У Магілёве 63-гадовая жанчына замяніла фатаграфію ў пасведчанні інваліда, якое было выдана яе бацьку, каб карыстацца ільготамі.
Гісторыя з ператварэннем бацькавага пасведчання інваліда ва ўласнае магла б яшчэ нейкі час заставацца незаўважанай, каб не пільнасць кантралёра ў дызель-цягніку. Падчас праверкі білетаў жанчына паказала пасведчанне інваліда першай групы, але дакумент выглядаў падазрона. Фатаграфія была прыклееная не так, як звычайна робіцца ў афіцыйных пасведчаннях.
Кантралёр пацікавіўся, адкуль узяўся такі дакумент. Замест тлумачэнняў пасажырка абрала больш радыкальны варыянт: на прыпынку «Станцыя Буйнічы» выбегла з дызеля і знікла.
Пасведчанне трапіла да экспертаў. Высветлілася, што сама «корачка» сапраўдная. А вось далей над ім ужо папрацавалі ў хатніх умовах.
Старую фатаграфію цалкам выдалілі і замест яе прыклеілі здымак жанчыны разам з двума кавалачкамі іншай паперы. Частку пячаткі каля новага фота дамалявалі ўручную. Але найбольш творча падышлі да праблемы таго, што пасведчанне было выпісана на мужчыну: да прозвішча і імя дапісалі літары «а», каб яны выглядалі жаночымі. Так бацькава пасведчанне інваліда першай групы ператварылася ў дакумент дачкі.
Асобу пасажыркі ўстанавілі. Ёй аказалася 63-гадовая жыхарка Магілёва. Жанчына прызналася, што пасведчанне належала яе бацьку, а ўласную фатаграфію яна ўклеіла, каб карыстацца прадугледжанымі для інвалідаў першай групы льготамі.
Цяпер замест эканоміі на праездзе магіляўчанка рызыкуе атрымаць значна больш сур’ёзныя праблемы. Па факце здарэння Магілёўскі РАУС праводзіць праверку. Вынікам яе можа стаць узбуджэнне ў адносінах да жанчыны крымінальнай справы за падробку дакумента.
Фотаздымак з адкрытых крыніц.