Быхаўскі рэстаран «Днепр» увайшоў у топ рэспубліканскага агляду-конкурсу на лепшую арганізацыю харчавання механізатараў – так навіну падалі абласныя прафсаюзы, а «Магілёўскія ведамасці» пераказалі яе па-свойму. Насамрэч першае месца ў Беларусі дасталося не яму.
Вынікі конкурсу падвёў прэзідыум Беларускага прафсаюза работнікаў гандлю, спажывецкай кааперацыі і прадпрымальніцтва. Пераможцам стала закусачная «Піца Венецыя» Слонімскага філіяла Гродзенскага аблспажыўтаварыства.
У яе штаце сем чалавек, з іх чацвёра кухараў, і з сакавіка па жнівень яны штодня гатавалі гарачыя абеды для 1,3 тысячы ўдзельнікаў уборачнай. Больш за тысячу механізатараў елі двойчы на дзень, 629 механізатарам ежу вазілі ў тэрмасах проста на палявыя станы, а сярэдні абед абыходзіўся ў 12 рублёў.
Акрамя пераможцы, прэзідыум абвясціў падзякі яшчэ пяці калектывам:
- кафэ «Ясельда» Пінскай міжраённай гандлёвай базы ў Лагішыне;
- кафэ хуткага абслугоўвання Бешанковіцкага філіяла Віцебскага аблспажыўтаварыства ў Лёзне;
- сталовай № 13 Светлагорскага філіяла Гомельскага аблспажыўтаварыства ў Рэчыцы;
- рэстарану «Днепр» у Быхаве;
- цэнтральнай сталовай Капыльскага райспажыўтаварыства.
Падзяка прэзідыума – гэта заахвочванне, а не прызавое месца, і дзеліць яе «Днепр» з чатырма іншымі ўстановамі.
У версіі «Магілёўскіх ведамасцяў» слонімскі пераможца знік, а словы старшыні галіновага прафсаюза Аксаны Канстанцінавіч пра тое, як цяжка кожны дзень карміць больш за тысячу чалавек, засталіся.
У інтэрпрэтацыі «МВ» яны чытаюцца як аповед пра Быхаў. У прафсаюзным жа паведамленні гэтая фраза стаіць адразу пасля лічбаў па Слоніме, а пра сам «Днепр» там сказана толькі адным радком у спісе.
Рэстаран «Днепр» лічыцца за Быхаўскім адасобленым структурным падраздзяленнем Магілёўскага раённага спажывецкага таварыства.
Для рэстарана гэтыя абеды – не падпрацоўка, а адзіны спосаб утрымацца на плаве. Самога Быхаўскага райспажыўтаварыства даўно няма: 1 сакавіка 2019 года яно спыніла дзейнасць у выніку рэарганізацыі і стала філіялам магілёўскага.
Большая частка яго аб’ектаў з таго часу распрададзена, здадзена ў арэнду або ўвогуле закрыта. Рэстаран застаўся апошнім фарпостам быхаўскага грамадскага харчавання, і кормяць яго цяпер механізатары. Вось і ўвесь «топ».
Фота з адкрытых крыніц.