У Ленінскі РАУС Магілёва звярнуліся адразу некалькі жыхароў краіны, якіх падманула ў інтэрнэце прывабная незнаёмка. Мужчыны знаёміліся з ёй на сайце знаёмстваў, перапісваліся, пераводзілі грошы – пасля чаго суразмоўца блакавала кожнага і знікала. Аператыўнікі высветлілі, што за «красуняй» стаяў васемнаццацігадовы магілёвец, раней не судзімы.
Ён стварыў на сайце фальшывую анкету, загрузіў чужыя здымкі з інтэрнэту і стаў выдаваць сябе за дзяўчыну. Супраць хлопца распачалі некалькі крымінальных спраў. Дакладна такую ж гісторыю магілёўская міліцыя расказвала ў верасні 2025 года. Тады ў той жа Ленінскі РАУС прыйшлі трое падманутых мужчын, а «дзяўчынай», якая прасіла грошы за будучыя спатканні і пасля пераводу блакавала кавалераў, таксама аказаўся васемнаццацігадовы жыхар Магілёва, які нідзе не працаваў.
Супраць яго таксама распачалі некалькі крымінальных спраў.
За год нічога не змянілася – ні раён, ні ўзрост «дзяўчыны», ні гатоўнасць кавалераў пераводзіць грошы даме, якую яны ні разу не бачылі.
Фота ілюстрацыйнага характару.