Шостага жніўня на полі ў Слаўгарадскім раёне спынілі машыну, каб уручыць кіроўцы наклейку на кабіну – тысяча тон перавезенага збожжа. Прыехала раённае начальства, прывезлі грамату, сертыфікат і артыстаў з песнямі пра хлебаробаў. Раённая газета вынесла ў загаловак паказанні тэрмометра, трыццаць дзевяць градусаў, і падала іх як фон подзвігу: спёцы, маўляў, не пад сілу спыніць аграрыяў. У гэты самы дзень па краіне дзейнічала штармавое папярэджанне – чырвоны ўзровень небяспекі з-за спёкі, а па Магілёўскай вобласці абяцалі да трыццаці васьмі градусаў.
Чырвоны ўзровень абвяшчаюць не дзеля прыгажосці зводкі. Гэта найвышэйшая ступень папярэджання, і азначае яна прамую пагрозу здароўю: цеплавыя ўдары, абвастрэнні ў сардэчнікаў, рост колькасці аварый. Для наймальніка такая тэмпература – не надвор’е за вакном, а ўмовы працы, за якія ён адказвае.
Што пры гэтым належыць рабіць, Міністэрства працы і сацыяльнай абароны пералічыла яшчэ ў канцы чэрвеня:
- забяспечыць кандыцыянаванне рабочых зон;
- арганізаваць бесперабойны доступ да чыстай пітной вады;
- абсталяваць прахалодныя месцы адпачынку з тэмпературай васямнаццаць-дваццаць градусаў, а пры працы ў полі – сонцаахоўныя навесы;
- увесці дадатковыя перапынкі, якія не замяняюць абедзенны, уключаюцца ў працоўны час і аплачваюцца;
- перанесці работы на адкрытым паветры на раннюю раніцу або вечар.
Апошні пункт для жніва і ўвогуле гучыць здзекліва: убіраць хлеб толькі раніцай і ўвечары ніхто раёну не дазволіць, таму што з раёна патрабуюць тоны, а не выкананне памяткі.
Правяраюць выкананне гэтай памяткі цалкам будзённа. Да канца ліпеня у сельгасарганізацыях краіны правялі каля ста сямідзесяці маніторынгаў па ахове працы і рэкамендавалі ліквідаваць каля дзвюх тысяч трохсот парушэнняў. Гэта рахунак за няпоўны месяц жніва.
Сам па сабе тысячнік даўно не навіна, а нарматыў. У стужцы абласнога аб’яднання прафсаюзаў такія цырымоніі ідуць адна за адной: недзе мяжу ў тысячу тон узялі адразу трое кіроўцаў, недзе ўшаноўвалі першага ў раёне, недзе першы маладзёжны экіпаж. Мяняюцца раён, гаспадарка і марка тэхнікі – сцэнар адзін: поле, кіраўніцтва, сертыфікат, наклейка. І планка не стаіць на месцы: пасля тысячнікаў спатрэбяцца двухтысячнікі, потым трохтысячнікі, і лічбу давядзецца выдаваць пры любым надвор’і.
Надвор’е гэтым разам таксама паставіла рэкорд. У Мазыры паветра прагрэлася да сарака цэлых трох дзясятых градуса – максімум жніўня за сто сорак пяць гадоў назіранняў, усяго на адну дзясятую ніжэй за абсалютны рэкорд за ўсю гісторыю вымярэнняў у Беларусі.
Лукашэнка правёў гэты дзень у Мінску: прымаў міністра замежных спраў гарачай краіны – Алжыра.
Якая тэмпература патрэбна для такой працы, не таямніца.
Дзяржаўнае тэлебачанне, паказваючы экскурсію па Палацы Незалежнасці, асобна тлумачыць гасцям, чаму ў залах пастаянна трымаюць сямнаццаць градусаў. Віцебская гарадская газета, апісваючы такую ж экскурсію, падабрала для гэтага рэжыму азначэнне – мабілізуючы. Сямнаццаць-васямнаццаць градусаў, камфортных для працы начальства.
Мабілізуючыя сямнаццаць – гэта ў залах. У полі ў той дзень было пад сорак, і мабілізуе там наклейка на кабіну.
Фота раённай газеты.