Разнастайную зброю, 370 патронаў, тратыл і іншыя боепрыпасы выпадкова знайшлі прыродаахоўнікі ў доме браканьера ў Слаўгарадскім раёне.
Пачалася гісторыя з таго, што супрацоўнікі Магілёўскай абласной інспекцыі аховы жывёльнага і расліннага свету выявілі двух жыхароў Слаўгарада, якія незаконна лавілі рыбу сеткамі.
Падчас далейшай праверкі прыродаахоўнікіі агледзелі жыллё і гаспадарчыя пабудовы аднаго з браканьераў. І акрамя рыбалоўных прылад, знайшлі куды больш небяспечныя прадметы. У 50-гадовага мужчыны канфіскавалі каля 370 патронаў, зброю, іншыя боепрыпасы і рэчыва, якое, паводле папярэдніх звестак, можа быць тратылам.
Як высветлілі затым следчыя, гаспадар арсенала афіцыйна нідзе не працуе, час ад часу ездзіць на заробкі ў Расію. А вольны час прысвячае пошукам прадметаў часоў нямецка-савецкай вайны. На допыце ён расказаў, што набыў металашукальнік і больш за пятнаццаць гадоў збіраў знойдзеныя снарады, гранаты і патроны.
Прычым калекцыя папаўнялася не толькі дзякуючы ўласным знаходкам. Паводле затрыманага, знаёмыя, якія ведалі пра яго захапленне, таксама прыносілі яму стрэльбы і іншыя прадметы ўзбраення. Частка гэтай зброі, як папярэдне ўстаноўлена, не была зарэгістраваная належным чынам.
Цяпер мужчына падазраецца ў незаконным абароце боепрыпасаў і выбуховых рэчываў.
Фотаздымак: sk.gov.by