш. Галасаваць мог кожны, у каго была спасылка, а спасылкі ўвесь кастрычнік распаўсюджвалі раённыя газеты, кожная за сваю вобласць: «Новае Палессе» агітавала за Гомельскую з пазнакай «на правах рэкламы», газета Докшыцкага раёна – за Віцебскую, «Адзінства» – за Мінскую.
Паўмільёна – гэта галасы ўсіх шасці абласцей, але дзяржаўнае агенцтва прыпісала іх адной Магілёўскай. Насамрэч у яе крыху больш за адну пятую.
Узнагарода пераможцу тая ж, што і астатнім: караваі застаюцца ўпрыгожваць Залу ўрачыстых цырымоній Палаца Незалежнасці, а іх стваральнікаў запрасілі туды на экскурсію.
Калаж mogilev.media.