Дзевяць забойстваў дзяўчынак-падлеткаў і два замахі на забойства інкрымінаваны 54-гадоваму магілёўцу, якога цяпер чакае суд.
Паляванне на школьніц
Паводле матэрыялаў справы, злачынец дзейнічаў на тэрыторыі Магілёўскай, Мінскай і Віцебскай абласцей у 1996–1999 гадах. Ён выбіраў сваіх ахвяр сярод дзяўчынак-падлеткаў, пра якіх ведаў, што ўдзень бацькі на працы, а дзеці вяртаюцца са школы адны. Таму гадзінамі хадзіў па мікрараёнах шматпавярховай забудовы, чакаючы найбольш безабаронную ахвяру.
Напады адбываліся ў пад’ездах. Следства сцвярджае, што мужчына душыў дзяўчынак, пагражаў нажом і наносіў удары, спрабуючы згвалтаваць і забіць іх.
У двух выпадках трагедыю перапынілі суседзі, якія выпадкова выйшлі са сваіх кватэр. Менавіта дзякуючы ім дзве дзяўчыны засталіся жывымі і пазней змаглі апазнаць нападніка.
Дзесяцігоддзі няўдалых пошукаў
Яшчэ ў канцы 1990-х следчыя заўважылі, што ўсе эпізоды аб’ядноўваюць аднолькавыя прыкметы: матыў, спосаб дзеянняў, узрост ахвяр і месца нападу. Узнікла версія пра аднаго серыйнага злачынцу.
Пазней яе пацвердзіла і генетычная экспертыза – біялагічныя сляды з розных месцаў злачынстваў належалі аднаму чалавеку. Але нават гэта не дапамагло адразу назваць яго імя.
Парадокс у тым, што ўжо ў 2001 годзе гэты ж мужчына быў асуджаны за два напады на дзяўчат. Тады ён не спрабаваў забіваць сваіх ахвяр, таму праваахоўнікі не звязалі яго з серыяй забойстваў.
Відэакамеры страха
Ад пачатку 2000-х серыя забойстваў раптоўна спынілася. Следства лічыць, што прычынай стала не раскаянне, а страх.
Паводле версіі Генпракуратуры, мужчына баяўся выкрыцця з-за сваёй крымінальнай біяграфіі, а распаўсюджванне дамафонаў і сістэм відэаназірання зрабіла падобныя напады значна больш рызыкоўнымі. І тады ён перайшоў да замкнёнага ладу жыцця і амаль не прыцягваў увагі.
Толькі ў пачатку 2025 года магілёвец зноў трапіў у поле зроку праваахоўнікаў, праўда, пракуратура не паведаляе, якім чынам гэта адбылося. Новыя доказы разам з вынікамі ДНК-экспертызы дазволілі следству аднавіць падзеі трыццацігадовай даўніны.
Цяпер серыйнага забойцу з Магілёва чакае суд. Мужчына застаецца пад вартай.
Фотаздымак з адкрытых крыніц