У Горацкім раёне міліцыя не дала вывезці тры тоны мяса ў Расію, не ўзгадваючы назву гэтай краіны.
Пра партыю туш буйной рагатай жывёлы, агульнай вагой каля трох тон, якую затрымалі ў Горацкім раёне напісаў тэлеграм-канал “Міліцыя Магілёўшчыны”. Паводле яго, суправаджальныя дакументы на груз адсутнічалі. Аператыўнікі ўстанавілі, што работнікі ўчастка па забою аднаго з нарыхтоўчых прадпрыемстваў вобласці кралі прадукцыю, якую затым рэалізавалі прыватным асобам.
Скрадзеныя тры тоны планавалася вывезці за мяжу, піша міліцыя, не ўказваючы, што адзіная міждзяржаўная мяжа, якая тычыцца Горацкага раёна і праз якую можна вось так проста вывезці тры тоны мяса – гэта мяжа з Расіяй. Аднак слова “Расія” лукашэнкаўскія сілавікі практычна ніколі не ўзгадваюць у сваіх паведамленнях пра злачынствы. Гэта зразумела, бо прарасійская і антыбеларуская арыентацыя сілавікоў вядома даўно. Таму яны і лічаць за неабходнае не падаваць у паведамленнях назву гэтай краіны, каб у чытачоў не ўзнікала з ёй негатыўных асацыяцый.
Ну а фігуратам узбуджанай за крадзеж крыміналнай справы пагражае да 10 гадоў зняволення.
Фотаздымак: ТГ “Міліцыя Магілёўшчыны”