У якасці дысцыплінарнага пакарання на адным з прадпрыемстваў Слаўгарадчыны прыдумалі штрафаваць работнікаў, але гэта, аказалася, па-за законам.
У чэрвені кіраўнік арганізацыі падпісаў загад, паводле якога за парушэнні працоўнай і выканаўчай дысцыпліны работнікаў можна было штрафаваць на суму да пяці базавых велічынь. У прыватнасці, грошы прапаноўвалася спаганяць з вадзіцеляў, што адхіліліся ад маршруту без паважнай прычыны. Пры гэтым кожны такі выпадак аўтаматычна прапаноўвалася лічыць прагулом.
Праўда, праблема заключалася ў тым, што такіх штрафаў беларускае працоўнае заканадаўства не прадугледжвае. Наймальнік самастойна прыдумваць новыя віды дысцыплінарных спагнанняў не можа.
Паводле Працоўнага кодэкса, за парушэнне працоўных абавязкаў прадугледжаныя заўвага, вымова, пазбаўленне цалкам або часткова стымулюючых выплат і звальненне. Штрафу ў гэтым спісе няма.
Пракуратура Слаўгарадскага раёна адрэагавала на самадзейнасць кіраўніцтва і ўнесла пратэст на незаконны загад. У выніку яго адмянілі.
Фотаздымак з адкрытых крыніц