Крычаў пліты

Крычаўскі райвыканкам запісаў у пакупнікі Польшчу, куды галоўны тавар раёна ўвозіць забаронена

Знешнегандлёвы абарот Крычаўскага раёна за студзень-жнівень 2026 года перавысіў восем мільёнаў долараў, станоўчае сальда – 3,5 мільёна.

Лічбы на пасяджэнні райвыканкама назваў намеснік старшыні Сяргей Палуйчык, а раённая газета прывяла і спіс з дзевяці краін-пакупнікоў: Азербайджан, Арменія, Казахстан, Кыргызстан, Расія, Узбекістан, Іран, Грузія і Польшча.

Галоўным экспарцёрам раёна Палуйчык назваў СТАА «ЦСП БЗС» – адзіны ў Беларусі завод цэментна-стружкавых пліт. Яго пабудавалі ў 2015 годзе ЗАТ «Белзарубежстрой» і аўстрыйская кампанія VST Building Technologies, тэхналагічную лінію паставіла нямецкая Binos.

Сыравіна мясцовая: драўніна суседніх лясгасаў і цэмент ААТ «Крычаўцэментнашыфер».

За мяжу ідзе 80 працэнтаў прадукцыі, але…

Пліта пад маркай BZSPlus – гэта драўняная стружка, спрасаваная з цэментам, і абодва яе складнікі трапілі пад еўрапейскія санкцыі.

У сакавіку 2022 года Еўрасаюз забараніў увоз з Беларусі драўніны і вырабаў з яе, а таксама цэменту і цэментных вырабаў. Улетку 2024 года да забарон дадаўся спіс тавараў, якія прыносяць Беларусі даход, складзены паводле ўзору расійскага.

У расійскім пераліку пліты з драўнянай стружкі на цэменце названыя наўпрост.

Да санкцый крычаўскія пліты на польскім рынку былі: BZSPlus прадавалі польскія дыстрыб’ютары, а экалагічную дэкларацыю для еўрапейскіх пакупнікоў заводу ў 2021 годзе выдала чэшскае дзяржаўнае агенцтва CENIA.

Тэрмін дзеяння дэкларацыі скончыўся ў сакавіку 2026 года.

З дзевяці краін крычаўскай справаздачы ў Еўрасаюз уваходзіць толькі Польшча. І гэта адзіная краіна ў спісе, куды галоўны тавар Крычаўскага раёна ўвозіць нельга.

Фота: KrichevLIVE.

← Усе навіны Магілёва