У чэрвені ў адным з аддзяленняў раённай бальніцы ў Слаўгарадскім раёне на суседніх ложках апынуліся пажылая жанчына і 26-гадовая мясцовая жыхарка. Яна прапанавала дапамогу: схадзіць па прадукты. Пенсіянерка аддала ёй сваю банкаўскую картку.
У краму гэтая картка, мяркуючы па матэрыялах справы, трапіла не адразу.
Суседка ўвяла яе рэквізіты ў сістэму дыстанцыйнага банкаўскага абслугоўвання і пазначыла там жа абаненцкі нумар пенсіянеркі.
Такая рэгістрацыя пацвярджаецца кодам – код на гэты нумар і прыйшоў. Пасля гэтага рахунак уладальніцы карткі адкрыўся ў тэлефоне суседкі цалкам: з астаткам, гісторыяй і магчымасцю пераводзіць.
Далей пенсіянерку ўжо не пыталіся. Грошы з яе рахунку сыходзілі пераводамі на рахунак суседкі па палаце.
Заўважыла прапажу пацярпелая толькі дома, пасля выпіскі, калі паглядзела свае зберажэнні. Расказала сваякам, тыя звярнуліся ў міліцыю.
Фота ілюстрацыйнага характару.