Магілёўская вобласць выйшла ў лідары краіны па будаўніцтве арэнднага жылля: за першае паўгоддзе тут пабудавалі каля 60 тысяч квадратных метраў, у Гомельскай і Віцебскай абласцях – па 31 тысячы.
Гэтыя лічбы назваў намеснік міністра архітэктуры і будаўніцтва Аляксандр Шваюноў.
Адзначым, што ўвесь сыр-бор разгарэўся праз увагу Лукашэнкі да арэнднага жылля.
Лідарства Магілёўшчыны адноснае.
Паводле даных Белстата за студзень-ліпень Магілёўская вобласць аказалася адзіным рэгіёнам, дзе ўвод жылля ўвогуле вырас:
- амаль 246 тысяч квадратных метраў супраць 233 тысяч годам раней;
- у Мінску ўвялі 172,9 тысячы квадратных метраў супраць 363,3 тысячы – удвая менш;
- у Гомельскай вобласці – 212,3 тысячы супраць 231,4 тысячы;
- у Віцебскай – 162,5 тысячы супраць 165,1 тысячы.
Змяніўся і сам план. З 2026 года урад не ўстанаўлівае абласцям агульны аб’ём уводу жылля – заданні даюцца толькі па жыллі, якое будуецца за кошт бюджэту або з дзяржпадтрымкай.
Прыкладна палова гэтага аб’ёму прыпадае на арэнднае. Перавыкананне цяпер лічыцца ад такога задання: у жніўні аблвыканкам адсправаздачыўся, што дамоў у вобласці ўведзена ў 1,6 раза больш за запланаванае, а арэнднага жылля – у тры разы больш.
Там, дзе план датычыўся жылля для саміх людзей, Магілёўская вобласць адставала. Па выніках дзевяці месяцаў 2025 года аблвыканкам прызнаў невыкананым заданне па ўводзе жылля з дзяржаўнай падтрымкай – кватэр, якія чаргавікі будуюць ва ўласнасць у льготны крэдыт.
Арэнднае жыллё ўладкавана інакш: кватэра застаецца дзяржаўнай, а пры размеркаванні ў першую чаргу ўлічваюцца патрэбы вайскоўцаў і прыраўнаваных да іх асоб.
Попыт паказвае, чаго варта такое лідарства: на адну арэндную кватэру ў раёнах Віцебскай вобласці прэтэндуюць ад пяці чалавек, у Магілёўскай вобласці і Мінску – ад 39 да 60.
Лідар па пабудаваных метрах застаецца лідарам і па чарзе.
Фота БелТА.