У Быхаве працуе філіял «Быхаўскі» ААТ «Бабушкіна крынка», і яго прадукцыя і так кожны дзень стаіць на паліцах раённых крам.
Тым не менш у раённым цэнтры культуры прадстаўнікі холдынга правялі сустрэчу з работнікамі гандлю і прадпрымальнікамі раёна: абмеркавалі графікі дастаўкі, аб’ёмы заказаў і тэрміны прыдатнасці, а потым зладзілі дэгустацыю ёгуртаў, сыроў і масла. Раённая газета падала гэта як магчымасць бліжэй пазнаёміцца з прадукцыяй мясцовага прадпрыемства.
Навошта знаёміць тых, хто і так даўно знаёмы, патлумачылі месяцам раней у Бабруйску. Там з малочнікамі сустракаліся кіраўнікі гандлёвых сетак разам з начальніцай упраўлення гандлю і паслуг гарвыканкама Аленай Семянчук .
Галоўным пытаннем быў мэтавы паказчык – удзельная вага беларускіх тавараў у рознічным тавараабароце. Крамам ненадакучліва нагадалі пра абавязковы асартымент, прыярытэтную выкладку айчыннага і не менш за палову паліц у прыкасавай зоне пад беларускую прадукцыю.
Семянчук запатрабавала не дапусціць зніжэння долі продажаў тавараў, вырабленых у Магілёўскай вобласці.
Там жа назвалі і спосаб: дэгустацыі, распродажы, зніжкі вытворцы і зніжэнне гандлёвай надбаўкі самімі крамамі. Частка цаны прасоўвання малочнай прадукцыі кладзецца на прадаўца.
Быхаўскім прадаўцам быхаўскае малако прадстаўляць не трэба. Вочы ад захаплення яны будуць акругляць толькі на камеру.
Фота «Маяк Прыдняпроўя».