Новым намеснікам пракурора Магілёўскай вобласці прызначаны цяпер ужо былы пракурор Магілёва Аляксандр Бароўскі.
Для прадстаўлення абласной пракуратуры Бароўскага на новай пасадзе ў Магілёў прыехаў намеснік Генеральнага пракурора Максім Варонін. Распавядаючы пра новапрызначанага, госць з Мінску “адзначыў высокую ступень даверу і асаблівую адказнасць, ускладзеную на Аляксандра Бароўскага. Пажадаў яму паспяховай далейшай службы”.
Разам з тым у дзейнасці Бароўскага ёсць тое, што ставіць пад знак вялікага пытання адносна выканання законаў. Як сведчыць правабарончая арганізацыя Dissidentby, Бароўскі, займаючы пасаду пракурора горада Магілёва, датычны да падтрымкі і забеспячэння функцыянавання рэпрэсіўнай судова-пракурорскай сістэмы Рэспублікі Беларусь.
“Падтрымліваў абвінавачванні па палітычна матываваных справах, спрыяў пераследу грамадзян за ўдзел у мірных акцыях пратэсту. Уключаны ў санкцыйныя спісы Еўрапейскага Звязу за ўдзел у сур’ёзных парушэннях правоў чалавека і фальсіфікацыі правасуддзя ў дачыненні да грамадзян, якія выказвалі палітычную і грамадзянскую нязгоду” – адзначаюць праваабаронцы.
Новым пракурорам Магілёва прызначаны Дзяніс Іванькоў, які да гэтага займаў пасаду пракурора Асіповіцкага раёна.
Фотаздымак: “Веснік Магілёва”
