Быхаўская раённая газета не збаўляе дарожную «інтэнсіўнасць». Шостага кастрычніка яна за дваццаць хвілін выпусціла дзве нататкі: пра асфальт на трасе Быхаў – Вараніно і пра тое, што інтэнсіўна абнаўляюцца сельскія дарогі раёна. Разам гэта каля чатырох з паловай кіламетраў на ўвесь раён, і гэты паток мы ўжо разбіралі.
Раніцай сёмага кастрычніка выйшла трэцяя нататка – пра капітальны рамонт вуліцы Савецкай у самім Быхаве, з падзагалоўкамі і «прамежкавымі вынікамі». Вынікі такія: рамонт ідзе з верасня 2025 года, першы ўчастак здалі, але святлафор каля «Еўраопта» на скрыжаванні з Касманаўтаў дагэтуль не працуе, на другім участку пакладзены толькі першы слой асфальту, а скончыць абяцаюць у трэцім квартале 2027 года.
Завяршаецца нататка не лічбамі, а зваротам: жыхарам раяць паставіцца да нязручнасцей з разуменнем і цвяроза ацаніць высокую якасць рамонту.
Дарогі ў Быхаве рамантуюць гадамі, а нататкі пра іх выходзяць па тры за два дні. Такімі тэмпамі «Маяк Прыдняпроўя» можна перайменаваць у «Дарожны веснік».
Па-сапраўднаму цалкам заасфальтаваная вуліца ў Быхаве – Смалячкова, і асфальт на ёй паклалі яшчэ да Лукашэнкі, пры старшыні райвыканкама Аляксандры Раманавічы Пазюмку. Пры Лукашэнку была ўжо толькі мышыная валтузня, якая працягваецца і па сённяшні дзень.
Фота bykhov.by.