Пульс раёна б’ецца ў спакойным, рабочым рытме – так апісалі абстаноўку на планёрцы ў Слаўгарадскім райвыканкаме. Раённая бальніца працуе без збояў і экстранных сітуацый, дапамога аказваецца ў планавым парадку.
Як выглядае планавы парадак за межамі райцэнтра ў дваццаць першым стагоддзі, відаць з графіка работы перасоўнага фельчарска-акушэрскага пункта на верасень. Маршрут распісаны на 22 дні, прыём вядзе памочнік урача, адначасова прадаюцца лекі.
Умову, пры якой вёска мае права на ўласны пункт, устанавіў Міністэрства аховы здароўя: ФАП арганізуецца ў населеных пунктах з колькасцю жыхароў ад 700 чалавек і адлегласцю 3-5 кіламетраў да найбліжэйшай лячэбна-прафілактычнай арганізацыі. Ва ўсім Слаўгарадскім раёне разам з райцэнтрам жывуць 11 635 чалавек.
Для тых, хто ў нарматыў не трапіў, прадугледжана выязная форма абслугоўвання – яна апісана як дапамога насельніцтву маланаселеных і аддаленых вёсак, якая адначасова зніжае колькасць выклікаў хуткай дапамогі.
Там жа названа, колькі для гэтага ёсць машын: у 2025 годзе ў краіне працавалі 129 перасоўных фельчарска-акушэрскіх пунктаў, з іх у Магілёўскай вобласці – сем, на дваццаць адзін раён.
Плануюцца такія выезды з улікам сезоннасці сельскагаспадарчых работ, то бок расклад падстройваюць пад уборачную.
Нарматыў пры гэтым выкананы цалкам. Вёска, дзе не набіраецца сямісот жыхароў, стацыянарнага пункта не атрымлівае, а перасоўны заязджае туды столькі разоў, на колькі хапае сямі машын на вобласць.
Даводзіцца пагадзіцца: раўней пульс можа быць толькі ў рэанімацыі.
Фота раённай газеты.